ປະຊາຊົນເມືອງໄຊບູລີສົມທົບທຶນກັບລັດ 30ລ້ານສ້າງຄູຕ້ານຖ້ວມ ປັດຈຸບັນສໍາເລັດແລ້ວ90%

458

ໃນວັນທີ 4 ພຶດສະພາ 2020 ນີ້ ທ່ານ ອ່ອນລໍາພັນ ບົວສີແກ້ວ ເລຂາພັກເມືອງ ເຈົ້າເມືອງໄຊບູລີ, ພ້ອມຄະນະ, ມີທ່ານ ບຸນຍູ້ ຈັນວິສຸດ ຫົວໜ້າຫ້ອງການກະສີກໍາ ແລະປ່າໄມ້, ທ່ານ ແສງສະຫວັນ ພົມມະບຸດ ຫົວໜ້າ ຫ້ອງການຊັບພະຍາກອນທຳມະຊາດ ແລະສິ່ງແວດລ້ອມເມືອງ ພ້ອມໜ່ວຍງານວິຊາການກ່ຽວຂ້ອງ, ໄດ້ລົງຕິດຕາມກວດກາ, ຊຸກຍູ້ການກໍ່ສ້າງຄັນຄູຕ້ານຖ້ວມລຽບແຄມເຊບັ້ງໄຟ, ເຂດບ້ານ ແກ້ງໂພສີ ເມືອງໄຊບູລີ ແຂວງສະຫວັນນະເຂດ, ເຊິ່ງການລົງສໍາຫຼວດໃນຄັ້ງນີ້ເຫັນວ່າໂຄງການສາມາດປະຕິບັດໄດ້ 90% ແລ້ວ

ໃນນັ້ນໄດ້ໃຊ້ ລົດແມັກໂຄຈົກເອົາດິນໃສ່ບ່ອນທີ່ເປັນຄັນຄູເກົ່າ ແລະເສີມໃສ່ພື້ນທີ່ທີ່ຕໍ່າທີ່ເປັນຈຸດຫຼໍ່ແຫຼມທີ່ມີຄວາມສ່ຽງໃນການຖືກຖ້ວມ ເຊິ່ງມີຄວາມກວ້າງ 1 ແມັດ ສູງ 1 ແມັດເຄິ່ງ ແລະ ຍາວ 700 ແມັດ. ລວມມູນຄ່າໃນການການກໍ່ສ້າງ ທັງໝົດ 30.000.000 ກິບ. ເຊິ່ງເປັນການສົມທົບທຶນຮອນ ຂອງປະຊາຊົນຊາວບ້ານແກ້ງໂພສີ ແລະ ຈາກພາກລັດກໍ່ຄືການນໍາ ເມືອງ.

ໃນໂອກາດນີ້ ທ່ານເຈົ້າເມືອງກໍ່ໄດ້ມອບເງິນຈຳນວນ 10.000.000 ກີບ. ເພຶ່ອສົມທົບທຶນໃນການກໍ່ສ້າງຄັນຄູຕ້ານຖ້ວມ ຫຼື ຄູກັນຖ້ວມ ທັງນີ້ ກໍ່ເພື່ອປ້ອງກັນໄພນ້ໍາຖ້ວມເມື່ອລະດັບນໍ້າເຊບັ້ງໄຟສູງຂຶ້ນໃນລະດູຝົນທີ່ຈະມາຮອດນີ້. ພ້ອມດຽວກັນນີ້ ທ່ານເຈົ້າເມືອງ ພ້ອມຄະນະກໍ່ໄດ້ລົງສຳຫຼວດຄູກັນຖ້ວມທີ່ ຫ້ວຍປາປາກເຂດບ້ານສົມສະອາດທີ່ເປັນຈຸດຫຼໍ່ແຫຼມອີກບ່ອນໜຶ່ງ ແລະ ຄາດວ່າຈະໃຊ້ທຶນໃນການກໍ່ສ້າງ ຄູກັນຖ້ວມແຫ່ງນີ້. ປະມານ 4,000,000 ກີບ.

ຊຶ່ງມີຄວາມຍາວ 30 ແມັດ ເລາະແຄມເຊບັ້ງໄຟ, ຈາກນັ້ນກໍ່ໄດ້ໄປເບິ່ງຈຸດຕິດຕັ້ງຫົວງານຈັກສູບນ້ຳ ເພື່ອທໍາການຜະລິດກະສິກໍາລະດູແລ້ງຂອງຊາວບ້ານຫ້ວຍແຮ່ ທັງນີ້ກໍ່ຍ້ອນຄວາມເປັນຫ່ວງເປັນໃຍຂອງຂັ້ນເທິງກໍ່ຄືການນໍາເມືອງທີ່ມີຕໍ່ ປະຊາຊົນຊາວເມືອງໄຊບູລີຜູ້ທີ່ມີເງື່ອນໄຂທໍາການຜະລິດ, ເພື່ອຟື້ນຟູພັດທະນາເສດຖະກິດຄອບຄົວຊຸກຍູ້ການຜະລິດຫຼາຍກາຍເປັນສິນຄ້າ, ສາມາດສົ່ງອອກຕ່າງປະເທດອີກດ້ວຍ.
ພາບ ແລະຂ່າວ: ຄໍາກອນພອນມາລາ