ເຈົ້າແຂວງອັດຕະປື ລົງຊຸກຍູ້ຟື້ນຟູເນື້ອທີ່ການຜະລິດຢູ່ ເມືອງສະໜາມໄຊ

577

ວັນທີ 7 ພຶດສະພາ 2020, ທ່ານ ເລັດ ໄຊຍະພອນ ເລຂາພັກແຂວງ-ເຈົ້າແຂວງອັດຕະປື ພ້ອມດ້ວຍພາກ ສ່ວນກ່ຽວຂ້ອງຂອງແຂວງ ແລະ ອໍານາດການປົກຄອງເມືອງສະໜາມໄຊ ໄດ້ລົງເຄື່ອນໄຫວຊຸກຍູ້ເຂດຟື້ນຟູ ພື້ນທີ່ການຜະລິດ ທີ່ໄດ້ຮັບຜົນກະທົບຈາກເຂື່ອນໄຟຟ້າເຊປຽນ-ເຊນໍ້ານ້ອຍແຕກໃນໄລຍະຜ່ານມາ, ເປັນຕົ້ນແມ່ນການ ຟື້ນຟູດິນນາ, ດິນສວນ, ຄອງຊົນລະປະທານ, ລວມທັງການບຸກເບີກເນື້ອທີ່ການຜະລິດໃໝ່ ເພື່ອຕອບສະໜອງເນື້ອທີ່ ການຜະລິດໃຫ້ປະຊາຊົນໄດ້ຢ່າງພຽງພໍ, ສາມາດລົງມືຜະລິດໃຫ້ທັນກັບລະດູການ ແລະ ສາມາດຜະລິດເປັນຄ້າໄດ້ໃຫ້ ຫຼາຍຂື້ນ.

ການລົງເຄື່ອນໄຫວຄັ້ງນີ້ ແມ່ນໄດ້ເນັ້ນຈຸດຟື້ນຟູດິນນາໃຫ້ປະຊາຊົນຢູ່ເຂດດອນບົກ-ທ່າແສງຈັນ; ເບິ່ງຈຸດຟື້ນຟູປັບປຸງຊົນລະປະທານຫ້ວຍສະໝອງ ແລະ ໄດ້ລົງມອບແນວພັນເຂົ້າ ໃຫ້ແກ່ປະຊາຊົນຢູ່ສູນພັກເຊົາບ້ານ ປິນດົງ ໃນເບື້ອງຕົ້ນ ຈໍານວນ 4 ໂຕນ.

ໂອກາດການລົງຊຸກຍູ້ຄັ້ງນີ້ ທ່ານ ເລັດ ໄຊຍະພອນ ເລຂາພັກແຂວງ-ເຈົ້າແຂວງອັດຕະປື ໄດ້ຮຽກຮ້ອງ ແລະ ໃຫ້ທິດຊີ້ນໍາແກ່ອໍານາດການປົກຄອງເມືອງສະໜາມໄຊ ໃຫ້ເພີ່ມທະວີເອົາໃຈໃສ່ຊຸກຍູ້ ຕິດຕາມວຽກ ງານແກ້ໄຂ ແລະ ຟື້ນຟູຜົນກະທົບ ຈາກເຂື່ອນໄຟຟ້າເຊປຽນ-ເຊນໍ້ານ້ອຍແຕກ ເພື່ອໃຫ້ມີຄວາມຄືບໜ້າ ແລະ ມີຜົນ ສໍາເລັດຕາມຄາດໝາຍທີ່ວ່າງໄວ້ໂດຍໄວ, ເອົາໃຈໃສ່ຊຸກຍູ້ໃຫ້ພໍ່ແມ່ປະຊາຊົນໄດ້ມີອາຊີບເຮັດ, ໄດ້ລົງມືເຮັດການຜະ ລິດທັນລະດູການ, ເຂົ້າຮ່ວມກຸ່ມການຜະລິດ ແລະ ຜະລິດໃຫ້ຫຼາຍຂື້ນກາຍເປັນສິນຄ້າ, ເພື່ອໃຫ້ປະຊາຊົນສາມາດກຸ້ມ ຕົນເອງໄດ້ ແລະ ໄດ້ພັດທະນາຊີວິດການເປັນຢູ່ຂອງຄອບຄົວໃຫ້ດີຂື້ນກວ່າເກົ່າ. ພ້ອມນັ້ນ ຍັງໄດ້ຮຽກຮ້ອງໃຫ້ເອົາໃຈໃສ່ ແກ້ໄຂປະກົດການຍໍ້ທໍ້ທີ່ເກີດຂື້ນຢູ່ເມືອງສະໜາມໄຊ ໂດຍສະເພາະສະພາບລັກລອບຂຸດຄົ້ນຊັບພະຍາກອນທໍາມະຊາດ ແບບຜິດກົດໝາຍ, ເຊິ່ງໃຫ້ອໍານາດການປົກຄອງເມືອງ ເອົາໃຈໃສ່ແກ້ໄຂ ຢ່າງຈິງຈັງ ປະຕິບັດຕາມຂັ້ນຕອນ ແລະ ລະບຽດກົດໝາຍ ເພື່ອໃຫ້ປະກົດການຍໍ້ທໍ້ຫຼຸດລົງເທື່ອລະກ້າວ.
ຂ່າວ:ໂບ້