ໂຄວິດບໍ່ທັນຊາ ໄຂ້ຍຸງດັນມາລະບາດຊໍ້າປັດຈຸບັນຕິດເຊື້ອ1,000ຄົນໃນນັ້ນເສຍຊີວິດ1ລາຍ

780

ຂປລ. ໃນປັດຈຸບັນ ຫລາຍພາກສ່ວນແມ່ນສຸມໃສ່ເພີ່ມທະວີການສະກັດກັ້ນ, ຄວບຄຸມ ແລະ ປ້ອງກັນການແຜ່ລະບາດຂອງເຊື້ອພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (ໂຄວິດ-19) ທີ່ກໍາລັງລະບາດຢູ່ໃນທົ່ວໂລກ ຈົນລືມວ່າຍັງມີອີກພະຍາດໜຶ່ງທີ່ກໍາລັງຄຸມຄາມປະຊາຊົນ ໃນທົ່ວປະເທດເຊັ່ນກັນ ໂດຍສະເພາະແມ່ນເຊື້ອພະຍາດໄຂ້ຍຸງລາຍ. ສູນຂ່າວສານການແພດສຸຂະສຶກສາ ໄດ້ໃຫ້ຮູ້ວ່າ: ນັບແຕ່ວັນທີ 28 ທັນວາ 2019-7 ພຶດສະພາ 2020 ມີຜູ້ຕິດເຊື້ອໄຂ້ຍຸງລາຍແລ້ວ1.033 ກໍລະນີ ແລະ ເສຍຊີວິດ 01 ກໍລະນີ.


ອີງຕາມການລາຍງານຂອງສູນດັ່ງກ່າວ ແຈ້ງໃຫ້ຮູ້ຕື່ມວ່າ: ນະຄອນຫລວງວຽງຈັນ ພົບຜູ້ຕິດເຊື້ອໄຂ້ຍຸງລາຍຫລາຍກວ່າໝູ່ ມີ 309 ກໍລະນີ ແລະ ເສຍຊີວິດ 1 ຄົນ, ຮອງລົງມາແມ່ນ ແຂວງ ອັດຕະປື 159 ກໍລະນີ, ວຽງຈັນ 123 ກໍລະນີ, ຄຳມ່ວນ 76 ກໍລະນີ, ບໍລິຄຳໄຊ 74 ກໍລະນີ, ສາລະວັນ 72 ກໍລະນີ

ສະຫວັນນະເຂດ 59 ກໍລະນີ, ໄຊຍະບູລີ 46 ກໍລະນີ, ເຊກອງ 41 ກໍລະນີ, ຫລວງນໍ້າທາ 28 ກໍລະນີ, ອຸດົມໄຊ 21 ກໍລະນີ, ຈຳປາສັກ ແລະ ໄຊສົມບູນ ແຂວງລະ 7 ກໍລະນີ, ຜົ້ງສາລີ 5 ກໍລະນີ ແລະ ຫລວງພະບາງ 6 ກໍລະນີ, ເຊິ່ງຈໍານວນແຂວງເຫລົ່ານີ້ ແມ່ນຍັງບໍ່ມີກໍລະນີເສຍຊີວິດ. ສໍາລັບ ແຂວງຊຽງຂວາງ, ບໍ່ແກ້ວ ແລະ ຫົວພັນ ແມ່ນຍັງບໍ່ພົບກໍລະນີຜູ້ຕິດເຊື້ອໄຂ້ຍຸງລາຍດັ່ງກ່າວ.


ເພື່ອເປັນການປ້ອງກັນພະຍາດໄຂ້ຍຸງລາຍ ບໍ່ໃຫ້ມີການແຜ່ລະບາດແຜ່ລາມເປັນວົງກວ້າງ ແລະ ບໍ່ໃຫ້ມີກໍລະນີໃໝ່ນັ້ນ ຮຽກຮ້ອງໃຫ້ປະຊາຊົນທຸກຄົນຈົ່ງເປັນເຈົ້າການ ໃນປ້ອງກັນບໍ່ໃຫ້ຍຸງລາຍກັດ ໄປຄຽງຄູ່ກັບການປະຕິບັດຫລັກການ 5ປ ທີ່ກະຊວງສາທາລະນະສຸກວາງອອກເປັນປະຈຳ ໂດຍສະເພາະທຳ ລາຍແຫລ່ງເພາະພັນໜອນນ້ຳຍຸງລາຍ “ບໍ່ມີໜອນນ້ຳ ກໍຈະບໍ່ມີຍຸງລາຍ”.