ໜ່ວຍງານງົບປະມານ ລົງກວດກາອຸປະກອນການແພດ-ເຄື່ອງຊ່ວຍເຫຼືອຕ້ານໂຄວິດ-19

516

ໃນຕອນບ່າຍວັນທີ 24 ເມສາ 2020 ນີ້, ທ່ານ ບຸນໂຈມ ອຸບົນປະເສີດ ຮອງລັດຖະມົນຕິີກະຊວງການເງິນ, ຫົວໜ້າໜ່ວຍງານງົບປະມານ ແລະ ພະລາທິການ ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແຜ່ລະບາດຂອງເຊື້ອພະຍາດໂຄວິດ-19 ພ້ອມດ້ວຍຄະນະໄດ້ເຄື່ອນໄຫວເຮັດວຽກກວດກາເບິ່ງອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆທີ່ສາງພະລາທິການການແພດເຂດດົງໂພສີ ນະຄອນຫຼວງວຽງຈັນ.

ເຊິ່ງໃຫ້ກຽດການຕ້ອນຮັບ ແລະ ລາຍງານໂດຍສັງເຂບຂອງທ່ານ ນາງ ມະນີສອນ ໄຊຍະເສນ ຫົວໜ້າຂະແໜງພະລາທິການການແພດ ກ່ຽວກັບອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆ, ລະບົບສາງຕົວຈິງທີ່ໄດ້ມີການເກັບມ້ຽນພາຍໃນສາງ, ພ້ອມທັງສະເໜີລະບົບບັນຊີອອນລາຍ, ການບັນທຶກການຮັບເຄື່ອງຊ່ວຍເຫຼືອຕ່າງໆ; ໂດຍພາຍໃນສູນດັ່ງກ່າວ, ປະກອບມີສາງເກັບມ້ຽນອຸປະກອນການແພດແບບຫ້ອງຕິດຕັ້ງເຄື່ອງປັບອາກາດ ຫຼື ສາງເຢັນ ແລະ ມີສາງເກັບມ້ຽນທຳມະດາ.

ໂອກາດດຽວກັນ, ທ່ານ ບຸນໂຈມ ອຸບົນປະເສີດ ໄດ້ໃຫ້ສຳພາດຕໍ່ສື່ມ່ວນວ່າ: ການລົງມາເຮັດວຽກຢູ່ສູນດັ່ງກ່າວນີ້ ເພື່ອເປັນການກວດກາເບິ່ງຕົວຈິງບັນດາຂະບວນການເກັບຮັກສາອຸປະກອນການແພດ ແລະ ເຄື່ອງຊ່ວຍເຫຼືອຕ່າງໆທີ່ໄດ້ຮັບການຊ່ວຍເຫຼືອຈາກພາກສ່ວນຕ່າງໆ, ພ້ອມທັງຕິດຕາມລະບົບເອເລັກໂທຣນິກໃນການຮັບເອົາເຄື່ອງຊ່ວຍເຫຼືອຈາກພາກສ່ວນຕ່າງໆເຂົ້າມາໃນສາງ, ຂະບວນການລົງບັນຊີ, ການຈັດສັນອຸປະກອນແຕ່ລະປະເພດ, ເພື່ອຮັບປະກັນບໍ່ໃຫ້ຕົກເຮ່ຍເສຍຫາຍ, ທວງທັນກັບສະພາບການ.

ສຳລັບອຸປະກອນການແພດ ຈະໄດ້ມີການຈັດສົ່ງແຈກຢາຍໃຫ້ບັນດາໂຮງໝໍ, ເມືອງແຂວງຕ່າງໆທີ່ມີຄວາມຕ້ອງການຕາມແຜນງານຈຸດສຸມ, ພ້ອມນັ້ນເພື່ອລົງເກັບກຳຈຳນວນເຄື່ອງທີ່ຍັງຄ້າງຢູ່ສາງອັນເຫັນວ່າໃດມີຄວາມຈຳເປັນຢ່າງຮີບດ່ວນໃນການຈັດຊື້ ເຊິ່ງໃນປັດຈຸບັນ ຄະນະສະເພາະກິດໄດ້ຕົກລົງແຕ່ງຕັ້ງຄະນະຈັດຊື້ຈັດຈ້າງ ເພື່ອຈັດຊື້ອຸປະກອນທາງການແພດເຂົ້າມາ ເພື່ອຕ້ານການແຜ່ລະບາດຂອງເຊື້ອໄວຣັດໂຄວິດ-19 ຢູ່ສປປ ລາວໃຫ້ໝົດໄປ.