ກຸ່ມບໍລິສັດ ພົງຊັບທະວີ ມອບເຄື່ອງຊ່ວຍເຫຼືອໃຫ້ແຂວງອັດຕະປື ມູນຄ່າ 200 ລ້ານກີບ.

582

ກຸ່ມບໍລິສັດ ພົງຊັບທະວີ ຈໍາກັດ ໄດ້ນໍາເອົາອຸປະກອນທາງການແພດມາມອບໃຫ້ແຂວງອັດຕະປືປະກອບມີ: ຜ້າອັດປາກ-ອັດດັງ 1.000 ກັບ, ຜ້າອັດປາກ N95 ຈໍານວນ 350 ອັນ, ເຈວລ້າງມື 10 ກ່ອງ, ຖົງມື 2 ແກັດ ຈໍານວນ 200 ອັນ, ເຄື່ອງແທກອຸນຫະພູມ 3 ອັນ, ແວ່ນຕາປ້ອງກັນພະຍາດ 100 ອັນ ລວມມູນຄ່າທັງໝົດ 200 ລ້ານກວ່າກີບ ເພື່ອເປັນການປະກອບສ່ວນໃນການປ້ອງກັນການລະບາດຂອງພະຍາດໂຄວິດ-19.

ພິທີມອບ-ຮັບເງິນດັ່ງກ່າວໄດ້ຈັດຂຶ້ນໃນວັນທີ 27 ເມສາ 2020 ນີ້ ທີ່ພະແນກສາທາລະນະສຸກແຂວງອັດຕະປື ໃຫ້ກຽດມອບໂດຍທ່ານ ສີສະຫວັດ ສີລາວົງ ຕາງໜ້າກຸ່ມບໍລິສັດ ພົງຊັບທະວີ ຈໍາກັດ ແລະ ກ່າວຮັບໂດຍ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ທັງເປັນຮອງປະທານຄະນະສະເພາະກິດປ້ອງກັນ ແລະ ຄວບຄຸມການແຜ່ລະບາດຂອງພະຍາດໂຄວິດ-19 ຂັ້ນແຂວງ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມ.

ໂອກາດນີ້, ທ່ານ ອຸ່ນຫຼ້າ ໄຊຍະສິດ ກໍ່ໄດ້ກ່າວແດງຄວາມຂອບໃຈມາຍັງກຸ່ມບໍລິສັດ ພົງຊັບທະວີ ຈໍາກັດ ທີ່ມີເປັນສ່ວນໜຶ່ງໃນການປະກອບສ່ວນຊ່ວຍເຫຼືອແຂວງອັດຕະປືໃນການຕອບໂຕ້ ແລະ ປ້ອງກັນ ດັ່ງກ່າວບໍ່ໃຫ້ເກີດຂຶ້ນຢູ່ພາຍໃນແຂວງ ແລະ ຈະນໍາໃຊ້ເຂົ້າໃນວຽກງານດັ່ງກ່າວໃຫ້ຖືກເປົ້າໝາຍ ແລະ ເກີດປະໂຫຍດສູງສຸດ.

(ເນື້ອໃນ-ພາບ: ວັດທະນາ)