ຮອງລັດຖະມົນຕີກະຊວງການເງິນ ຕ້ອນຮັບເອກອັກຄະລາຊະທູດຍີ່ປຸ່ນ ປະຈໍາລາວ

590

ທ່ານ ບຸນໂຈມ ອຸບົນປະເສີດ ຮອງລັດຖະມົນຕີກະຊວງການເງິນ ໄດ້ຕ້ອນຮັບການຢ້ຽມຂໍ່ານັບຂອງທ່ານ ກີໂຊ ຕາເກວາກະ ເອກອັກຄະລາຊະທູດຍີ່ປຸ່ນປະຈໍາ ສປປ ລາວ ພ້ອມດ້ວຍຄະນະເຂົ້າຢ້ຽມຂໍ່ານັບ ເພື່ອປຶກສາຫາລືແລກປ່ຽນບົດຮຽນກ່ຽວກັບມາດຕະການຕ່າງໆໃນການຄວບຄຸມການແຜ່ລະບາດຂອງເຊື້ອພະຍາດໂຄວິດ-19.

ໂອກາດນີ້, ທ່ານ ບຸນໂຈມ ອຸບົນປະເສີດ ໄດ້ສະແດງຄວາມຕ້ອນຮັບຄະນະເອກອັກຄະລາຊະທູດຍີ່ປຸ່ນປະຈໍາ ສປປ ລາວ ແລະ ສະແດງຄວາມຂອບໃຈຕໍ່ທ່ານ ກີໂຊ ຕາເກວາກະ ທີ່ມີຄວາມຫວ່ງໃຍໃນການຈັດຕັ້ງຂອງລັດຖະບານກໍ່ຄືຊີວິດການເປັນຢູ່ຂອງປະຊາຊົນລາວທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດໂຄວິດ 19. ປັດຈຸບັນ, ລັດຖະບານລາວ ແມ່ນໄດ້ມີການເຝົ້າລະວັງຢ່າງຄັ່ງຄັດໃນການກວດກາຕິດຕາມ ແລະ ວາງມາດຕະການກ່ອນມີການແຜ່ລະບາດ ເປັນຕົ້ນ: ໄດ້ອອກຄໍາສັ່ງເລກທີ່ 06/ນຍ ໃຫ້ມີການເຝົ້າລະວັງຢ່າງເຂັ້ມງວດ, ໄດ້ແຕ່ງຕັ້ງຄະນະຮັບຜິດຊອບໂດຍສະເພາະແຕ່ງຕັ້ງຄະນະຄວບຄຸມການແຜ່ລະບາດຂອງໂຄວິດ-19 ແລະ ຄະນະຄົ້ນຄວ້າຜົນກະທົບທາງດ້ານເສດຖະກິດ, ພ້ອມທັງຄົ້ນຄວ້ານະໂຍບາຍແກ້ໄຂໃຫ້ພາກສ່ວນທຸລະກິດ, ນະໂຍບາຍຊ່ວຍເຫຼືອສັງຄົມກໍ່ຄືຜູ້ທີ່ຂາດລາຍໄດ້ ໂດຍໃຊ້ງົບປະມານເປັນຈໍານວນຫຼາຍໃນການແກ້ໄຂຜົນກະທົບດັ່ງກ່າວ.

ຂະນະທີ່ ທ່ານ ເອກອັກຄະລາຊະທູດຍີ່ປຸ່ນປະຈໍາ ສປປ ລາວ, ໄດ້ສະແດງຄວາມຊົມເຊີຍລັດຖະບານລາວ ກໍ່ຄືຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ທີ່ສະໜອງຂໍ້ມູນໃນແຕ່ລະມື້ໄດ້ຢ່າງວ່ອງໄວ ແລະ ທັນກັບສະພາບການ; ພ້ອມທັງສະແດງຄວາມເປັນຫ່ວງເປັນໄຍທາງດ້ານເສດຖະກິດຂອງລາວທີ່ໄດ້ຮັບຜົນກະທົບຈາກການແຜ່ລະບາດຂອງເຊື້ອພະຍາດດັ່ງກ່າວ ເຊິ່ງລັດຖະບານຢີ່ປຸ່ນກໍ່ຍິນດີສືບຕໍ່ໃຫ້ການສະໜັບສະໜູນ ແລະ ຊ່ວຍເຫຼືອ. ນອກຈາກນັ້ນ, ທ່ານຍັງໄດ້ມີຄວາມສົນໃຈໃນຫຼາຍບັນຫາໃນການແກ້ໄຂສະພາບທາງດ້ານເສດຖະກິດຂອງລາວ. ທັງນີ້, ກໍ່ພື່ອນໍາເອົາຂໍ້ມູນທີ່ໄດ້ນໍາໄປຄົ້ນຄວ້າເພື່ອຫາທາງຊ່ວຍເຫຼືອຮ່ວມກັນລະຫວ່າງລັດຖະບານລາວ-ຢີ່ປຸ່ນ.

ພ້ອມດຽວກັນນີ້, ທ່ານ ບຸນໂຈມ ອຸບົນປະເສີດ ຍັງໄດ້ຮັບເງິນຊ່ວຍເຫຼືອຈາກອະດິດນັກສຶກສາຈາກປະເທດຢີ່ປຸ່ນ ຈໍານວນ 20 ລ້ານກີບ ເພື່ອຮ່ວມເປັນສ່ວນໜຶ່ງໃນການຕ້ານການແຜ່ລະບາດຂອງພະຍາດໂຄວິດ-19, ຊຶ່ງຕາງໜ້າມອບໂດຍ ທ່ານ ປອ. ພອນແກ້ວ ຈັນທະມາລີ ອະດີດປະທານສະມາຄົມ ນັກສຶກສາລາວຈາກຢີ່ປຸ່ນພ້ອມດ້ວຍຄະນະ. ພິທີດັ່ງກ່າວຈັດຂຶ້ນໃນວັນທີ 24 ເມສາ 2020 ທີ່ກະຊວງການເງິນ.

(ເນື້ອໃນ-ພາບ: ອາພັດສະລາ)