ແຂວງຜົ້ງສາລີ ປຶກສາຫາລືການປ້ອງກັນ ໂຄວິດ-19

510

ໃນຕອນເຊົ້າຂອງວັນທີ 4 ພືດສະພາ 2020 ນີ້, ຢູ່ທີ່ຫ້ອງປະຊຸມຊັ້ນ 5 ຂອງ​ #ຫ້ອງວ່າການແຂວງຜົ້ງສາລີ ຄະນະສະເພາະກິດໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດ​#ອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື #ໂຄວິດ19 ຂັ້ນແຂວງ ໄດ້ຈັດໃຫ້ມີກອງປະຊຸມປຶກສາຫາລືກ່ຽວກັບການປະຕິບັດບັນດາມາດຕະການໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ-19 ຂຶ້ນຢ່າງເປັນທາງການ. ໂດຍພາຍໃຕ້ການເປັນປະທານຂອງທ່ານ ທອງສີ ເສົາສຸລິພົມ ຮອງເຈົ້າແຂວງໆຜົ້ງສາລີ, ທັງເປັນຫົວໜ້າຄະນະສະເພາະກິດໃນການປ້ອງກັນ, ຄວບຄຸມ ແລະ ແກ້ໄຂການລະບາດ ຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ 19 ຂັ້ນແຂວງ, ມີບັນດາທ່ານຄະນະສະເພາະກິດຂັ້ນແຂວງ, ຂັ້ນເມືອງ, ບັນດາທ່ານ ເຈົ້າເມືອງຈາກ 7 ເມືອງພາຍໃນແຂວງ ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ

ໃນກອງປະຊຸມ ທ່ານ ດຣ ບຸນສາລີ ຈິດດາພອນ ຫົວໜ້າພະແນກສາທາລະນະສຸກແຂວງ, ທັງເປັນກອງເລຂາຂອງຄະນະສະເພາະຂັ້ນແຂວງ ກໍໄດ້ຂຶ້ນລາຍງານກ່ຽວກັບການລະບາດຂອງພະຍາດໂຄວິດ-19 ຂອງໂລກ ແລະ ໃນປະເທດລາວ ກໍຄືແຂວງຜົ້ງສາລີ. ເຊິ່ງມາຮອດເວລາ 17:00 ໂມງ ຂອງວັນທີ 3 ພຶດສະພາ 2020 ມີກໍລະນີຕິດເຊື້ອສະສົມທັງໝົດ 3.498.145 ຄົນ, ເສຍຊີວິດສະສົມທັງໝົດ 244.788 ຄົນ ແລະ ປີ່ນປົວຫາຍດີ 1.126.721 ຄົນ, ເຊິ່ງໄດ້ເກີດຂຶ້ນຢູ່ໃນ 200 ກວ່າປະເທດ. ສຳລັບຢູ່ໃນ ສປປ ລາວ ນັບແຕ່ເກີດມີການລະບາດຈົນມາຮອດຕອນແລງຂອງວັນທີ 3 ພຶດສາພາ 2020 ໄດ້ເກັບຕົວຢ່າງຂອງກໍລະນີທີສົງໄສສົ່ງກວດທັງໝົດ 2.184 ຕົວຢ່າງ ແລະ ໄດ້ກວດພົບເຊື້ອທັງໝົດ 19 ຄົນ ແລະ ບໍ່ພົບເຊື້ອ 2.165 ຕົວຢ່າງ. ໃນຈຳນວນ 19 ຄົນທີ່ຕິດເຊື້ອໄດ້ເຂົ້າຮັບການປິ່ນປົວຢູ່ໂຮງໝໍມິດຕະພາບ 16 ຄົນ ແລະ ໂຮງໝໍແຂວງຫຼວງພະບາງ 3 ຄົນ, ຜ່ານການປິ່ນປົວມາຮອດວັນທີ 3 ພຶດສະພາ 2020 ມີ 10 ຄົນ ແມ່ນໄດ້ຫາຍດີເປັນປົກກະຕິຜ່ານການກວດຄືນ 2 ຄັ້ງບໍ່ພົບເຊື້ອ ແພດໄດ້ອະນຸຍາດໃຫ້ອອກໂຮງໝໍໄປສືບຕໍ່ຈຳກັດຕົວເອງຢູ່ເຮືອນຕື່ມ 14 ວັນ, ສ່ວນອີກ 9 ຄົນທີ່ຍັງເຫຼືອແມ່ນມີອາການເບົາບາງ ຜ່ານການກວດຊອກຫາເຊື້ອພະຍາດແມ່ນຍັງພົບເຊື້ອຢູ່, ໃນຈຳນວນ 10 ຄົນທີ່ປິ່ນປົວຫາຍດີແລ້ວ ແລະ ໄປສືບຕໍ່ຈຳກັດຕົວເອງຢູ່ເຮືອນຄົບກຳນົດ 14 ວັນແລ້ວ, ຜູ້ອອກໂຮງໝໍນ້ຳເບີ 14 ໄດ້ກັບມາກວດຄືນເຫັນວ່າພົບເຊື້ອຄືນ ແພດຈຶ່ງໄດ້ເອົາເຂົ້ານອນຕິດຕາມອາການຢູ່ໂຮງໝໍຕື່ມ. ສ່ວນຢູ່ແຂວງຜົ້ງສາລີໄດ້ມີການເຝົ້າລະວັງ ແລະ ຕິດຕາມກວດກາຢ່າງເຄັງຄັດ ນັບແຕ່ເລີ່ມມີການລະບາດຢູ່ປະເທດ ສປ ຈີນ. ແຕ່ຕົ້ນເດືອນກຸມພາມາເຖິງວັນທີ 3 ພຶດສະພາ 2020 ໄດ້ມີການກວດຄົນເຂົ້າເມືອງທັງໝົດ 10.693 ຄົນ. ໃນນີ້, ດ່ານສາກົນປາງຫົກ 5.667 ຄົນ, ດ່ານລານຕຸ້ຍ 516 ຄົນ ແລະ ດ່ານ ປ່າຄາ 4.510 ຄົນ ແຕ່ບໍ່ພົບເຫັນບຸກຄົນທີ່ມີອາການໄຂ້ຈັກຄົນ. ພ້ອມນັ້ນ, ກໍໄດ້ຈັດບ່ອນກະກຽມສູນກັກກັນທົ່ວແຂວງ 8 ສູນ, ຈຳນວນຄົນທີ່ໄດ້ຕິດຕາມຢູ່ສູນສະສົມ 208 ຄົນ, ປັດຈຸບັນຍັງ 17 ຄົນ, ຈຳນວນຄົນທີ່ໄດ້ຕິດຕາມຢູ່ບ້ານ 2.036 ຄົນ, ປັດຈຸບັນຍັງ 10 ຄົນ, ເກັບຕົວຢ່າງຜູ້ຕ້ອງສົງໃສ 1 ຄົນ, ຜົນກວດ ເປັນລົບ, ຈຳນວນຄົບກຳນົດ 14 ວັນແລ້ວປ່ອຍຕົວຢູ່ສູນມີ 191 ຄົນ, ຢູ່ບ້ານ 2026 ຄົນ. ສຳລັບແຮງງານລາວ ແລະ ຄົນລາວທີ່ໄປຕ່າງປະເທດກັບມາບ້ານມີທັງໝົດ 23 ຄົນ ຍິງ 15 ຄົນ, ໝົດກຳນົດຕິດຕາມ 14 ວັນ ຈຳນວນ 18 ຄົນ ຍິງ 11 ຄົນ, ຍັງສືບຕໍ່ຕິດຕາມ 5 ຄົນ ຍິງ 3 ຄົນ, ຢູ່ເມືອງບຸນເໜືອ 4 ຄົນ ແລະ ບຸນໃຕ້ 1 ຄົນ.

ໃນກອງປະຊຸມຜູ້ເຂົ້າຮ່ວມຍັງໄດ້ພ້ອມກັນຄົ້ນຄວ້າປະກອບຄຳຄິດເຫັນໃສ່ບົດລາຍງານ ແລະ ແຈ້ງການຕ່າງໆຂອງສູນກາງໂດຍສະເພາະແມ່ນ ແຈ້ງການສະບັບເລກທີ 507, 524 ຂອງຫ້ອງວ່າການສຳນັກງານນາຍົກລັດຖະມົນຕີ ແລະ ອື່ນໆ ທັງນີ້ກໍເພື່ອເປັນການເອກະພາບກັນ ແລະ ເປັນບ່ອນອີງໃນການຈັດຕັ້ງປະຕິບັດຂອງຄະນະສະເພາະກິດຂັ້ນແຂວງ, ຂັ້ນເມືອງ ເພື່ອໄປລວງດຽວກັນ, ມີຄວາມຮັດກຸມ ແລະ ມີປະສິດທິພາບສູງສຸດໃນການຈັດຕັ້ງປະຕິບັດ.

ໃນກອງປະຊມຄັ້ງນີ້, ທ່ານ ທອງສີ ເສົາສຸລິພົມ ຮອງເຈົ້າແຂວງຜົ້ງສາລີ, ທັງເປັນຫົວໜ້າຄະນະສະເພາະກິດໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ ຫຼື ໂຄວິດ 19 ຂັ້ນແຂວງ ກໍໄດ້ຮຽກຮ້ອງໃຫ້ທຸກພາກສ່ວນພາຍໃນຄະນະສະເພາະກິດຂັ້ນແຂວງ, ຂັ້ນເມືອງ ຈົ່ງພ້ອມກັນເປັນເຈົ້າການໃນການຈັດຕັ້ງປະຕິບັດບັນດາແຈ້ງການ, ຄຳສັ່ງຕ່າງໆຂອງຂັ້ນສູນກາງ ແລະ ແຂວງວາງອອກ, ເອົາໃຈໃສ່ຕິດຕາມກວດກາຈຳນວນຄົນເຂົ້າ-ອອກລະຫວ່າງເມືອງຕໍ່ເມືອງດ້ວຍການວັດແທກອຸນຫະພູມ, ສືບຕໍ່ລາດຕະເວນກວດກາຈຸດຕ່າງໆພາຍໃນເມືອງຂອງຕົນໃຫ້ເປັນລະບຽບຮຽບຮ້ອຍ, ໃຫ້ພາກສ່ວນກ່ຽວຂ້ອງຕິດຕາມບັນດາໂຄງການ, ໂຮງງານ, ບໍລິສັດ ແລະ ນັກທຸລະກິດທີ່ຈະດຳເນີນກິດຈະການຕ່າງໆໃນຊວງໂຄວິດ 19 ລະບາດ ແມ່ນໃຫ້ຄົບຕາມ 9 ເງື່ອນໄຂ, 6 ມາດຖານ ຕາມຄຳແນະນຳຂອງຄະນະສະເພາະກິດຂັ້ນສູນກາງ, ສືບຕໍ່ກະກຽມສູນກັກກັນທີ່ຈະຮອງຮັບຄົນລາວມາແຕ່ຕ່າງປະເທດ ແລະ ຄົນຕ່າງປະເທດທີ່ຈະເຂົ້າມາລາວກະຄືແຂວງຜົ້ງສາລີ, ທັງນີ້ກໍ່ເພືອແນໃສ່ເຮັດໃຫ້ແຂວງຜົ້ງສາລີປອດໄພຈາກພະຍາດໂຄວິດ – 19.

#Medialaos

#Phongsaly

( ພາບ – ຂ່າວ: ແສງຄຳ ສາລີວັນ )