ອັດຕະປື ຫາລືກະກຽມສະຖານທີ່ປິ່ນປົວຄົນເຈັບທີ່ເປັນພະຍາດ ໂຄວິດ-19

586

ໃນ​ຕອນ​ບ່າຍວັນທີ 27 ເມສາ 2020​ ນີ້ ຢູ່ຫ້ອງປະຊຸມຊັ້ນ 2 ພະແນກສາທາລະນະສຸກແຂວງ ໂດຍພາຍໃຕ້ການເປັນປະທານຮ່ວມຂອງ ທ່ານ ດຣ. ນາງ ອ່ອນຜິວ ໂພທິລາດ ຫົວໜ້າພະແນກສາທາລະນະສຸກແຂວງ ຮອງປະທານຄະນະສະເພາະກິດຂັ້ນແຂວງ, ທ່ານ ຮສ. ດຣ. ບົວເທບ ພູມມິນ ຮອງຫົວໜ້າກົມປິ່ນປົວກະຊວງສາທາລະນະສຸກ, ທ່ານ ປທ. ອິນປັນ ອິນທິລາດ ຮອງຫົວໜ້າພະແນກສາທາລະນະສຸກແຂວງ ຫົວໜ້າກອງເລຂາຄະນະສະເພາະກິດຂັ້ນແຂວງ, ມີບັນດາທ່ານຮອງຫົວໜ້າພະແນກ, ອຳນວຍການໂຮງໝໍແຂວງ, ທີມງານກະຊວງສາທາລະນະສຸກ, ກອງເລຂາ ແລະ ວິຊາການທີ່ກ່ຽວຂ້ອງເຂົ້າຮ່ວມທັງໝົດ 11 ທ່ານ ຍິງ 5 ທ່ານ.

ໃນ​ກອງປຶກສາຫາລື ກ່ຽວກັບກະກຽມສະຖານທີ່ປິ່ນປົວ( ແຜນ1, ແຜນ2 ) ສຳລັບຄົນເຈັບທີ່ເປັນພະຍາດອັກເສບປອດຈາກເຊື້ອຈຸລະໂລກສາຍພັນໄໝ່ໂຄໂລນາ ໄວຣັສ (COVID-19). ເຫັນດີກຳນົດຈຸດປິ່ນປົວຄົນເຈັບທີ່ເປັນພະຍາດ COVID-19 ຢູ່ຈຸດໂຮງໝໍແຂວງ ຈຸດດຽວ ໂດຍກຳນົດເອົາຕຶກຕ່າງໆດັ່ງນີ້:

ສືບຕໍ່ເອົາຕຶກລ້ຽງເດັກໂຮງໝໍແຂວງທີ່ໄດ້ກຳນົດໄວ້ນັ້ນເປັນບ່ອນປິ່ນປົວຕົ້ນຕໍ ໂດຍໃຫ້ດັດແປງ, ປັບປຸງບາງຈຸດເພື່ອໃຫ້ຖືກຕ້ອງຕາມຫຼັກການວິຊາສະເພາະ, ເອົາຕຶກອາຫານ ມາເປັນຕຶກປິ່ນປົວຄົນເຈັບທີ່ເປັນພະຍາດ COVID-19 ໂດຍໃຫ້ຜູ້ຮັບເໝົາໃນການຂາຍອາຫານແມ່ນໃຫ້ເຂົາເຈົ້າເຄື່ອນຍ້າຍໄປຂາຍຢູ່ຈຸດອື່ນ ໂດຍໃຫ້ໂຮງໝໍແຂວງອຳນວຍຄວາມສະດວກ, ເອົາຕຶກເດັກ, ຕຶກພາຍໃນເປັນຕຶກສຳຮອງໃນກໍລະນີມີການລະບາດຫຼາຍ, ກະກຽມຫ້ອງປະສູດ ແລະ ຫ້ອງຜ່າຕັດໄວ້ຮອງຮັບກໍລະນີມີຄົນເຈັບຕິດພະຍາດ COVID-19 ມາເກີດລູກ ຫຼື ຜ່າຕັດ, ພາຍຫຼັງເກີດລູກ ແລະ ຜ່າຕັດ ສຳເລັດ ແມ່ນຈະໃດ້ທໍາການຂ້າເຊື້ອແລ້ວຈຶ່ງໄວ້ບໍລິການຄົນເຈັບທົ່ວໄປ ( ຄົນເຈັບດັ່ງກ່າວແມ່ນສົ່ງຕົວໄປຢູ່ຕຶກປິ່ນປົວພະຍາດ COVID-19 ສະເພາະ ).

ໃຫ້ເຄື່ອນຍ້າຍຄົນເຈັບໄປຕຶກອື່ນ ຫຼື ໄປຝາກຢູ່ຈຸດບໍລິການໂຮງໝໍທະຫານແຂວງ, ໂຮງໝໍຊຸມຊົນ, ກຳນົດຂອບເຂດ ແລະ ເຄື່ອງໝາຍຕິດກາໃສ່ຕຶກປິ່ນປົວຄົນເຈັບ COVID-19 ສະເພາະ ( ຕາມເຕັກນິກວິຊາການ ) ສະເພາະເຂດນີ້ຫ້າມບຸກຄົນທີ່ບໍ່ກ່ຽວຂ້ອງເຂົ້າໄປເດັດຂາດ, ກຳນົດບຸກຄະລາກອນທາງການແພດ ທີມຕົ້ນຕໍ ແລະ ທີມສຳຮອງ ( ຕາມເຕັກນິກວິຊາການ ) ຕື່ມ​ອີກ.

ຂ່າວ​:ບັງ​ອອນ ສ​ທ​ຂ