ມື້ນີ້ປົວດີເພີ່ມອີກ 4 ຄົນ ແລະ 3 ຄົນທີ່ອອກໂຮງໝໍກ່ອນໜ້ານີ້ ແມ່ນສາມາດໄປປະຕິບັດວຽກງານໃນສັງຄົມໄດ້ຕາມປົກກະຕິ

635

ຜົນການຖະແຫຼງຂ່າວ ບາງເນື້ອໃນ ປະຈໍາວັນທີ 9 ພຶດສະພາ 2020 ໂດຍ ທ່ານ ຮສ ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈໍາການຄະນະສະເພາະກິດ ພ້ອມຜູ້ອໍານວຍການໂຮງໝໍມິດຕະພາບ (150 ຕຽງ). ມາຮອດປັດຈຸບັນ, ຈໍານວນຜູ້ທີ່ຕິດເຊື້ອໂຄວິດ-19 ໃນ ສປປ ລາວ ມີພຽງແຕ່ຈໍານວນ 19 ຄົນຄືເກົ່າ ໃນນັ້ນ, ປິ່ນປົວຫາຍດີເພີ່ມອີກມື້ນີ້ 4 ຄົນ (ນ້ຳເບີ 03, 06, 09 ແລະ 19) ທີ່ຈະອອກໄປກັກຕົວຢູ່ເຮືອນຕື່ມອີກ 14 ວັນ ລວມທັງໝົດທີ່ປິ່ນປົວດີແລ້ວມີ 13 ຄົນ ແລະ 3 ຄົນ ທີ່ອອກໂຮງໝໍໄປກ່ອນໜ້ານີ້ ກໍໄດ້ກັກຕົວຄົບ 14 ວັນ ທາງທີມແພດໝໍ ກໍໄດ້ກວດກາຄືນແລ້ວແມ່ນບໍ່ພົບເຊື້ອ ສະນັ້ນ, ທັງ 3 ຄົນ (ນ້ຳເບີ 01 (ພະນັກງານຄຣາວພລາຊ່າ, ບ້ານຈັນສະຫວ່າງ, ເມືອງສີໂຄດຕະບອງ), ເບີ 11 (ພະນັກງານພູເບ້ຍມາຍນິ້ງ, ສັນຊາດ ປາປົວນິວກີເນຍ) ແລະ ເບີ 15 (ບ້ານຈອມມະນີ, ເມືອງໄຊເສດຖາ) ແມ່ນສາມາດໄປເຄື່ອນໄຫວວຽກງານໄດ້ຕາມປົກກະຕິ. ຍັງສືບຕໍ່ປິ່ນປົວ ຕິດຕາມຢູ່ໂຮງໝໍມິດຕະພາບຍັງພຽງແຕ່ 06 ຄົນເທົ່ານັ້ນ.

ໃນວັນທີ 08 ພຶດສະພາ 2020, ໄດ້ເກັບຕົວຢ່າງມາກວດທັງໝົດ 175 ຄົນ,ໃນນັ້ນມີກໍລະນີສົງໄສ 14 ຄົນ, ຜູ້ຕິດເຊື້ອທີ່ອອກໂຮງໝໍມິດຕະພາບ 03 ຄົນ ແລ້ວກັບມາກວດຄືນ, ຜູ້ທີ່ນອນປິ່ນປົວຕິດຕາມອາການຢູ່ໂຮງໝໍມິດຕະພາບ 06 ຄົນ ແລະ ແຮງງານລາວທີ່ກັບມາຈາກປະເທດໄທ 152 ຄົນ.

ກໍລະນີສົງໄສ 14 ຄົນແມ່ນມາຈາກສະຫວັນນະເຂດ 06 ຄົນ,ຄຳມ່ວນ 04 ຄົນ, ອຸດົມໄຊ 02 ຄົນ, ບໍລິຄຳໄຊ01 ຄົນ ແລະ ຫົວພັນ 01 ຄົນ.
ນອກຈາກນີ້, ທ່ານຍັງໄດ້ແຈ້ງໃຫ້ຊາບຕື່ມວ່າ ຕ້ອງໄດ້ສືບຕໍ່ປະຕິບັດແຈ້ງການເລກທີ 524/ຫສນຍ ນີ້ເປັນການຊົ່ວຄາວ, ການທີ່ຈະປະກາດເພີ່ມມາດຕະການຜ່ອນຜັນອື່ນໆ ຫຼັງຈາກວັນທີ 17 ພຶດສະພາ ນີ້ແມ່ນຂຶ້ນກັບພຶດຕິກຳຂອງພວກເຮົາໝົດທຸກຄົນ ເຊິ່ງຄະນະສະເພາະກິດຈະໄດ້ປະເມີນສະພາບການຄືນໃໝ່ ວ່າຄວນສືບຕໍ່ປະຕິບັດມາດຕະການຄືເກົ່ານີ້ບໍ່? ຫຼືສາມາດຜ່ອນຜັນມາດຕະການໃດໜື່ງຕື່ມອີກ.