ວັນທີ 4 ພຶດສະພາ 2020ບໍ່ພົບຜູ້ຕິດເຊື້ອໂຄວິດ19ເພີ່ມ

611

ຕາມບົດຖະແຫຼງຂ່າວຂອງ ທ່ານ ຮສ ດຣ. ພູທອນ ເມືອງປາກ ຮອງລັດຖະ ມົນຕີ ກະຊວງສາທາລະນະສຸກ ຜູ້ປະຈໍາການ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງ COVID-19 ໃນຕອນບ່າຍມື້ນີ້ເຫັນວ່າ: ວຽກງານ ການເຝົ້າລະວັງ ແລະ ວິເຄາະ ໃນວັນທີ 03 ພຶດສະພາ 2020 ໄດ້ເກັບຕົວຢ່າງມາກວດທັງໝົດ 39 ຄົນໃນນັ້ນ ມີກໍລະນີສົງໄສ 14 ຄົນ ແລະ ແຮງງານລາວທີ່ກັບມາຈາກປະເທດໄທ 25 ຄົນ ໃນຈໍານວນກໍລະນີສົງໄສທັງ ໝົດ ແມ່ນມາຈາກ ນະຄອນຫຼວງວຽງຈັນ 13 ຄົນ ແລະ ແຂວງວຽງຈັນ 1 ຄົນ ສ່ວນໃນຈຳນວນແຮງງານລາວທີ່ກັບມາແຕ່ໄທ 25 ຄົນ ມາຈາກແຂວງຈຳປາ ສັກ 18 ຄົນ ວຽງຈັນ 4 ຄົນ ຫຼວງພະບາງ 1 ຄົນ ຊຽງຂວາງ 1 ຄົນສະຫວັນນະເຂດ 1 ຄົນ ສໍາລັບຜົນກວດຕົວຢ່າງທັງໝົດປາກົດວ່າ ບໍ່ພົບກໍລະນີຕິດເຊື້ອໃໝ່.

ສ່ວນການຕິດຕາມ ຢູ່ສະຖານທີ່ຈຳກັດບໍລິເວນຂອງແຂວງ ແລະ ຜູ້ຈຳກັດບໍລິເວນ ຢູ່ເຮືອນ ສຳລັບຜູ້ເດີນທາງມາຈາກຕ່າງປະເທດ ມາຮອດວັນທີ 3 ພຶດສະພາ 2020 ທົ່ວປະເທດ ຍັງມີສູນຈໍາກັດບໍລິເວນ ທັງໝົດ 137 ສູນ ມີຜູ້ຈຳກັດບໍລິເວນຢູ່ສູນ 617 ຄົນ ຈໍາກັດບໍລິເວນຢູ່ເຮືອນ 358 ຄົນ ເກັບຕົວຢ່າງມາກວດວິເຄາະຫາເຊື້ອ 745 ຄົນ. ທັງໝົດບໍ່ພົບເຊື້ອ.

ການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນມີຜູ້ຕິດເຊື້ອນອນຕິດຕາມ ປິ່ນປົວຢູ່ໂຮງໝໍມິດຕະພາບ 9 ຄົນ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມເພື່ອກວດວິເຄາະຢັ້ງຢືນການບໍ່ພົບເຊື້ອຮັບເອົາຜູ້ທີ່ອອກໂຮງໝໍນ້ຳເບີ 14 ກັບເຂົ້າມາຕິດຕາມອາການຢູ່ໂຮງໝໍ ແຕ່ວ່າໄດ້ແຍກໄວ້ຢູ່ຕຶກແຍກປ່ຽວໜຶ່ງຕ່າງຫາກ ບໍ່ໄດ້ໄປປົນກັບຜູ້ຕິດເຊື້ອ 9 ຄົນທີ່ກຳລັງປິ່ນປົວຢູ່ນັ້ນ ໝາຍວ່າປະຈຸບັນນີ້ມີຜູ້ຕິດຕາມຢູ່ໂຮງໝໍມິດຕະພາບ 10 ຄົນ.

ການຕິດຕາມສະພາບການລະບາດຂອງປະເທດໃກ້ຄຽງ ແລະ ສະພາບການລະບາດຢູ່ໃນທົ່ວໂລກ ເຫັນວ່າ: ມາຮອດເວລາ 6:00 ໂມງເຊົ້າ ຂອງວັນທີ 4 ພຶດສະພາ 2020 ທົ່ວໂລກມີການລາຍງານການລະບາດ ທັງໝົດ 212 (ປະເທດ/ເຂດ) ມີການຢັ້ງຢືນຜູ້ຕິດເຊື້ອພະຍາດ COVID-19 ແມ່ນ 3.561.887 (80.516 ໃໝ່) ເສຍຊິວິດ 248.084 (3.421 ໃໝ່) ກວມເອົາ 6,96 % ຂອງຜູ້ຕິດເຊື້ອທັງໝົດ ປີ່ນປົວຫາຍດີ 1.152.993 (45.156 ໃໝ່) ກວມເອົາ 32,3 % ຂອງຜູ້ຕິດເຊື້ອທັງໝົດ ມີບາງປະເທດ ຈຳນວນຜູ້ຕິດເຊື້ອມື້ດຽວ ມີເຖິງ 26.261 ຄົນ ແລະ ເສຍຊີວິດ 1.115 ຄົນຕໍ່ມື້ ອັດຕາຄວາມຮ້າຍແຮງຂອງມື້ນີ້ແມ່ນ 6,96 % (ມື້ວານນີ້ 7.02 %) ສະເພາະກຸ່ມປະເທດອາຊຽນກໍ່ເຫັນວ່າ ຍັງມີບາງປະເທດທີ່ມີອັດຕາການຕິດເຊື້ອ ແລະ ເສຍຊີວິດສູງຢູ່ ມີບາງປະເທດຕິດເຊື້ອໃໝ່ ໃນວັນທີ 3 ພຶດສະພາ 2020 ນີ້ ເຖິງ 657 ຄົນ ແລະ ເສຍຊີວິດໃນມື້ດຽວ ຢູ່ກຸ່ມປະເທດອາຊຽນ ເຖິງ 21 ຄົນ.

ຕາມບົດຖະແຫຼງຂ່າວຍັງລຸບຸວ່າ: ເລິ່ມແຕ່ມື້ນີ້ ວັນທີ 4 ພຶດສະພາ ຈົນເຖິງ ວັນທີ 17 ພຶດສະພາ ກໍ່ໄດ້ມີມາດຕະການຜ່ອນຜັນບາງຢ່າງ ຕາມແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ເລກທີ 524/ຫສນຍ ລົງວັນທີ 1 ພຶດສະພາ 2020 ເຊິ່ງມີ 8 ມາດຕະການຜ່ອນຜັນ ແລະ 5 ມາດຕະການສືບຕໍ່ຫ້າມ ສະນັ້ນ ຈຶ່ງຮຽກຮ້ອງໃຫ້ທຸກພາກສ່ວນໃນສັງຄົມ ເອົາໃຈໃສ່ສືກສາແຈ້ງການຂອງຫ້ອງວ່າການສຳນັກງານນາຍົກລັດຖະມົນຕີ ແລະ ຄຳແນະນຳຂອງຂະແໜງການຕ່າງໆ ໃຫ້ມີຄວາມເຂົ້າໃຈ ຮ່ວມແຮງຮ່ວມໃຈກັນ ຈັດຕັ້ງປະຕິບັດໃຫ້ຖືກຕ້ອງ ແລະ ເຂັ້ມງວດ.