ເມືອງໂຂງ ປະກາດການຈັດຕັ້ງຫົວໜ້າ, ຮອງຫົວໜ້າຫ້ອງການ ແລະ ຜູ້ອຳນວຍການໂຮງໝໍ

628

ເພື່ອເປັນການປັບປຸງກົງຈັກການຈັດຕັ້ງໃຫ້ໄປຕາມແຕ່ລະໄລຍະ ເຂົ້າໃນການສ້າງສາພັດທະນາປະເທດຊາດບ້ານເມືອງ ເວົ້າສະເພາະກໍເພື່ອໃຫ້ສອດຄ່ອງໄປຕາມແຜນພັດທະນາເສດຖະກິດ-ສັງຄົມຂອງພັກທີ່ໄດ້ກຳນົດໄວ້; ດັ່ງນັ້ນ ມາໃນຕອນເຊົ້າວັນທີ 7 ພຶດສະພາ ນີ້ທີ່ສະໂມສອນຫ້ອງວ່າການປົກຄອງເມືອງໂຂງ ແຂວງຈຳປາສັກ ໄດ້ເປີດກອງຊຸມປະກາດການຈັດຕັ້ງຫົວໜ້າ, ຮອງຫົວໜ້າ ແລະ ຜູ້ອຳນວຍການໂຮງໝໍເມືອງຢ່າງເປັນທາງການໂດຍໃຫ້ກຽດເຂົ້າຮ່ວມເປັນສັກຂີພະຍານຂອງທ່ານນາງ ຄຳພູ ລິດທິສັກ ເລຂາພັກເມືອງ ເຈົ້າເມືອງໆໂຂງ, ມີບັນດາທ່ານໃນຄະນະປະຈຳພັກເມືອງ, ກຳມະການພັກເມືອງ, ຫົວໜ້າຫ້ອງ, ຮອງຫ້ອງການ ແລະ ພະນັກງານວິຊາການແຕ່ລະຫ້ອງເຂົ້າຮ່ວມຢ່າງພ້ອມພຽງ.


ໂອກາດນີ້ທ່ານ ຄຳສິງ ບຸນຈະເລີນ ຄະນະປະຈຳພັກເມືອງ ຫົວໜ້າຄະນະຈັດຕັ້ງເມືອງໄດ້ຂຶ້ນຜ່ານມະຕິຕົລົງ, ຂໍ້ຕົກລົງຂອງທ່ານເຈົ້າເມືອງໆໂຂງວ່າດ້ວຍການແຕ່ງຕັ້ງຫົວໜ້າ-ຮອງຫົວໜ້າຫ້ອງການຄື: ແຕ່ງ ຕັ້ງທ່ານ ສະເຫຼີມໄຊ ແສງສຸລິຍະວົງ ເປັນຫົວໜ້າຫ້ອງການ-ການເງິນເມືອງ, ແຕ່່ງຕັ້ງທ່ານ ດຣ ບຸນລ້ຽງ ຈັນສີລາ ເປັນອຳນວຍການໂຮງໝໍເມືອງ, ແຕ່ງຕັ້ງທ່ານ ດຣ ແສນປະເສີດ ອອມຊັບ ເປັນຮອງອຳນວຍການໂຮງໝໍ, ແຕ່ງຕັ້ງທ່ານ ທອງໃສ ສິມຈະເລີນ ເປັນຫົວໜ້າຫ້ອງການກະສິກຳ-ປ່າໄມ້ເມືອງ, ທ່ານ ບັນດິດ ສິງຫາທຳ ແລະ ທ່ານ ພົງສະຫວັດ ກິສຸວັນນະລາດ ເປັນຮອງຫົວໜ້າຫ້ອງການກະສິກຳ-ປ່າໄມ້ເມືອງ, ແຕ່ງຕັ້ງທ່ານ ອະນຸແສງ ຈັນທະລາວົງ ເປັນຫົວໜ້າຫ້ອງການແຮງງານ ແລະ ສະຫວັດດີການສັງຄົມ, ແຕ່ງຕັ້ງທ່ານ ສົມສະໜຸກ ຫອມກິ່ງແກ້ວ ເປັນຫົວໜ້າຫ້ອງວ່າການປົກຄອງເມືອງ, ແຕ່ງຕັ້ງທ່ານ ເພັດນະຄອນ ເທບສຸວັນ ເປັນຮອງຫົວໜ້າຫ້ອງວ່າການປົກຄອງເມືອງ, ແຕ່ງຕັ້ງທ່ານ ໜູຮັກ ສິງຈັນທະລາດ ເປັນຫົວໜ້າຫ້ອງການຊັບພະຍາກອນທຳມະຊາດ-ສິ່ງແວດລ້ອມເມືອງ.

ຈາກນັ້ນ ໃນພິທີຍັງໄດ້ຜ່ານມະຕິຕົກລົງຂອງຄະນະປະຈຳພັກເມືອງວ່າດ້ວຍການແຕ່ງຕັ້ງຫົວໜ້າຄະນະໂຄສະນາອົບຮົມເມືອງ ແລະ ມະຕິຕົກລົງຂອງຄະນະປະຈຳພັກເມືອງວ່າດ້ວຍການແຕ່ງຕັ້ງຮອງປະທານສະຫະພັນກຳມະບານເມືອງ; ໃນນີ້ ແຕ່ງຕັ້ງສະຫາຍ ຄຳພອນ ພົມໂສພາ ເປັນຫົວໜ້າຄະນະໂຄສະນາອົບຮົມເມືອງ, ແຕ່ງຕັ້ງສະຫາຍ ອິນແປງ ພາວັນນະສຸກ ເປັນຮອງປະທານສະຫະພັນກຳມະບານເມືອງ.

ຂ່າວໂດຍ: ພຸດທະສິນ ວົງວິໄລທອງ