ທຄຕລ ສາຂາອັດຕະປື ມອບຜ້າອັດປາກ ມູນຄ່າ 3 ລ້ານກີບ ຊ່ວຍປ້ອງກັນພະຍາດໂຄວິດ-19

561

ໃນຕອນເຊົ້າຂອງວັນທີ 06 ພຶດສະພາ 2020 ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງອັດຕະປື ໄດ້ມອບຜ້າອັດປາກ (MASK) ຈຳນວນ 20 ກັບ ລວມມູນຄ່າ 3 ລ້ານກີບ ຊ່ວຍເຫຼືອແຂວງອັດຕະປື ເພື່ອນໍາໃຊ້ເຂົ້າໃນວຽກງານສະກັດກັ້ນ ແລະ ຄວບຄຸມການແຜ່ລະບາດຂອງພະຍາດໂຄວິດ-19.

ພິທີມອບ-ຮັບເຄື່ອງຊ່ວຍເຫຼືອດັ່ງກ່າວ ແມ່ນໄດ້ຈັດຂຶ້ນທີ່ພະແນກສາທາລະນະສຸກແຂວງອັດຕະປື ເຊິ່ງມອບໂດຍ ທ່ານ ພູມະໂນ ລາຊະຈັກ ຫົວໜ້າທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງອັດຕະປື ແລະ ຮັບໂດຍ ທ່ານ ດຣ ນາງ ອອ່ນຜີວ ໂພທິລາດ ຫົວໜ້າພະແນກສາທາລະນະສຸກແຂວງ, ທັງເປັນຮອງປະທານຄະນະສະເພາະກິດປ້ອງກັນ ແລະ ຄວບຄຸມພະຍາດ ໂຄວິດ – 19 (COVID-19) ພ້ອມດ້ວຍຄະນະນຳທັງສອງຝ່າຍເຂົ້າຮ່ວມ.

ໃນໂອກາດດັ່ງກ່າວ, ທ່ານ ດຣ ນາງ ອອ່ນຜີວ ໂພທິລາດ ຫົວໜ້າພະແນກສາທາລະນະສຸກແຂວງ ຕາງໜ້າໃຫ້ອໍານາດການປົກຄອງແຂວງ ໄດ້ຂຶ້ນມອບໃບຍ້ອງຍໍໃຫ້ທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງ ອັດຕະປື ພ້ອມນັ້ນທ່ານໄດ້ສະແດງຄວາມຂອບໃຈມາຍັງທະນາຄານການຄ້າຕ່າງປະເທດລາວ ມະຫາຊົນ ສາຂາ ແຂວງອັດຕະປື ທີ່ມີຄວາມເປັນຫ່ວງເປັນໃຍຕໍ່ຊີວິດສຸຂະພາບຂອງປະຊາຊົນພາຍໃນແຂວງອັດຕະປື ແລະ ຕາງໜ້າປະຊາຊົນ ກໍ່ຄືພະນັກງານແພດໝໍພາຍໃນແຂວງອັດຕະປື ຂອບໃຈມາຍັງທ່ານທີ່ນຳເອົາຜ້າອັດປາກມາຊ່ວຍເຫຼືອເພື່ອປ້ອງກັນພະຍາດໂຄວິດ-19 ໃນຄັ້ງນີ້ ແລະ ຈະນໍາໃຊ້ເຄື່ອງດັ່ງກ່າວໃຫ້ເກີດປະໂຫຍດສູງສຸດ.

ໂດຍ: ສຸກສະໄໝ ສທຂ