ເມືອງໂຂງ ມີຈຳນວນແຮງງານອອກຈາກສູນກັກກັນ 3.269 ຄົນ

600

ພາຍຫຼັງທີ່ປະຕິບັດເລກທີ 06/ນຍ ຄົບກຳນົດ 14 ວັນຄະນະກຳມະການສະເພາະກິດເມືອງໂຂງ ແຂວງຈຳປາສັກ ໄດ້ເປີດເຜີຍເມື່ອວັນທີ 6 ພຶດສະພາ ນີ້ວ່າ: ປັດຈຸບັນໄດ້ມີປະຊາຊົນທີ່ໄປແຮງງານຢູ່ຕ່າງປະເທດມີຈຳນວນທັງໝົດ 10.346 ຄົນ, ຍິງ 5.584 ຄົນ; ໃນນີ້ ໄດ້ມີແຮງງານຈຳນວນບໍໜ້ອຍກັບມາຈາກການໄປອອກແຮງງານຢູ່ຕ່າງປະເທດ ພາຍຫຼັງທີ່ໄດ້ພົບກັບບັນຫາການລະບາດຂອງເຊື້ອພະຍາດໂຄວິດ 19 ມີຈຳນວນແຮງງານທີ່ກັບຄືນມາ 3.271 ຄົນ, ຍິງ 1.567 ຄົນ ແລະ ມີຜູ້ກັກກັນຕົນເອງຢູ່ເຮືອນ (ແຍກດ່ຽວ) ແລະ ຢູ່ສູນຄົບຕາມກຳນົດ 14 ວັນແລ້ວໄດ້ກັບເມືອເຮືອນມີຈຳນວນ 3.269 ຄົນ, ຍິງ 1.566 ຄົນ ຫຼືພຽງ 2 ຄົນເປັນຍິງ 1 ຄົນທີ່ຍັງສືບຕໍ່ກັກກັນຕົນເອງຕາມຄຳສັ່ງ.


ທ່ານ ຄຳສຸກ ຈັນທະວົງ ຮອງເຈົ້າເມືອງໆໂຂງ ເປີດເຜີຍຕໍ່ທ່ານ ສຈ.ດຣ ພອນເທບ ພົນເສນາ ອາສາສະໝັກຊ່ຽວຊານດ້ານການແພດອາວຸໂສ ທັງເປັນທີ່ປຶກສາການນຳຂອງແຂວງໃນວຽກງານສາທາລະນະສຸກ ພ້ອມຄະນະ ໂອກາດເຄື່ອນໄຫວເຮັດວຽກປະເມີນການຈັດຕັ້ງປະຕິບັດວຽກງານຕ້ານພະຍາດໂຄວິດ 19 ຢູ່ຂັ້ນບ້ານພາຍໃນເມືອງໂຂງຢູ່ທີ່ຫ້ອງປະຊຸມຫ້ອງວ່າການປົກຄອງເມືອງ; ນັບແຕ່ລັດຖະບານ ສປປ ລາວໄດ້ຍົກລະດັບການເຝົ້າລະວັງເຊື້ອພະຍາດໂຄວິດ 19 ຂຶ້ນສູ່ລະດັບໃໝ່ ໂດຍສະເພາະນັບແຕ່ວັນທີ 1-19 ເມສາ ເມືອງກໍໄດ້ຮັບນິຕິກຳຕ່າງໆຈາກສູນກາງ ແລະ ແຂວງ ກໍໄດ້ຈັດຕັ້ງຜັນຂະຫຍາຍອອກເປັນນິຕິກຳຂອງເມືອງ ແລ້ວສົ່ງໃຫ້ບັນດາຫ້ອງການ, ກົມກອງ, ກຸ່ມບ້ານ ແລະ ບ້ານ ນຳໄປຈັດຕັ້ງປະຕິບັດເຜີຍແຜ່ໃຫ້ພໍ່ແມ່ປະຊາຊົນໃນທົ່ວສັງຄົມໄດ້ຮັບຮູ້ຢ່າງກວ້າງຂວາງ

ພ້ອມນັ້ນກໍ່ໄດ້ນຳໃຊ້ສື່ສານມວນຊົນພາຍໃນເມືອງທີ່ມີກໍຄືສະຖານີວິທະຍຸ-ໂທລະພາບ ແລະ ໂທລະໂຄ່ງແຕ່ລະບ້ານ,​ ລົດຕິດຕັ້ງເຄື່ອງສຽງແລ້ວປະກາດໄປຕາມຖະໜົນ ໃນການຜັນຂະຫຍາຍນິຕິກຳຕ່າງໆຂອງເມືອງເພື່ອໃຫ້ເຂົ້າເຖິງປະຊາຊົນທຸກຊັ້ນຄົນ. ຈາກນັ້ນແມ່ນໄດ້ກະກຽມສະຖານທີ່ຮອງຮັບການກວດກາ ແລະ ຕັ້ງສູນກັກກັນໃນກໍລະນີມີອາການສົງໃສຢູ່ຂັ້ນເມືອງ 1 ແຫ່ງໂດຍນຳໃຊ້ເຮືອນຮັບແຂກຂອງເມືອງ, ມີ 5 ຫ້ອງນອນ (5 ຕຽງນອນ), ກຳນົດໄວ້ 70 ສູນໂດຍນຳໃຊ້ໂຮງຮຽນ ມຕ ແລະ ໂຮງຮຽນ ມສ, ບາງກຸ່ມບ້ານກໍນຳໃຊ້ຖຽງນາ ແລະ ເຮືອນທີ່ບໍ່ມີຄົນພັກອາໃສເປັນສະຖານທີ່ກັກກັນ.

ຂ່າວໃຫ້ຮູ້ຕື່ມວ່າ: ໃນຕອນເຊົ້າຂອງວັນດຽວກັນທ່ານ ສຈ.ດຣ ພອນເທບ ພົນເສນາ ພ້ອມຄະນະ ກໍໄດ້ເດີນທາງລົງເຄື່ອນໄຫວເຮັດວຽກຢູ່ຈຸດຫົວໂຂງ ຊຶ່ງມີຄະນະສະເພາະກິດຂັ້ນບ້ານເຂົ້າຮ່ວມມີ 5 ບ້ານຄື: ຫົວໂຂງ, ຫາງສັນ, ແສນລ່າມ, ດົງ ແລະ ບ້ານເວີນທອງ; ພາຍຫຼັງສຳເລັດກໍໄດ້ເດີນທາງໄປເຮັດວຽກຢູ່ກຸ່ມບ້ານຫາດຊາຍຄູນ ມີຄະນະສະເພາະກິດຂັ້ນບ້ານເຂົ້າຮ່ວມຄື: ຫາດຊາດຄູນ, ຫ້ວຍໄຜ່, ນາສົ້ມໂຮງ, ເວີນຂາວ ແລະ ສາມຄ້າງ, ການລົງມາເຮັດວຽກຄັ້ງນີ້ກໍເພື່ອຮີບໂຮມເອົາບັນຫາຕ່າງໆທີ່ຄະນະສະເພາະຂັ້ນບ້ານປະເຊີນກັບສິ່ງທ້າທາຍ ແລະ ບັນຫາຕ່າງໆໃນເວລາເຮັດວຽກຕົວຈິງ ຈາກນັ້ນກໍຈະໄດ້ເອົາຂໍ້ມູນລາຍງານຂັ້ນແຂວງຕໍ່ໄປ.


ຂ່າວໂດຍ: ພຸດທະສິນ ວົງວິໄລທອງ