ແຂວງບໍລິຄຳໄຊຍັງມີຜູ້ກັກກັນຕົວພຽງແຕ່ 13 ຄົນເທົ່ານັ້ນ

783

ຍັງບໍ່ພົບຜູ້ຕິດເຊື້ອໂຄວິດ-19 ແລະ ຍັງມີຜູ້ກັກກັນຕົວພຽງແຕ່ 13 ຄົນເທົ່ານັ້ນ ທ່ານ ບຸນເສັງ ປະທຳມະວົງ ຮອງເຈົ້າແຂວງບໍລິຄຳໄຊ ທັງເປັນຮອງປະທານຄະນະກຳມະການສະເພາະກິດຂັ້ນແຂວງ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດພະຍາດອັກເສບປອດ ເຊື້ອຈຸລະໂລກສາຍພັນໃໝ່ ໂຄວິດ-19 ໄດ້ລາຍງາການຈັດຕັ້ງປະຕິບັດວຽກງານດັ່ງກ່າວ ຕໍ່ກອງປະຊຸມເປີດກວ້າງຄົບຄະນະບໍລິຫານງານພັກແຂວງບໍລິຄຳໄຊ ຄັ້ງທີ 15 ສະໄໝ ທີ VI ທີ່ໄຂຂຶ້ນຢ່າງເປັນທາງການໃນວັນທີ 6 ພຶດສະພາ 2020 ຢູ່ຫ້ອງປະຊຸມຫ້ອງວ່າການແຂວງ.

ເພື່ອປ້ອງກັນ ແລະ ຄວບຄຸມ ການລະບາດພະຍາດໂຄວິດ-19 ໃຫ້ມີປະສິດທິພາບ ແລະ ຈັດຕັ້ງປະຕິບັດ 5 ມາດຕະການຂອງແຂວງບໍລິຄຳໄຊໃຫ້ໄດ້ຮັບຜົນດີ ການນຳທຸກຂັ້ນ ແລະ ຄະນະສະເພາະກິດຂັ້ນແຂວງ ແລະ ພະແນກການ ໄດ້ເອົາໃຈໃສ່ລົງຊີ້ນໍາ, ສ້າງຄວາມເຂົ້າໃຈໃຫ້ຄະນະສະເພາະກິດຂັ້ນເມືອງ, ອໍານາດການປົກຄອງບ້ານ ແລະ ປະຊາຊົນກຸ່ມເປົ້າໝາຍ ໃຫ້ມີຄວາມເປັນເອກະພາບຕໍ່ການປະຕິບັດ ບັນດາມາດຕະການຕ່າງໆຂອງລັດຖະບານ ແລະ ແຂວງວາງອອກ, ໃນ 7 ເມືອງທົ່ວແຂວງ ໄດ້ມີສູນກັກກັນຕົວ 69 ສູນ, ມີຜູ້ກັກກັນທັງໝົດ 4.837 ຄົນ


ໃນນັ້ນມາຈາກຕ່າງປະເທດ 3.525 ຄົນ ແລະ ຕ່າງແຂວງ 1.312 ຄົນ, ຍັງສືບຕໍ່ກັກກັນ 13 ຄົນ (ຍັງຢູ່ 4 ສູນ ຈຳນວນ 13 ຄົນ) ພ້ອມດຽວກັນຍັງໄດ້ກະກຽມໂຮງໝໍສຸກເສີນ 2 ແຫ່ງຄື: ຫໍພັກຂອງໂຮງຮຽນທິດສະດີການເມືອງ-ການປົກຄອງຫຼັງໃໝ່ ຕັ້ງຢູ່ຫຼັກ 6 ມີ 2 ຫ້ອງສຸກເສີນ, 8 ຫ້ອງປິ່ນປົວທົ່ວໄປ ແລະ ໂຮງໝໍທະຫານແຂວງ 30 ຕຽງເພື່ອສໍາຮອງໃນການປິ່ນປົວ ນອກຈາກນັ້ນຢູ່ໂຮງໝໍ 5 ເມືອງ ໄດ້ກຽມໄວ້ 15 ຫ້ອງປິ່ນປົວທົ່ວໄປ ແລະ ຜ່ານການຈັດຕັ້ງປະຕິບັດ ໄດ້ກວດຕົວຢ່າງຈາກຜູ້ມີອາການສົງໃສ 30 ຕົວຢ່າງຈາກ 29 ຄົນ ຜົນອອກມາເປັນລົບ ຫຼື ບໍ່ຕິດເຊື້ອ.

ສຳລັບແຜນການໃນຕໍ່ໜ້າ ແມ່ນຈະໄດ້ສືບຕໍ່ຈັດຕັ້ງປະຕິບັດຄຳສັ່ງແຈ້ງການຂອງຂັ້ນເທິງຢ່າງເຂັ້ມງວດ ໂດຍສະເພາະການຕິດຕາມ, ກວດການເຄື່ອນຍ້າຍເຂົ້າ-ອອກ ຂອງບຸກຄົນທີ່ບໍ່ໄດ້ຮັບອະນຸຍາດ, ການປະຕິບັດມາດຕະການປ້ອງກັນຕ່າງໆ, ສືບຕໍ່ໂຄສະນາ, ສືກສາອົບຮົມ, ແນະນຳວິທີປ້ອງກັນ ໃຫ້ເປົ້າໝາຍຜູ້ມີຄວາມສ່ຽງ, ກຳແໜ້ນສະພາບການຮອບດ້ານ ເພື່ອເຮັດໃຫ້ສັງຄົມມີຄວາມສະຫງົບປອດໄພ ແລະ ອື່ນໆ ທັງນີ້ກໍ່ເພື່ອເຮັດໃຫ້ວຽກງານການປ້ອງກັນຄວບຄຸມ ແລະ ແກ້ໄຂ ການລະພາດພະຍາດຈຸລະໂລກສາຍພັນໃໝ່ໂຄວິດ-19 ໃຫ້ໄດ້ຮັບຜົນດີ.