ການຄ້າທໍາລາຍຊີ້ນໝູທີ່ນໍາເຂົ້າຜິດກົດໝາຍ 2.500 ກວ່າກິໂລ

664

ໃນຕອນເຊົ້າຂອງວັນທີ 6 ພຶດສະພາ 2020 ນີ້, ຫ້ອງການອຸດສາຫະກໍາ ແລະການຄ້າ (ອຄ)ນະຄອນໄກສອນພົມວິຫານ ໄດ້ຈັດພິທີທໍາລາຍຊິ້ນສ່ວນໝູຄົວແລ້ວທີ່ນໍາເຂົ້າບໍ່ຖືກຕ້ອງຕາມລະບຽບກົດໝາຍ ຢູ່ທີ່ສະໜາມຂີ້ເຫຍື້ອບ້ານຊອກ . ໃຫ້ກຽດເປັນປະທານໃນພິທີໂດຍທ່ານ ປອ ແສງທອງ ວັງແກ້ວມະນີ ເຈົ້ານະຄອນໄກສອນພົມວິຫານ, ທ່ານ ຄໍາສີເພັດ ໄຊຍະວົງ ຫົວໜ້າຫ້ອງການ ອຄ ນະຄອນ, ມີບັນດາຫ້ອງການອ້ອມຂ້າງນະຄອນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດນີ້, ທ່ານ ຄໍາສີເພັດ ໄຊຍະວົງ ກໍ່່ໄດ້ລາຍງານຜົນຂອງການຈັດຕັ້ງປະຕິບັດຢຶດຊີ້ນໝູທີ່ນໍາເຂົ້າຜິດກົດໝາຍໃນຄັ້ງນີ້ ເຊິ່ງໃຫ້ຮູ້ວ່າ: ໃນເວລາ 21 ໂມງ 15 ນາທີ ແລະ 24 ໂມງ 15 ນາທີ ຂອງວັນທີ 4 ພຶດສະພາ 2020 ເຈົ້າໜ້າທີ່ກວດກາການຄ້າ ສົມທົບກັບກໍາລັງທະຫານຊາຍແດນ ໄດ້ກວດກາລຽບຕາມຊາຍແດນແມ່ນໍ້າຂອງ ເຊິ່ງພົບເຫັນສິນຄ້າປະເພດຊີ້ນໝູຄົວແລ້ວຈໍານວນທັງໝົດ 97 ກະສອບ, ມີນໍ້າໜັກ 2.536 ກິໂລກຼາມ, ລວມມູນຄ່າ 35.757.600 ກີບ, ພ້ອມທັງເຮືອຫາງຍາວສີ່ສູບ ຈໍານວນ 1 ລໍາ ພ້ອມກັບລົດໂຕໂຍຕ້າວີໂກ້ສີດໍາຈໍານວນ 1 ຄັນ ເລກທະບຽນ ກໍາແພງນະຄອນ ກຂ 5445, ສ່ວນຜູ້ກະກໍາຜິດສາມາດຫຼົບໜີໄດ້ ດັ່ງນັ້ນ, ທາງເຈົ້າໜ້າທີ່ ແລະພາກສ່ວນທີ່ກ່ຽວຂ້ອງກໍາລັງຕິດຕາມຕົວມາດໍາເນີນຄະດີຕາມກົດໝາຍ. ຈາກນັ້ນ, ເຈົ້າໜ້າທີຈຶ່ງໄດ້ຢຶດສິນຄ້າທີ່ຜິດກົດໝາຍດັ່ງກ່າວໄວ້ທີ່ສາງກະທຽມແມ່ຕຽດ ບ້ານນາແກ ນະຄອນໄກສອນພົມວິຫານ ສ່ວນເຮືອ ແລະລົດ ໄດ້ມອບໃຫ້ເຈົ້າໜ້າທີ່ທະຫານຮັບຜິດຊອບຕາມລະບຽບກົດມາຍ.


ດັ່ງນັ້ນ, ເຈົ້ານະຄອນໄກສອນພົມວິຫານ ຈຶ່ງເຫັນດີຕົກລົງອະນຸມັດໃຫ້ທໍາລາຍຊິ້ນສ່ວນໝູດັ່ງກ່າວຖິ້ມ ເພື່ອປ້ອງກັນບໍ່ໃຫ້ມີການແຜ່ລະບາດຂອງເຊື້ອພະຍາດທີ່ອາດຈະຕິດມາກັບຊີ້ນໝູ ໂດຍການຂຸດຂຸມເລິກ 4-5 ແມັດ, ໂຮຍປູນຂາວ ແລ້ວນໍາຊີ້ນໝູລົງຂຸມ ພ້ອມທັງສີດຢາຂ້າເຊື້ອແລ້ວຈຶ່ງຝັງດິນ.


ໃນໂອກາດນີ້, ເຈົ້ານະຄອນໄກສອນພົມວິຫານ ກໍ່ໄດ້ເນັ້ນຢໍ້າໃຫ້ບັນດາຫ້ອງການອ້ອມຂ້າງນະຄອນ ຈົ່ງພ້ອມໃຈກັນປະຕິບັດວຽກງານຂອງຕົນໃຫ້ສຸດຄວາມສາມາດ, ບໍ່ສວຍໃຊ້ໜ້າທີ່ຕໍາແໜ່ງໃນທາງທີ່ຜິດ, ໃຫ້ເຫັນແກ່ສ່ວນລວມຫຼາຍກວ່າສ່ວນຕົນ ແລະໃນຊ່ວງວິກິດທີ່ພະຍາດໂຄວິດ-19 ກໍາລັງລະບາດນີ້ ເຮັດໃຫ້ເສດຖະກິດມີການຂະຫຍາຍໂຕຊ້າ ຈຶ່ງເຮັດໃຫ້ເກີດມີການລັກລອບນໍາສິນຄ້າຜິດກົດໝາຍເຂົ້າມາຫຼາຍ ດັ່ງນັ້ນ, ພະນັກງານລັດ ກໍ່ຄືພາກສ່ວນທີ່ກ່ຽວຂ້ອງຈຶ່ງຕ້ອງເອົາໃຈໃສ່ຕິດຕາມກວດກາຢ່າງລະອຽດຮອບຄອບ ເພື່ອເຮັດໃຫ້ບ້ານເຮືອນກໍ່ຄືປະຊາຊົນມີຄວາມຜາສຸກ./.