ກະຊວງແຮງງານ ຫາລືການຊ່ວຍເຫລືອຜູ້ອອກແຮງງານທີ່ກັບຈາກຕ່າງປະເທດ

497

ກະຊວງ ແຮງງານ ແລະ ສະຫວັດດີການສັງຄົມ (ຮສສ) ຮ່ວມກັບສູນບໍລິການຈັດຫາງານ ແລະ ບໍລິສັດຈັດຫາງານ ຈັດກອງປະຊຸມປຶກສາຫາລືການຊ່ວຍເຫລືອຜູ້ອອກແຮງງານທີ່ກັບຈາກຕ່າງປະເທດ ໃນວັນທີ 7 ພຶດສະພາ ຜ່ານມາ ເພື່ອເປັນການຊ່ວຍໃຫ້ຜູ້ອອກແຮງງານທີ່ກັບຈາກຕ່າງປະເທດ ທີ່ໄດ້ຮັບຜົນກະທົບຈາກການລະບາດຂອງໂຄວິດ 19 ໄດ້ຮັບການປົກປ້ອງສິດ ແລະ ຜົນປະໂຫຍດຫລາຍຂຶ້ນ ແລະ ບັນຈຸເຂົາເຈົ້າເຂົ້າເຮັດວຽກ ຕາມເງື່ອນໄຂ ແລະ ຄວາມຕ້ອງການຂອງຫົວໜ່ວຍແຮງງານ ພາຍໃນປະເທດ, ທັງເປັນການເປີດໂອກາດໃຫ້ສູນບໍລິການຈັດຫາງານ ແລະ ບໍລິສັດຈັດຫາງານ ໄດ້ລາຍງານສະພາບຂອງແຮງງານ, ສະເໜີຂໍ້ສະດວກ ແລະ ຄວາມຫຍຸ້ງຍາກ, ບັນຫາຕ່າງໆ ພ້ອມທັງກຳນົດທິດທາງແກ້ໄຂຮ່ວມກັນ ເພື່ອເຮັດໃຫ້ຜູ້ອອກແຮງງານທີ່ໄດ້ຮັບຜົນກະທົບ ໄດ້ຮັບການແກ້ໄຂ ຢ່າງທ່ວງທັນກັບສະພາບການ.

ທ່ານ ປະເດີມພອນ ສົນທະນີ ຮອງລັດຖະມົນຕີ ກະຊວງ ຮສສ ໄດ້ກ່າວວ່າ: ການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ໂຄວິດ- 19 ໄດ້ສົ່ງຜົນກະທົບຢ່າງໃຫຍ່ຫລວງຕໍ່ກັບການພັດທະນາເສດຖະກິດ-ສັງຄົມ ແລະ ຊີວິດການເປັນຢູ່ ຂອງປະຊາກອນຢູ່ໃນໂລກ ເນື່ອງຈາກຫົວໜ່ວຍທຸລະກິດ ໄດ້ມີການໂຈະ ແລະ ປິດກິດຈະການ ເຊິ່ງຕ້ອງໄດ້ໂຈະການຈ້າງງານ ແລະ ຢຸດການຈ້າງງານຢ່າງຖາວອນ.

ອີງຕາມການຄາດຄະເນຂອງອົງການແຮງງານສາກົນ ໃນທົ່ວໂລກ ຈະມີຜູ້ວ່າງງານເນື່ອງການແຜ່ລະບາດຂອງເຊື້ອພະຍາດໂຄວິດ 19 ສູງເຖິງ 25 ລ້ານຄົນ ເຊິ່ງຈະສູນເສຍລາຍຮັບປະມານ 3,4 ຕື້ ໂດລາສະຫະລັດ. ສຳລັບ ສປປ ລາວ ບັນດາຫົວໜ່ວຍແຮງງານ, ໂຄງການ ແລະ ໂຮງຈັກໂຮງງານຫລາຍແຫ່ງ ກໍໄດ້ໂຈະ ແລະ ປິດກິດຈະການ ເຊັ່ນກັນ ໂດຍມີຜູ້ອອກແຮງງານໃນລະບົບ, ນອກລະບົບ ລວມເຖິງຜູ້ປະກອບອາຊີບອິດສະຫລະ ກໍໄດ້ຮັບຜົນກະທົບຫລາຍສົມຄວນ. ຄຽງຄູ່ກັນນັ້ນ, ປະຊາຊົນລາວທີ່ອອກແຮງງານຢູ່ປະເທດໄທແບບຖືກຕ້ອງ ແລະ ບໍ່ຖືກຕ້ອງຕາມກົດໝາຍ ໄດ້ຫລັງໄຫລກັບຄືນປະເທດ ເປັນຈຳນວນຫລວງຫລາຍ ໂດຍຜ່ານຊ່ອງທາງຕ່າງໆ ເຊິ່ງເປັນບັນຫາເພີ່ມທະວີໃຫ້ພາກລັດ ແລະ ເອກະຊົນຕ້ອງຊ່ວຍກັນແກ້ໄຂ.

Cr: ຂປລ