ການນຳແຂວງຈຳປາສັກ ປຶກສາຫາລືການນໍາແຂວງເຊກອງ

519

ວັນທີ 3 ພືດສະພາ 2020 ນີ້, ທີ່ເມືອງທ່າແຕງ ແຂວງເຊກອງ, ທ່ານ ປອ. ວິໄລວົງ ບຸດດາຄຳ ເລຂາພັກແຂວງເຈົ້າແຂວງໆຈຳປາສັກ ພ້ອມດ້ວຍຄະນະນໍາ ຄະນະຜູ້ແທນແຂວງຈຳປາສັກ ໄດ້ເດີນທາງຮ່ວມພົບປະ ແລະຢ້ຽມຢາມການນຳຂັ້ນສູງແຂວງເຊກອງ ໂດຍການຕ້ອນຮັບຂອງ ທ່ານ ຄຳເຜີຍ ບຸດດາວຽງ ເລຂາພັກແຂວງເຈົ້າແຂວງໆເຊກອງ ພ້ອມດ້ວຍຄະນະນໍາ ຄະນະຜູ້ແທນຂັ້ນສູງແຂວງເຊກອງ ແລະມີບັນດາພາກສ່ວນກ່ຽວຂ້ອງທັງສອງແຂວງເຂົ້າຮ່ວມ.

ໃນການພົບປະກັນໃນຄັ້ງນີ້ແມ່ນເພື່ອເປັນການເພິ່ມທະວີມິດຕະພາບລະຫວ່າງ ສອງແຂວງ ຈໍາປາສັກ ແລະແຂວງເຊກອງ ແລະທັງເປັນການແລກປ່ຽນບົດຮຽນໃນຫຼາຍດ້ານ ເປັນຕົ້ນຊື່ການຈັດຕັ້ງປະຕິບັດແຜນພັດທະນາເສດຖະກີດ-ສັງຄົມ ຂອງແຂວງ ແລະວຽກງານການຕອບຕ້ານ ສະພາບການລະບາດຂອງພະຍາດໂຄວີດ-19 ທີ່ພວມມີການລະບາດໃນໄລຍະນີ້, ເຊີ່ງແຕ່ລະພາກສ່ວນໄດ້ມີຄວາມເອົາໄຈໃສ່ປະສານສົມທົບກັນເປັນຢ່າງດີ; ແລະໃນການການພົບປະຍັງໄດ້ປຶກສາຫາລື ຊຸກຍູ້ ສົ່ງເສີມ ກາເຟ ປາກຊ່ອງ-ທ່າແຕງ ເພື່ອເປັນສິນຄ້າສົ່ງອອກ, ວຽກງານການຂົນສົ່ງຜ່ານແດນລະຫວ່າງສອງແຂວງ ແລະສ້າງເງື່ອນໄຂອໍານວຍຄວາມສະດວກໃຫ້ແຕ່ລະຂະແໜງການ ເຮັດໃຫ້ເຖດຖະກີດ-ສັງຄົມຂອງສອງແຂວງໄດ້ຮັບການເຕີບໃຫຍ່ຂະຫຍາຍຕົວ ດ້ວຍບາດກ່າວທີ່ໜັກແໜ້ນ.

ໃນໂອກາດມາຢ້ຽມຢາມແຂວງເຊກອງໃນຄັ້ງນີ້ ທ່ານ ປອ. ວິໄລວົງ ບຸດດາຄຳ ເຈົ້າແຂວງໆຈຳປາສັກ ຍັງໄດ້ນໍາເອົາ ໜ້າກາກອະນາໄມ ຈໍານວນ 1200 ແຜ່ນ, ເຄື່ອງວັດແທກອຸນຫະພູມ ຈໍານວນ 10 ເຄື່ອງ ແລະເຈວລ້າງມື ຈໍານວນ 30 ຕຸກ ມອບໃຫ້ແຂວງເຊກອງ ເພື່ອນຳໄຊ້ເຂົ້າໃນການປ້ອງກັນ ການລະບາດຂອງພະຍາດໂຄວິດ-19 ໃຫ້ແກ່ແຂວງເຊກອງນໍາອີກດ້ວຍ.

ທີ່ມາ: ນັກຂ່າວຫ້ອງວ່າການແຂວງ