ການສັນຈອນໄປ-ມາ ໃນເທດສະບານຕົວເມືອງຫ້ວຍຊາຍ ເລີ່ມເຂົ້າສູ່ສະພາບປົກກະຕິ.

617

ບັນຍາກາດສະພາບການສັນຈອນໄປ-ມາຂອງປະຊາຊົນໃນເທດສະບານຕົວເມືອງຫ້ວຍຊາຍ ແຂວງບໍ່ແກ້ວ ເລີ່ມຄຶກຄັກເຂົ້າສູ່ສະພາບປົກກະຕິ. ພາຍຫຼັງທີ່ລັດຖະບານໄດ້ຍົກລະດັບໃນການເພີ່ມທະວີມາດຕະການເພື່ອປ້ອງກັນ, ສະກັດກັ້ນ, ຄວບຄຸມ ແລະ ຕ້ານການແຜ່ລະບາດຂອງພະຍາດໂຄວິດ-19 ມາເປັນເວລາ 1 ເດືອນກວ່າ.

ສໍາລັແຂວງບໍ່ແກ້ວ, ໃນນັບແຕ່ວັນທີ 2 ພຶດສະພາ ຜ່ານມາ ເຈົ້າແຂວງບໍ່ແກ້ວໄດ້ອອກແຈ້ງການແນະນໍາ ວ່າດ້ວຍການສືບຕໍ່ປະຕິບັດມາດຕະການໃນການປ້ອງກັນຄວບຄຸມ ສະກັດກັ້ນ ແລະ ແກ້ໄຂການລະບາດຂອງພະຍາດດັ່ງກ້າວອອກໄປຕື່ມ 4-17 ພຶດສະພາ 2020, ແຕ່ໄດ້ອະນຸຍາດໃຫ້ສໍານັກງານອົງການຂອງລັດ, ບໍລິສັດເປີດດຳເນີນກິດຈະການ ໂດຍໃຫ້ພະນັກງານ-ລັດຖະກອນໝູນວຽນກັນມາເຮັດວຽກເປັນປົກກະຕິ. ຂະນະດຽວກັນ, ກໍ່ອະນຸຍາດໃຫ້ປະຊາຊົນສາມາດເດີນທາງໄປມາພາຍໃນເມືອງ ແລະ ພາຍໃນແຂວງບໍ່ແກ້ວ ຕາມຄວາມຈໍາເປັນ, ແຕ່ໃຫ້ຈໍາກັດຄົນ ແລະ ຮັກສາໄລຍະຫ່າງ 1 ແມັດ.

ມາຮອດປັດຈຸບັນ, ເຫັນວ່າມີປະຊາຊົນຈໍານວນຫຼາຍໄດ້ອອກຈາກເຮືອນໄປເຮັດວຽກເພື່ອທໍາມາຫາກິນ, ຄ້າຂາຍ ຫຼື  ທໍາການຜະລິດ, ແຕ່ໃຫ້ສືບຕໍ່ປະຕິບັດມາດຕະການຢ່າງເຂັ້ມງວດ ດ້ວຍການຫ້າມບຸກຄົນເດີນທາງໄປຕ່າງແຂວງ ຫຼື ເຂົ້າມາໃນແຂວງບໍ່ແກ້ວ; ຍົກເວັ້ນການໄປເຮັດວຽກທາງການ, ນັກທຸລະກິດ, ການເຈັບເປັນ, ການຂົນສົ່ງສິນຄ້າ.

ຄຽງຄູ່ກັນນັ້ນ, ຍັງສືບຕໍ່ປິດກິດຈະການຮ້ານບັນເທີງ, ຮ້ານຄາຣາໂອເກະ, ຮ້ານບໍລິຫານນວດ, ຕະຫຼາດກາງຄືນ, ສະຖານທີ່ອອກກຳລັງກາຍ-ຫຼິ້ນກິລາໃນຮົມ, ກິດຈະກຳສ້າງສັນ ຫຼື ງານເຕົ້າໂຮມຄົນຈໍານວນຫຼາຍ ພ້ອມທັງໃຫ້ປິດດ່ານປະເພນີ, ດ່ານທ້ອງຖິ່ນ ແລະ ດ່ານສາກົນໃນການເຂົ້າ-ອອກ; ເວັ້ນແຕ່ຜູ້ທີ່ໄດ້ຮັບອະນຸຍາດ, ໂຈະການອອກວິຊາການທຸກປະເພດໃຫ້ບຸກຄົນທົ່ວໄປທີ່ເດີນທາງຈາກຕ່າງປະເທດ ແລະ ປະຕິບັດຕາມຄຳສັ່ງຂອງຂັ້ນເທິງວາງອອກຢ່າງເຂັ້ມງວດ.

(ເນື້ອໃນ-ພາບ: ເງິນຫຼົງ)