ຜົ້ງສາລີ ທົບທວນຄືນການປ້ອງກັນໂຄວິດ-19 ແລະ ຄໍາສັ່ງຕ່າງໆຂອງຂັ້ນເທິງ

498

ຄະນະສະເພາະກິດໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ແຂວງຜົ້ງສາລີ ໄດ້ຈັດໃຫ້ມີກອງປະຊຸມປືກສາຫາລືກ່ຽວກັບການປະຕິບັດບັນດາມາດຕະການໃນການປ້ອງກັນ, ຄວບຄຸມ ແລະ ແກ້ໄຂ. ໂດຍພາຍໃຕ້ການເປັນປະທານຂອງທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ທັງເປັນຫົວໜ້າຄະນະສະເພາະກິດຂັ້ນແຂວງ, ມີບັນດາທ່ານຄະນະສະເພາະກິດຂັ້ນແຂວງ, ຂັ້ນເມືອງ, ບັນດາທ່ານ ເຈົ້າເມືອງຈາກ 7 ເມືອງພາຍໃນແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

ທ່ານ ດຣ. ບຸນສາລີ ຈິດດາພອນ ຫົວໜ້າພະແນກສາທາລະນະສຸກແຂວງ, ທັງເປັນກອງເລຂາຂອງຄະນະສະເພາະຂັ້ນແຂວງ ໄດ້ຂື້ນລາຍງານກ່ຽວກັບການລະບາດຂອງພະຍາດໂຄວິດ-19 ຂອງແຂວງຜົ້ງສາລີນັບແຕ່ຕົ້ນເດືອນກຸມພາ ມາເຖີງວັນທີ 3 ພືດສະພາ 2020 ໄດ້ມີການກວດຄົນເຂົ້າເມືອງທັງໝົດ 10.693 ຄົນ. ໃນນີ້, ດ່ານສາກົນປາງຫົກ 5.667 ຄົນ, ດ່ານລານຕຸ້ຍ 516 ຄົນ ແລະ ດ່ານ ປ່າຄາ 4.510 ຄົນ ແຕ່ບໍ່ພົບເຫັນບຸກຄົນທີມີອາການໄຂ້ຈັກຄົນ. ພ້ອມນັ້ນກໍ່ໄດ້ຈັດບ່ອນກະກຽມສູນກັກກັນທົ່ວແຂວງ 8 ສູນ, ຈຳນວນຄົນທີ່ໄດ້ຕິດຕາມຢູ່ສູນສະສົມ 208 ຄົນ ແລະ ຮອດປັດຈຸບັນຍັງ 17 ຄົນ.

ສ່ວນຈຳນວນຄົນທີ່ໄດ້ຕິດຕາມຢູ່ບ້ານ 2.036 ຄົນ ຮອດດຽວນີ້ຍັງ 10 ຄົນ ແລະ ໄດ້ເກັບຕົວຢ່າງຜູ້ຕ້ອງສົງໃສ 1 ຄົນ, ແຕ່ຜົນກວດເປັນລົບ. ສໍາລັບຈຳນວນຄົນຖຶກກັກໂຕຄົບກຳນົດ 14 ວັນແລ້ວປ່ອຍຕົວຢູ່ສູນມີ 191 ຄົນ ແລະ ຢູ່ບ້ານ 2.026 ຄົນ. ຄຽງຄູ່ກັນນັ້ນ, ຍັງມີແຮງງານລາວ ແລະ ຄົນລາວທີ່ໄປຕ່າງປະເທດກັນມາບ້ານມີທັງໝົດ 23 ຄົນ, ຍິງ 15 ຄົນ ໄດ້ປະຕິບັດກັກໂຕຄົບກຳນົດ ຈຳນວນ 18 ຄົນ, ຍິງ 11 ຄົນ, ສ່ວນຍັງສືບຕໍ່ຕິດຕາມ 5 ຄົນ, ຍິງ 03 ຄົນ.

ໂອກາດນີ້, ທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ທັງເປັນຫົວໜ້າຄະນະສະເພາະກິດຂັ້ນແຂວງ ກໍ່ໄດ້ຮຽກຮອງໃຫ້ທຸກພາກສ່ວນພາຍໃນຄະນະສະເພາະກິດຂັ້ນແຂວງ, ຂັ້ນເມືອງຈົ່ງພ້ອມກັນເປັນເຈົ້າການໃນການຈັດຕັ້ງປະຕິບັນດບັນດາແຈ້ງການ, ຄຳສັ່ງຕ່າງໆຂອງຂັ້ນສູນກາງ ແລະ ແຂວງວາງອອກ, ເອົາໃຈໃສ່ຕິດຕາມກວດກາຈຳນວນຄົນເຂົ້າອອກລະຫ່ວາງເມືອງຕໍ່ເມືອງດ້ວຍການວັດແທກອຸນຫະພູມ, ສືບຕໍ່ລາດຕະເວນກວດກາຈຸດຕ່າງໆພາຍໃນເມືອງຂອງຕົນໃຫ້ເປັນລະບຽບຮຽບຮ້ອຍ.

ມອບໃຫ້ພາກສ່ວນກ່ຽວຂ້ອງຕິດຕາມບັນດາໂຄງການ, ໂຮງງານ, ບໍລິສັດ ແລະ ນັກທຸລະກິດທີ່ຈະດຳເນີນກິດຈະການຕ່າງໆໃນຊວງໂຄວິດ-19 ລະບາດ ແມ່ນໃຫ້ຄົບຕາມ 9 ເງືອນໄຂ, 6 ມາດຖານຕາມຄຳແນະນຳຂອງຄະນະສະເພາະກິດຂັ້ນສູນກາງ; ສືບຕໍ່ກະກຽມສູນກັກກັນທີ່ຈະຮອງຮັບຄົນລາວມາແຕ່ຕ່າງປະເທດ ແລະ ຄົນຕ່າງປະເທດທີ່ຈະເຂົ້າມແຂວງຜົ້ງສາລີ ທັງນີ້ກໍ່ເພືອແນ່ໃສ່ເຮັດໃຫ້ແຂວງຜົ້ງສາລີປອດໄພຈາກພະຍາດດັ່ງກ່າວ. ກອງປະຊຸມໄດ້ຈັດຂຶ້ນໃນຕອນເຊົ້າຂອງວັນທີ 4 ພືດສະພາ 2020 ຜ່ານມາ, ຢູ່ທີ່ຫ້ອງປະຊຸມ ຫ້ອງວ່າການແຂວງຜົ້ງສາລີ.

(ເນື້ອນໃນ-ພາບ: ແສງຄຳ ສາລີວັນ)