ການນຳເມືອງຕະໂອ້ຍມອບເຄື່ອງຊ່ວຍເຫຼືອຜູ້ທີ່ໄດ້ຮັບຜົນກະທົບຈາກອັກຄີໄຟຢູ່ບ້ານຕຸ້ມລີທົ່ງ

466

ວັນທີ 7 ພຶດສະພາ 2020 ຄະນະນຳເມືອງຕະໂອ້ຍ ໄດ້ລົງຕິດຕາມ ແລະ ນຳເອົາເຄື່ອງຊ່ວຍເຫຼືອໄປມອບໃຫ້ແກ່ຄອບຄົວຜູ້ປະສົບເຄາະຮ້າຍ ທີ່ເກີດຈາກອັກຄີໄພ (ໄຟໄໝ້ເຮືອນ) ແລະໃຫ້ກໍາລັງໃຈ, ນໍາໂດຍ: ທ່ານ ເພັດສະໝອນ ຫຼວງລາດ ຮອງເຈົ້າເມືອງໆຕະໂອ້ຍ ຜູ້ຊີ້ນຳຂົງເຂດວຽກງານວັດທະນະທຳ-ສັງຄົມ, ມີ ທ່ານ ແສງວັນ ວົງໃສຈິດ ຫົວໜ້າຫ້ອງການແຮງງານ ແລະ ສະຫວັດດີການສັງຄົມເມືອງ ພ້ອມດ້ວຍຄະນະ. ຕໍ່ກັບເຫດການດັ່ງກ່າວແມ່ນໄດ້ເກີດຂຶ້ນໃນຕອນແລງຂອງວັນທີ 6 ພຶດສະພານີ້ ໄຟໄດ້ລຸກລາມໄໝ້ເຮືອນ 1 ຫຼັງ (ໝົດກ້ຽງ), ເຊີ່ງເປັນເຮືອນໄມ້, ມີທັງໝົດ 4 ຄອບຄົວ. ຄາດຄະເນມູນຄ່າເສຍຫາຍເບື້ອງຕົ້ນ 30 ລ້ານກວ່າກີບ.

ຈາກນັ້ນ, ອົງການປົກຄອງເມືອງຕະໂອ້ຍ ກໍ່ໄດ້ຮີບຮ້ອນນຳເອົາເຄື່ອງໄປມອບໃຫ້ ເພື່ອຊ່ວຍເຫຼຶືອໃນເບື້ອງຕົ້ນ ແລະ ເພື່ອບັນເທົາທຸກໃຫ້ແກ່ຄອບຄົວດັ່ງກ່າວ, ເຊີ່ງມີເຄື່ອງແຕ່ງຢູ່ຄົວກິນ, ອາຫານແຫ້ງ, ເຄື່ອງນຸ່ງຮົ່ມ ແລະ ເຄື່ອງໃຊ້ຕ່າງໆຈຳນວນໜຶ່ງ ທີ່ຈໍາເປັນ ມູນຄ່າ 2 ລ້ານກວ່າກີບ.


ໂອກາດດຽວກັນນັ້ນ, ທ່ານຮອງເຈົ້າເມືອງໆຕະໂອ້ຍ ກໍ່ໄດ້ສະແດງຄວາມເສຍໃຈຕໍ່ກັບເຫດການດັ່ງກ່າວ ແລະ ໃຫ້ກຳລັງຕໍ່ກັບຄອບຄົວຜູ້ທີ່ປະສົບເຄາະຮ້າຍໃນຄັ້ງນີ້ ແລະ ເອົາໃຈໃສ່ຕິດຕາມ, ເບີ່ງແຍງໃຫ້ການຊ່ວຍເຫຼືອໃນຕໍ່ໜ້າຕື່ມອີກ, ນອກນັ້ນ, ອຳນາດການປົກຄອງບ້ານ ຕ້ອງໄດ້ເອົາໃຈໃສ່ເບີ່ງແຍງ, ຊ່ວຍເຫຼືອເຊີ່ງກັນ ແລະ ກັນ ເປັນຕົ້ນ: ທີ່ຢູ່ພັກເຊົາ ແລະ ອື່ນໆໃນຂັ້ນເບື້ອງຕົ້ນ. ທ່ານຍັງໄດ້ທຸກຄົນ, ທຸກຄອບຄົວ ເປັນເຈົ້າການຕິດຕາມ, ມີສະຕິລະວັງຕົວ ແລະ ຮັກສາຄວາມປອດໄພ ໃນເຮືອນຊານຂອງຕົນ ກ່ອນຈະອອກໄປປະຕິບັດໜ້າທີ່, ໂດຍສະເພາະແມ່ນການຊົມໃຊ້ພືນໄຟ ເພື່ອຄວາມປອດໄພຕໍ່ຊີວິດ ແລະ ຊັບສິນຂອງປະຊາຊົນ.
ໂດຍ: ກິລິຍາ ຄຳຫຼ້າວິຍາເກດ (ນັກຂ່າວເມືອງຕະໂອ້ຍ)