ເຈົ້າແຂວງຈຳປາສັກ ລົງເບິ່ງໂຄງການສາຍໄຍໂລມາຄໍາທີ່ເມືອງນອງ

677

ໃນວັນທີ 2 ພຶດສະພາ 2020 ນີ້ ທ່ານ ປອ ວິໄລວົງ ບຸດດາຄຳ ເຈົ້າແຂວງຈຳປາສັກ ພ້ອມຄະນະໄດ້ເດີນທາງມາເຄື່ອນໄຫວຢ້ຽມຢາມ ແລະ ຖອດຖອນບົດຮຽນໂຄງການລຶບລ້າງຄວາມທຸກຍາກ ທີ່ບ້ານປະແນະ ແລະ ບ້ານຕະຢົງ ເມືອງນອງ ແຂວງສະຫວັນນະເຂດ. ໃຫ້ກຽດຕ້ອນຮັບຄະນະນຳຂັ້ນສູງຂອງແຂວງຈຳປາສັກຄັ້ງນີ້ ໂດຍແມ່ນ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ,ທ່ານ ລຳແກ້ວ ແສງໜູທອງ ເຈົ້າເມືອງໆນອງ ພ້ອມດ້ວຍດ້ວຍຄະນະພະແນກການຕ່າງໆຂອງແຂວງ ໄດ້ໃຫ້ການຕ້ອນຮັບຢ່າງອົບອຸ່ນ


ທ່ານ ບົວລີ ເພັດສົງຄາມ ຫົວໜ້າພະແນກກະສິກຳ ແລະ ປ່າໄມ້ແຂວງຈຳປາສັກ ຕາງໜ້າ ໃຫ້ການນຳຂອງແຂວງໄດ້ໃຫ້ສຳພາດຕໍ່ຜູ້ສື່ຂ່າວສະຖານີວິທະຍຸກະຈາຍສຽງຂອງພວກເຮົາວ່າ: ຈຸດປະສົງທີ່ຄະນະນຳແຂວງຈຳປາສັກມາສົມທົບຖອດຖອນບົດຮຽນກ່ຽວກັບໂຄງການລຶບລ້າງຄວາມທຸກຍາກເຊິ່ງເປັນໂຄງການຂອງນັກທຸລະກິດເປັນຜູ້ໃຫ້ທຶນສະໜັບສະໜູນຊ່ວຍເຫຼືອລ້າ ຫຼື ໂຄງການຮ່ວມໃຈສາຍໃຍໂລມາຄຳ ທີ່ແຂວງສະຫວັນນະເຂດຄັ້ງນີ້ ກໍ່ເພື່ອເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງລັດຖະບານເປີດກວ້າງຄັ້ງທີ 1 ປີ 2019 ໃນການດຶງດູດເອົາຜູ້ປະກອບການພາຍໃນເຂົ້າຮ່ວມໃນການລຶບລ້າງຄວາມທຸກຍາກຂອງປະຊາຊົນ ຜ່ານການມາເບິ່ງຕົວຈິງເຫັນວ່າໂຄງການດັ່ງກ່າວມີປະໂຫຍດ ແລະ ເປັນບົດຮຽນຫຼາຍ ເນື່ອງຈາກວ່າທາງພາກສ່ວນນັກທຸລະກິດກໍ່ໄດ້ລົງເລິກຮອດຄອບຄົວ ໝາຍຄວາມວ່າເກີດຈາກຄວາມຕ້ອງການຂອງປະຊາຊົນ ໃນການກຳນົດເປົ້າໝາຍກິດຈະກຳ ບວກກັບໂຄງການຈຸດສຸມຂອງລັດຖະບານ ທີ່ໄດ້ມີການລົງທຶນໃສ່ວຽກງານພັດທະນາພື້ນຖານໂຄງລ່າງໃຫຍ່ໆ ແຕ່ບັນຫາຂອງປະຊາຊົນຈະມີຢູ່ມີກິນຄືແນວໃດ ເຖິງແມ່ນວ່າຈະມີເສັ້ນທາງໃຫຍ່,ໄຟຟ້າມາຮອດຢ່າງດຽວ ມັນກໍ່ບໍ່ສາມາດແກ້ໄຂຄວາມທຸກຍາກຂອງປະຊາຊົນໄດ້ ສະນັ້ນມັນຕ້ອງໄດ້ລົງເລິກໄປເຖິງຄອບຄົວຂອງປະຊາຊົນ ເພື່ອຈະກຳນົດທິດທາງໃຫ້ເຂົາເຈົ້າມີຢູ່ມີກິນ,ມີຄວາມຍືນຍົງ ແລະ ກຸ້ມຕົນເອງໄດ້ ເຊິ່ງໂຄງກາານດັ່ງກ່າວມັນເປັນບົດຮຽນອັນລ້ຳຄ່າທີ່ການນຳແຂວງຈຳປາສັກ ຈະໄດ້ນຳໄປໝູນໃຊ້ຢູ່ໃນແຂວງຂອງຕົນ


ທ່ານ ບົວລີ ເພັດສົງຄາມ ໃຫ້ຮູ້ຕື່ມອີກວ່າ: ສຳລັບແຂວງຈຳປາສັກກໍ່ໄດ້ມີໂຄງການຈຸດສຸມເພື່ອລຶບລ້າງຄວາມທຸກຍາກເຊັ່ນດຽວກັນເຊິ່ງທຸກແຂວງຈຳປາສັກຍັງມີບ້ານທຸກຍາກທັງໝົດ 9 ບ້ານ ແລະ ຄອບຄົວທຸກຍາກກໍ່ຍັງມີຫຼາຍຄອບຄົວ ທາງແຂວງຈຳປາສັກກໍ່ຈະໄດ້ນຳບົດຮຽນຂອງໂຄງການຮ່ວມໃຈສາຍໃຍໂລມາຄຳ ເມືອຈັດຕັ້ງຜັນຂະຫຍາຍຢູ່ບ້ານທີ່ທຸກຍາກ,ບ້ານຊາຍແດນ ແລະ ບ້ານຊົນເຜົ່າ ທີ່ຢູ່ເຂດຫ່າງໄກສອກຫຼີກ ຄຽງຄູ່ກັບການພັດທະນາທາງດ້ານພື້ນຖານໂຄງລ່າງທີ່ໄດ້ຮັບການອະນຸມັດຈາກສະພາໃນການເຂົ້າໄປເຖິງ ເພື່ອໃຫ້ປະຊາຊົນໄດ້ດຳເນີນກິດຈະກຳໃນການປູກການລ້ຽງ ໂດຍສະເພາະໃນຊ່ວງທີ່ມີການລະບາດພະຍາດໂຄວິດ 19 ກໍ່ຈະເລີ່ມຊົມໃຊ້ສະບຽງອາຫານແຕ່ລະດັບເສດຖະກິດຄອບຄົວຂຶ້ນໄປ ຕາມແຜນແມ່ນຈະເນັ້ນໃສ່ເມືອງມົນລະປະໂມກ ແລະ ເມືອງສຸຂຸມມາ ແຂວງຈຳປາສັກ ພາຍຫຼັງທີ່ກັບເມືອແລ້ວກໍ່ຈະໄດ້ຈັດຕັ້ງກອງປະຊຸມແຂ່ງຂັນຮັກຊາດ ແລະ ພັດທະເພື່ອລະດົມເອົານັກທຸລະກິດເຂົ້າມາໃຫ້ທຶນສະໜັບສະໜູນ ເຮັດຄືກັບແຂວງສະຫວັນນະເຂດທີ່ເຄີຍປະສົບຜົນສຳເລັດມາກ່ອນແລ້ວ.
ຂ່າວ: ອັກສອນສິນ ພົມມະຈັນ