ດ່ານພາສີສາກົນນໍ້າພາວ ເກັບລາຍຮັບງວດ1 ບໍ່ໄດ້ຕາມແຜນ

821

ຕາມການລາຍງານຂອງທ່ານ ວຽງໄຊ ເທບໄກສອນ ຮອງຫົວໜ້າດ່ານພາສີສາກົນນໍ້າພາວ ໃຫ້ຮູ້ວ່າ: ດ່ານພາສີສາກົນນ້ຳພາວປະກອບມີຫ້ອງການເຮັດວຽກ 02 ຈຸດຄື : ຈຸດຊາຍແດນ (505) ແລະ ຈຸດຫຼັກຊາວ (515) ປະກອບມີ 3 ໜ່ວຍງານ, 2 ດ່ານປະເພນີ  ແລະ ໜ່ວຍງານຄຸ້ມຄອງການແຈ້ງ, ໜ່ວຍງານກວດກາສິນຄ້າ-ເຄື່ອງຂອງ, ໜ່ວຍງານກວດກາພາຫະນະ ແລະ ຜູ້ໂດຍສານ.

ໃນແຜນການປີ 2020 ດ່ານພາສີສາກົນນໍ້າພາວ, ໄດ້ຮັບຕົວເລກມອບໝາຍຈໍານວນ 415 ຕື້ກີບ, ຄະນະດ່ານໄດ້ແບ່ງແຜນການຈັດເກັບລາຍຮັບເປັນເດືອນ,ງວດ ແລະ ໄດ້ແຍກເປັນແຕ່ລະໜວດສິນຄ້າ, ສະເພາະແຜນ ການໃນງວດ I ປີ 2020 ໄດ້ວາງຄາດໝາຍ 83 ຕື້ກີບ, ຜ່ານການຈັດຕັ້ງປະຕິບັດຕົວຈິງງວດ I ປີ(ເດືອນ01/02/03/2020) ເກັບລາຍຮັບໄດ້ 48,9 ຕື້ກີບເທົ່າກັບ 58,98% ຂອງແຜນ ການງວດ ຫຼື ເທົາກັບ 11,80% ຂອງແຜນການປີ.

ຊຶ່ງບໍ່ສາມາດປະຕິບັດໄດ້ຕາມແຜນການ, ສາເຫດຍ້ອນຜູ້ປະກອບການດ້ານທຸລະກິດຕ່າງປະເທດຢຸດຕິການສົ່ງສິນຄ້າໄລຍະປີໃໝ່ກຸດຫວຽດ, ກຸດຈີນ, ການນໍ້າເຂົ້າສິນຄ້າຂອງຜູ້ປະກອບການຫັນໄປນຳເຂົ້າດ່ານສາກົນດ່ານອື່ນ ແທນ, ອີກສາເຫດແມ່ນຄ່ານຽມຜູ້ໂດຍສານຫຼຸດລົງ, ການຢຸດຕິການນຳເຂົ້າສິນຄ້າບາງປະເພດໃນໄລຍະກວດກາ,ຕິດ ຕາມ, ການແຜ່ເຊື້ອພະຍາດໂຄວິດ-19. ສະນັ້ນ, ຈິ່ງບໍ່ສາມາດຈັດເກັບລາຍຮັບໄດ້ຕາມແຜນການທີ່ວາງໄວ້.

ປັດຈຸບັນເຈົ້າໜ້າທີ່ພາສີປະຈຳດ່ານໄດ້ເຂັ້ມງວດໃນການຈັດຕັ້ງປະຕິບັດຄຳສັ່ງຂອງຂັ້ນເທິງເປັນຕົ້ນ: ແມ່ນການຮັບ-ສົ່ງສິນຄ້າແມ່ນໄດ້ສັບປ່ຽນໂຊເຟີທັງຂາເຂົ້າ ແລະ ຂາອອກ, ພ້ອມໄດ້ຮັບການສີດຢາຂ້າເຊື້ອລົດບັນທຸກສິນ ຄ້າທີ່ນຳເຂົ້າທຸກຄັນ, ສ່ວນໃຫຍ່ສິນຄ້ານຳເຂົ້າຢູ່ໃນຂອບເຂດການອະນຸຍາດເຊັ່ນ: ນໍ້າມັນເຊື້ອໄຟ, ສິນຄ້າທີ່ຈຳເປັນຮັບໃຊ້ໂຄງການ.

ແນວໃດກໍຕາມສຳລັບການຈັດຕັ້ງປະຕິບັດວຽກງານເຫັນວ່າພົບຄວາມຫຍູ້ງຍາກເປັນຕົ້ນ: ດ້ານສະຖານທີ່ບໍ່ເອື້ອອຳນວຍຄວາມສະດວກ, ກົນຈັກຄ່ຽນສິນຄ້າໝັກຍັງບໍ່ມີ, ລະບົບສາງຍັງບໍ່ທັນໄດ້ຕາມາດຕະຖານ. ແຕ່ຄຽງຄູ່ກັນນີ້, ຍັງມີດ້ານດີຍ້ອນຄວາມເອົາໃຈໃສ່ຊີ້ນຳ-ນຳພາຂອງຄະນະພັກ, ຄະນະນຳຂັ້ນເທິງ, ຄະນະກົມ, ຄະນະກອງຄຸ້ມຄອງພາສີ V ແລະ ອົງການການປົກຄອງທ້ອງຖິ່ນ,ມີການປະສານສົມທົບກັບຂະແໜງການທີ່ກ່ຽວຂ້ອງເປັນປົກກະຕິ,ຜູ້ປະກອບການສ່ວນຫຼາຍໃຫ້ຄວາມຮ່ວມມື, ມີອຸປະກອນທີ່ທັນສະໄໝເປັນຕົ້ນມີລະບົບ (Asycuda), ເຄື່ອງສະ ແກນເນີ້ເຄື່ອງຊັງນ້ຳໜັກ, ທີ່ເປັນເຄື່ອງມືໃນການປະຕິບັດວຽກງານວິຊາສະເພາະ ແລະ ຄວາມເອົາໃຈໃສ່, ຄວາມບຸກບືນຫ້າວຫັນຂອງພະນັກງານເປັນຢ່າງດີ.