ໄຊຍະບູລີ ປືກສາຫາລື ປ້ອງກັນ ໂຄວິດພ້ອມສໍາເລັດຈຸດຂ້າເຊື້ອ119ຈຸດ

580

ຂປລ. ແຂວງໄຊຍະບູລີ ໄດ້ຈັດກອງປະຊຸມປືກສາຫາລື ໃນວັນທີ 4 ພຶດສະພາ 2020 ກ່ຽວກັບການສືບຕໍ່ຈັດຕັ້ງປະຕິບັດບັນດາມາດຕະການ ໃນການປ້ອງກັນ, ຄວບຄຸມ, ສະກັດກັນ ແລະ ແກ້ໄຂການລະບາດຂອງພະຍາດ ໂຄວິດ-19 ໃນໄລຍະປະຕິບັດມາດຕະການຜ່ອນຜັນຂອງລັດຖະບານ ລະຫວ່າງວັນທີ 4-17 ພຶດສະພາ ໂດຍມີ ທ່ານ ພົງສະຫວັນ ສິດທະວົງ ເຈົ້າແຂວງໄຊຍະບູລີ, ມີບັນດາຄະນະສະເພາະກິດຕ້ານ ແລະ ສະກັດກັ້ນພະບາດ ໂຄວິດ-19 ຂັ້ນແຂວງ ແລະ ຂັ້ນເມືອງ ເຂົ້າຮ່ວມ

ກອງປະຊຸມ ໄດ້ຜ່ານແຈ້ງການສະບັບເລກທີ 524/ຫສນຍ, ລົງວັນທີ 1 ພຶດສະພາ 2020, ວ່າດ້ວຍການສືບຕໍ່ປະຕິບັດບັນດາມາດຕະການ ໃນການປ້ອງກັນ, ຄວບຄຸມ, ສະກັດກັນ ແລະ ແກ້ໄຂການລະບາດຂອງພະຍາດ ໂຄວິດ-19 ໃນໄລຍະວັນທີ 4-17 ພຶດສະພາ 2020. ຈາກນັ້ນ, ບັນດາຜູ້ເຂົ້າຮ່ວມກໍໄດ້ມີການປຶກສາຫາລືຮ່ວມກັນ ເພື່ອສືບຕໍ່ຈັດຕັ້ງປະຕິບັດມາດຕະການດັ່ງກ່າວຢ່າງມີປະສິດທິຜົນ, ທັງນີ້ ກໍເພື່ອຮັບປະກັນບໍ່ໃຫ້ພະ ຍາດໂຄວິດ-19 ແຜ່ຂະຫຍາຍອອກເປັນວົງກວ້າງ, ເຮັດໃຫ້ຄົນໃນສັງຄົມກັບມາດຳລົງຊີວິດໄດ້ເປັນປົກກະຕິ.

ໂອກາດນີ້, ທ່ານ ນາງ ບຸນພັກ ອິນທະປັນ ຮອງເຈົ້າແຂວງ ໄຊຍະບູລີ ກໍໄດ້ລາຍງານຄວາມຄືບໜ້າໃນການສະກັດກັ້ນພະຍາດ ໂຄວິດ-19 ແຕ່ວັນທີ 17 ມີນາ ຫາ 3 ພຶດສະພາ 2020 ເຊິ່ງໄລຍະດັ່ງກ່າວ ແຂວງໄຊຍະບູລີ ມີຄົນເຂົ້າດ່ານສາກົນທັງໝົດ 10.262 ຄົນ ແລະ ເຂົ້າດ່ານປະເພນີ 428 ຄົນ, ທົ່ວແຂວງມີສູນກັກກັນບໍລິເວນ ທັງໝົດມີ 125 ສູນ, ຈໍານວນຜູ້ກັກກັນສະສົມຮອດວັນທີ 3 ພຶດສະພາ ມີທັງໝົດ 9.452 ຄົນ, ກັກກັນຢູ່ສູນ 8.258 ຄົນ, ກັກກັນຢູ່ບ້ານ 1.194 ຄົນ. ຮອດປະຈຸບັນຍັງມີຜູ້ກັກກັນ ຈໍານວນ 60 ຄົນ, ສູນກັກຫັນ 10 ສູນ, ໄດ້ສໍາເລັດຈຸດຂ້າເຊື້ອມີທັງໝົດ 119 ຈຸດ, ທົ່ວແຂວງໄດ້ເກັບຕົວຢ່າງທັງໝົດສົ່ງໄປກວດ 77 ຄົນ, ໃນນີ້ ນອນໂຮງໝໍ 24 ຄົນ, ຍິງ 8 ຄົນ, ຜູ້ສໍາພັດ 3 ຄົນ, ຍິງ 2 ຄົນ, ເຂົ້າຜ່ານດ່ານ 50 ຄົນ ແລະ ຜົນກວດຕົວຢ່າງທັງໝົດແມ່ນບໍ່ພົບເຊື້ອ.
ຂ່າວ-ພາບ: ອຸ່ນເຮືອນ ໂພທິລັກ
ຮູບໜ້າປົກເປັນຮູບປະກອບບໍ່ກ່ຽວກັບບົດ