ເມືອງລະຄອນເພັງ ໄດ້ຮັບທຶນໂຄງການກໍ່ສ້າງໂຮງໝໍນ້ອຍ ໃນມູນຄ່າ 600 ກວ່າລ້ານກີບ.

590

ໃນທ້າຍເດືອນເມສາ 2020 ນີ້ ຢູ່ທີ່ຈຸດສຸມບ້ານໜອງແສງ ເມືອງລະຄອນເພັງ ໄດ້ຈັດພິທີວາງສີລາລືກໂຄງການກໍ່ສ້າງໂຮງໝໍນ້ອຍຂຶ້ນ ໂດຍເຂົ້າຮ່ວມຂອງ ທ່ານ ສົມໃຈ ອຸ່ນຈິດ ເຈົ້າເມືອງລະຄອນເພັງ, ທ່ານ ໄຊຊະນະ ສີສະຫວັດ ຮອງເຈົ້າເມືອງຜູ້ຊີ້ນໍາຂົງເຂດວັດທະນະທຳສັງຄົມ, ມີບັນດາກຳມະການພັກເມືອງ, ຫົວໜ້າຈຸດສຸມ, ພະນັກງານຫ້ອງການສາທາ ແລະ ອົງການຈັດຕັ້ງທີ່ກ່ຽວຂ້ອງເຂົ້າຮ່ວມ.

ໃນນີ້ ຫ້ອງການສາທາຍັງແຈ້ງໃຫ້ຮູ້ຕື່ມອີກວ່າ: ໂຄງການກໍ່ສ້າງໂຮງໝໍນ້ອຍເປັນໂຄງການໜຶ່ງທີ່ໄດ້ບັນຈຸເຂົ້າໃນແຜນພັດທະນາເສດຖະກິດ-ສັງຄົມ 5 ປີຂອງເມືອງລະຄອນເພັງ, ໂຄງການກໍ່ສ້າງດັ່ງກ່າວແມ່ນໄດ້ທຶນມາຈາກປະຊາຊົນຍີ່ປຸ່ນ ລວມມູນຄ່າ 600 ກວ່າລ້ານກີບ ເຊິ່ງເປັນໂຄງການປຸກສ້າງໂຮງໝໍນ້ອຍຢູ່ບ້ານໜອງແສງ, ມີລວງຍາວ 16 ແມັດ, ລວງກວ້າງ 12 ແມັດ, ມີ 5  ຫ້ອງເຮັດວຽກຄື:

ຫ້ອງການ, ຫ້ອງຈ່າຍຢາ, ຫ້ອງກວດເຂດນອກ, ຫ້ອງນອນຄົນເຈັບ ແລະ ຫ້ອງປະສູດ. ທັງນີ້, ກໍເພື່ອກະກຽມຄວາມພ້ອມ, ຮັບໃຊ້ໃຫ້ບໍລິການຄົນມາປິ່ນປົວຂອງພໍ່ແມ່ປະຊາຊົນຊາວເມືອງລະຄອນເພັງ, ເວົ້າສະເພາະຢູ່ໃນຈຸດສຸມໜອງແສງ ເລີ່ມລົງມືຈັດຕັ້ງປະຕິບັດຕາມສັນຍາແຕ່ວັນທີ 30/3/2020 ຫາ ວັນທີ 30/9/2020 ໃນໄລຍະ 6 ເດືອນແມ່ນສໍາເລັດໃນການກໍ່ສ້າງ.

ນັກຂ່າວ ຫ້ອງການ ຖວທ ເມືອງ