ແຕ່ງຕັ້ງ ທ່ານ ສຸດສັກສິດ ຍິດແສນຫວັງ ເປັນຫົວໜ້າຫ້ອງວ່າການປົກຄອງເມືອງກະລຶມ.

625

ໂດຍປະຕິບັດຕາມຂໍ້ຕົກລົງຂອງທ່ານເຈົ້າເມືອງ ສະບັບເລກທີ 154/ຈມກລ, ວ່າດ້ວຍຍົກຍ້າຍຫົວໜ້າຫ້ອງວ່າການລະຫວ່າງຜູ້ເກົ່າ ແລະ ຜູ້ໃໝ່ ລະຫວ່າງ ທ່ານ ຄຳແກ້ວ ຈະເລີນສຸກ ຫົວໜ້າຫ້ອງວ່າການເມືອງກະລຶມ (ຜູ້ເກົ່າ) ກັບ ທ່ານ ສຸດສັກສິດ ຍິດແສນຫວັງ ຫົວໜ້າຫ້ອງການຖະແຫຼງຂ່າວ, ວັດທະນະທຳ ແລະ ທ່ອງທ່ຽວເມືອງກະລຶມ ມາຮັບໜ້າທີ່ໃໝ່ເປັນຫົວໜ້າຫ້ອງວ່າການເມືອງກະລຶມ (ຜູ້ໃໝ່). ພາຍໃຕ້ການເປັນປະທານຂອງທ່ານ ອໍບົວລາ ອ່ອນມະໄລວົງ ເຈົ້າເມືອງກະລຶມ, ມີບັນດາຄະນະພັກ, ຄະນະນຳຂັ້ນເມືອງຕະຫຼອດຮອດພະນັກງານຫ້ອງການອ້ອມຂ້າງເຂົ້າຮ່ວມ.

ໃນພິທີ, ຫົວໜ້າຫ້ອງວ່າການປົກຄອງເມືອງ ( ຜູ້ເກົ່າ) ກໍ່ໄດ້ຂຶ້ນຜ່ານບົດສະຫຼຸບການເຄື່ອນໄຫວວຽກງານຂອງຫ້ອງວ່າການເມືອງໃນໄລຍະຜ່ານມາ ເຊິ່ງຍົກໃຫ້ເຫັນຜົນງານດ້ານດີ, ຂໍ້ຄົງຄ້າງ ແລະ ບາງບົດຮຽນທີ່ຖອດຖອນໄດ້ເພື່ອປັບປຸງແກ້ໄຂໃຫ້ດີຂຶ້ນໃນຕໍ່ໜ້າ ພ້ອມນີ້ກໍໄດ້ເຊັນມອບ-ຮັບ ໜ້າທີ່ວຽກງານ ລະຫວ່າງຜູ້ເກົ່າ ແລະ ຜູ້ໃໝ່ ຢ່າງເປັນທາງການ.

ໂອກາດນີ້, ທ່ານ ອໍບົວລາ ອ່ອນມະໄລວົງ ເຈົ້າເມືອງກະລຶມ ກໍໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຫ້ອງວ່າການປົກຄອງເມືອງຊຸດເກົ່າທີ່ຍາດມາໄດ້ຜົນງານໃນຫຼາຍໆດ້ານ.

ຄຽງຄູ່ກັນນັ້ນ, ກໍໄດ້ໃຫ້ທິດຊີ້ນຳຫຼາຍບັນຫາຕໍ່ຜູ້ທີ່ມາຮັບໜ້າໃໝ່ ເປັນຕົ້ນແມ່ນໃຫ້ມີຄວາມຮັບຜິດຊອບໜ້າວຽກງານຂອງຕົນທີ່ພັກ-ລັດມອບໝາຍໃຫ້ສຳເລັດຜົນ, ມີການແບ່ງງານ – ແບ່ງຄວາມຮັບຜິດຊອບໃນໝູ່ຄະນະຢ່າງຈະແຈ້ງ, ການຄຸ້ມຄອງບັນດາເອກະສານ, ນິຕິກຳຕ່າງໆໃຫ້ເປັນລະບຽບຮຽບຮ້ອຍ, ສືບຕໍ່ຈັດຕັ້ງປະຕິບັນດາໜ້າວຽກງານທີ່ຍັງຄົງຄ້າງໃຫ້ມີຜົນສຳເລັດຕາມລະດັບຄາດໝາຍ. ພິທີດັ່ງກ່າວ, ຈັດຂຶ້ນໃນວັນທີ 5 ພຶດສະພາຜ່ານມາຢູ່ທີ່ສະໂມສອນຫ້ອງວ່າການເມືອງກະລຶມ ແຂວງເຊກອງ.

(ເນື້ອໃນ-ພາບ: ຄຳເພົ້າ ຮຸ່ງໄຊຍະວົງ)