ສະຫຼອງວັນຊັບສິນທາງປັນຍາໂລກ ພາຍໃຕ້ຄໍາຂວັນ: “ນະວັດຕະກໍາ ເພື່ອສ້າງອະນາຄົດສີຂຽວ’’

530

ໃນວັນທີ 26 ເມສາ ຂອງທຸກປີ ພວກເຮົາຈະສະເຫຼີມ​ສະ​ຫຼອງວັນຊັບສິນທາງປັນຍາໂລກ ເພື່ອເປັນການເຜີຍ​ແຜ່ໃຫ້ເຫັນເຖິງບົດບາດຂອງສິດຊັບສິນທາງປັນຍາຕໍ່ການສົ່ງເສີມນະວັດຕະກຳ ແລະ ຫົວຄິດປະດິດສ້າງ ເຊິ່ງລາວເຮົາກໍ່ໄດ້ເປັນສະມາຊິກຂອງອົງການດັ່ງກ່າວ. ສໍາລັບຄຳຂວັນຂອງວັນຊັບສິນທາງປັນຍາໂລກໃນປີ 2020 ແມ່ນເນັ້ນເອົານະວັດຕະກຳ ແລະ ຊັບສິນທາງປັນຍາ ໃຫ້ກາຍເປັນໝາກຫົວໃຈໃນການຊຸກຍູ້ຄວາມພະຍາຍາມເພື່ອສ້າງອະນາຄົດສີຂຽວ.

ກະຊວງວິທະຍາສາດ ແລະ ເຕັກໂນໂລຊີ ໄດ້ເຜີຍແຜ່ນບົດສູນທອນພົດຂອງຜູ້ອໍານວຍການໃຫຍ່ ອົງການຊັບສິນທາງປັນຍາໂລກ ພາຍໃຕ້ຄໍາຂວັນ: “ນະວັດຕະກໍາ ເພື່ອສ້າງອະນາຄົດສີຂຽວ’’ ໃນວັນສະຫຼອງວັນຊັບສິນທາງປັນຍາໂລກປີ​ນີ້ວ່າ: ທົ່ວໂລກ​ກໍາລັງຊອກຫາວິທີເຮັດໃຫ້ລະບົບ​ຊັບ​ສິນ​ທາງ​ປັນຍາມີ​ຄວາມ​ສົມ​ດຸນ ​ແລະ ​ເຂັ້ມ​ແຂງ ​ເພື່ອສົ່ງ​ເສີມ​ການຂະຫຍາຍຕົວ​ຂອງເສດຖະກິດ​ສີຂຽວທີ່​ຮັກສາ ແລະ ບໍ່ທຳລາຍ​ລະບົບຊັບພະຍາກອນ​ທໍາ​ມະ​ຊາດ​ຂອງ​ໂລກ. ນອກນັ້ນ, ຍັງຊອກ​ຫາວິທີ​ການ​ນໍາ​ໃຊ້​ລະບົບ​ສິດທິ​ບັດ ​ເພື່ອ​ສົ່ງ​ເສີມ​ການ​ປ່ຽນ​ແປງ​ໃໝ່​ໃນ​ການ​ພັດທະນາ ​ແລະ ການ​ເຜີຍ​ແຜ່​ເຕັກ​ໂນ​ໂລ​ຊີທີ່​ເປັນ​ມິດ​ກັບ​ສິ່ງ​ແວດ​ລ້ອມ ​ເພື່ອ​​ເຂົ້າ​ຊ່ວຍ​ໃນ​ການ​ແກ້​ໄຂ​ວິ​ກິດ​ການ​ປ່ຽນແປງຂອງດິນ​ຟ້າ​ອາກາດ ​ແລະ ສ້າງ​ອະນາ​ຄົດ​ສີຂຽວ.

ໃນສ່ວນຂອງການຄິດຄົ້ນ​ໃນ​ການອອກ​ແບບ ແລະ ສິດໃນການປົກປ້ອງແບບ​ລວມເຂົ້າກັນ ​ເພື່ອ​ເປັນ​ການສົ່ງ​ເສີມການ​ນໍາ​ໃຊ້​ຊັບພະຍາກອນທໍາ​ມະ​ຊາດ​ຢ່າງ​ຄຸ້ມ​ຄ່າ ​ແລະ ຊ່ວຍ​ໃຫ້​ນັກ​ອອກແບບສາ​ມາດ​ນໍາ​ໃຊ້​ເວລາ ​ແລະ ຄວາ​ມສາມາດ​ຂອງ​ເຂົາ​ເຈົ້າ​ເຂົ້າ​ໃນ​ການ​ສ້າງຜະລິດ​ຕະພັນ​ທີ່​ເປັນ​ປະ​ໂຫຍ​ດ, ມີຄວາມໜ້າສົນ​​ໃຈ ​ແລະ ​ເປັນ​ມິດ​ກັບ​ສິ່ງ​ແວດ​ລ້​ອມ. ນອກນັ້ນ, ອົງການຊັບສິນທາງປັນຍາໂລກ ຍັງ​ພິຈາລະນາ​ຊອກຫາວິທີ​ການ​ນໍາ​ໃຊ້​ເຄື່ອງໝາຍການ​ຄ້າ ​ແລະ ການບົ່ງຊີ້ຕ່າງໆ ເພື່ອ​ຊ່ວຍຊຸກຍູ້​ການຂະຫຍາຍຕົວ ແລະ ຈະເລີນເຕີບໂຕຂອງ​ທຸລະ​ກິດ​ທີ່ມີ​ພື້ນຖານໃນການຮັກສາສິ່ງ​ແວດລ້ອມ ເພື່ອສົ່ງເສີມພວກເຂົາໃຫ້​ສາມາດ​ຜະລິດ​ສິນຄ້າ ​ແລະ ການ​ບໍລິການ​ທີ່​ເປັນ​ມິດ​ກັບ​ສິ່ງ​ແວດ​ລ້ອ​ມ​ໃຫ້​ຫຼາຍຂຶ້ນ.

ພວກ​ເຮົາ​ເຫັນ​ວ່າ​ສິດທິ​ຕ່າງໆ ​ເຊັ່ນ: ການພັດທະນາສິນຄ້າ​ຖິ່ນ​ກຳ​ເນີດ ​ເປັນ​ການ​ຊຸກຍູ້​ສົ່ງ​ເສີມ​ການ​ນໍາ​ໃຊ້​ຊັບພະຍາກອນ​ທຳ​ມະ​ຊາດ​ແບບ​ຍືນ​ຍົງ ​ແລະ ສິດຂອງນັກ​ປັບປຸງ​ພັນ​ພືດໃໝ່ ​ຊ່ວຍເປັນ​ກຳລັງແຮງທີ່​ສໍາຄັນ​ໃນ​ການ​ສົ່ງ​ເສີມ​ພັດທະນາ​ພືດໃຫ້​ທົນ​ທານຫຼາຍຂຶ້ນ​ ເພື່ອ​ຮອງຮັບຄວາມໝັ້ນຄົງ​ດ້ານ​ສະບຽງອາ ຫານ​ຂອງ​ໂລກ. ຄຽງຄູ່ກັນນັ້ນ, ຍັງສັງ​ເກດ​ເຫັນວ່ານັກປະດິດຄິດແຕ່ງ​ຜູ້​ທີ່​ນໍາ​ໃຊ້​ລະບົບຂອງລິ​ຂະ​ສິດ ສາມາດ​ຫາ​ລ້ຽງຊີບ​ໄດ້​ ເຊິ່ງ​ມີ​ບົດ​ບາດ​ສຳຄັນ​ໃນ​ການ​ສ້າງ​ວິ​ໄສ​ທັດ​​ແຫ່ງ​ອານາ​ຄົດ​ສີຂຽວ ​ແລະ ຜົນ​ປະ​ໂ​ຫຍດຢ່າງຫຼວງຫຼາຍທີ່ບໍ່ສາມາດພັນລະນາ ແລະ ນັບໄດ້.

(ເນື້ອໃນ-ພາບ: ທັດສະນີ ພົງປະດິດ)