ເມືອງແກ່ນທ້າວ ເປີດຂະບວນການຕ້ານພະຍາດໄຂ້ຍຸງລາຍ

658

ພິທີ ເປີດຂະບວນການຕ້ານພະຍາດໄຂ້ຍຸງລາຍ ຂອງເມືອງແກ່ນທ້າວ ແຂວງໄຊຍະບູລີ ໄດ້ຈັດຂຶ້້ນໃນຕອນເຊົ້າມື້ນີ້(ວັນທີ 7 ພຶດສະພາ 2020) ຢູ່ທີ່ບ້ານຫ້ວຍຕໍ. ໂດຍການເປັນກຽດເຂົ້າຮ່ວມຂອງທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ, ທ່ານ ອໍາຄາ ລັດສະໝີ ເຈົ້າເມືອງໆແກ່ນທ້າວ, ມີຮອງເຈົ້າເມືອງ, ທີມງານຂອງແຂວງ, ຫົວໜ້າ-ຮອງຫົວໜ້າຫ້ອງການສາທາລະນະສຸກ, ຜູ້ຊີ້ນໍາບ້ານ, ນາຍບ້ານ, ຮອງນາຍບ້ານ ແລະ ປະຊາຊົນພາຍໃນບ້ານຫ້ວຍຕໍເຂົ້າຮ່ວມຢ່າງຫຼວງຫຼາຍ.

ໃນພິທີ ທ່ານ ຂຸນພຽນ ແກ້ວມະນີ ນາຍບ້ານໆຫ້ວຍຕໍ ໄດ້ລາຍງານການປ້ອງກັນພະຍາດໄຂ້ຍຸງລາຍຢູ່ພາຍໃນບ້ານ ເຊິ່ງບ້ານຫ້ວຍຕໍແມ່ນບ້ານໜຶ່ງ ໃນຈໍານວນ 47 ບ້ານຂອງເມືອງ ເປັນບ້ານຕັ້ງຢູ່ເທດສະບານເມືອງ ມີ 240 ກວ່າຄອບຄົວ, ມີພົນລະເມືອງ 1.200 ກວ່າຄົນ, ຍິງ 590 ກວ່າຄົນ ຕໍ່ກັບການປ້ອງກັນພະຍາດໄຂ້ຍຸງລາຍ ແລະ ການປ້ອງກັນພະຍາດໂຄວິດ-19 ພາຍໃນບ້ານ ໄດ້ແຕ່ງຕັ້ງຄະນະກໍາມະການຮັກສາສຸຂະພາບຂັ້ນບ້ານ ໂດຍມີຮອງນາຍບ້ານເປັນຫົວໜ້າ ແລະ ປະກອບມີຊາວໜຸ່ມ, ແມ່ຍິງ,ແນວໂຮມ, ອສບ ແລະ ໝໍຕໍາແຍ ເປັນຄະນະ. ໃນປີຜ່ານມາພາຍໃນບ້ານມີຜູ້ເປັນໄຂ້ເລືອດອອກ 16 ຄົນ, ຍິງ 8 ຄົນ

ມາຮອດປັດຈຸບັນນີ້ໄດ້ສ້າງຂະບວນການອະນາໄມບ້ານເດືອນລະ 2 ຄັ້ງ,ກວດໜອນນໍ້າຍຸງລາຍໂດຍສົບທົບກັບຫ້ອງການສາທາລະນະສຸກເມືອງ ອາທິດລະຄັ້ງ ແລະ ໄດ້ຈັດຕັ້ງປະຕິບັດ 5 ປໍ ເປັນປົກກະຕິ


ໃນພິທີ ຍັງໄດ້ຮັບຟັງການໂອ້ລົມຂອງທ່ານ ນາງ ບຸນພັກ ອິນທະປັນຍາ ຮອງເຈົ້າແຂວງໄຊຍະບູລີ ເຊິ່ງທ່ານໄດ້ຍົກໃຫ້ເຫັນຜົນຮ້າຍຂອງພະຍາດດັ່ງກ່າວ. ພ້ອມທັງໃຫ້ເອົາໃຈໃສ່ປະຕິບັດ 5 ປໍ ເພື່ອປ້ອງກັນບໍ່ໃຫ້ເກີດພະຍາດໄຂ້ເລືອດອອກ ແລະ ໃຫ້ເອົາໃຈໃສ່ປະຕິບັດຄໍາສັ່ງຂອງທ່ານນາຍົກ, ຂອງສູນກາງ, ຂອງແຂວງ, ຂອງເມືອງ, ຂອງຄະນະສະເພາະກິດຂັ້ນແຂວງ ແລະ ຂັ້ນເມືອງຢ່າງເຂັ້ມງວດ. ຈາກນັ້ນ, ໄດ້ເປີດຂະບວນການອະນາໄມ ເພື່ອປ້ອງກັນພະຍາດໄຂ້ຍຸງລາຍຢ່າງເປັນທາງການ ພ້ອມທັງອະນາໄມຕາມແຄມທາງເພື່ອທໍາລາຍແຫຼ່ງເພາະພັນຂອງຍຸງ