ລ້ານ​ຊ້າງ ມີ​ເນ​ໂຣນ​ສ໌ ສະ​ໜັບ​ສະ​ໜູນວຽກ​ງານ​ປ້ອງກັນ​​ພະ​ຍາດ​ໂຄວິດ-19

672

ໃນ​ອາ​ທິດຜ່ານມາ​ນີ້, ບໍ​ລິ​ສັດ ລ້ານ​ຊ້າງ ມີ​ເນ​ໂຣນ​ສ໌ ລິ​ມິ​ເຕັດ (ບໍ່​ຄຳທອງ​ເຊ​ໂປນ) ໄດ້​ມອບ​ອຸ​ປະ​ກອນເຄື່ອງ​ມື​ປ້ອງ​ກັນ​ການ​ລະ​ບາດ COVID-19 ໃຫ້​ແກ່ເມືອງວິ​ລະ​ບູ​ລີ ແລະ ແຂວງ​ສະ​ຫວັນ​ນະ​ເຂດ ເຊິ່ງ​ເປັນ​ທີ່​ຕັ້ງ​ຂອງໂຄງ​ການ​ຂຸດ​ຄົ້ນ​ຜະ​ລິດ​ຄຳທອງ​ເຊ​ໂປນ. ສໍາລັບອຸ​ປະ​ກອນເຄື່ອງ​ມື​ທີ່ມອບ​​ມີ​ມູນ​ຄ່າ​ລວມ 142.000.000 ກີບ. ໃນ​ນັ້ນ, ມອບ​ໃຫ້​ເມືອງວິ​ລະ​ບູ​ລີ ​ມູນ​ຄ່າ 44.500.000 ​ກີບ ປະກອບ​ມີ: ໜ້າ​ຜ້າອັດປາກອະ​ນາ​ໄມ, ເຄື່ອງກວດ​ອຸນ​ຫະ​ພູມ​ຮ່າງ​ກາຍ, ນ້ຳ​ຢາ​ລ້າງ​ມື, ເຄື່ອງ​ສະ​ເປ​​ຢາ​ຂ້າ​ເຊື້ອ​ໄຟ​ຟ້າ ແລະ ນ້ຳ​ຢາ​ຂ້າ​ເຊື້ອ.

ທ່ານ ສະໝານ ອະເນກາ, ຜູ້ອຳນວຍການໃຫຍ່ຂອງ ບໍ​ລິ​ສັດ ລ້ານ​ຊ້າງມີ​ເນ​ໂຣນ​ສ໌ ໄດ້ກ່າວວ່າ: ທາງ​ບໍ​ລິ​ສັດພວກເຮົາຫວັງ​ເປັນ​ຢ່າງ​ຍິ່ງວ່າ ​ອຸ​ປະ​ກອນເຄື່ອງ​ມື​ທີ່​ຈຳ​ເປັນ​ເຫຼົ່າ​ນີ້ຈະ​ປະ​ກອບ​ສ່ວນ​ໃນການ​ຮັບ​ມືກັບ​ການ​ລະ​ບາດ​ COVID-19 ແລະ ທັງ​ຈະ​ຊ່ວຍ​ໃຫ້ພະ​ນັກ​ງານ​​ໃນແຖວ​ໜ້າກໍ​ຄື​ແພດ​ໝໍ ແລະ ປະ​ຊາ​ຊົນ​ເມືອງວິ​ລະ​ບູ​ລີ ແລະ ແຂວງ​ສະ​ຫວັນ​ນະ​ເຂດໄດ້​​ຮັບ​ຄວາມສະ​ດວກຍິ່ງ​ຂຶ້ນ.

ກ່ອນໜ້ານັ້ນ, ໃນ​ເດືອນກຸມ​ພາ 2020 ຜ່ານມາ ​ທາງບໍ​ລິ​ສັດກໍ່ໄດ້​ມອບ​ເງິນ 15.000 ໂດລາສະ ຫາລັດໃຫ້​ກະ​ຊວງ​ພະ​ລັງ​ງານ ແລະ ບໍ່​ແຮ່ ເພື່ອປະ​ກອບ​ສ່ວນ​​ເຂົ້າໃສ່ທຶນ​ທີ່ທາງ​ສະ​ມາ​ຄົມ​ມິດ​ຕະ​ພາບ​ລາວຈີນ ຮ່ວມ​ກັບນະ​ຄອນຫຼວງວຽງ​ຈັນ​ໄດ້​ຈັດ​ຂຶ້ນ ເພື່ອ​ລະ​ດົບ​ທຶນ​ໄປ​ຊ່ວຍ​ເຫຼືອ​ປະ​ຊາ​ຊົນ​ຜູ້​ປະ​ສົບ​ເຄາະ​ຮ້າຍ​ຈາກ​ພະ​ຍາດ​​ COVID-19 ຢູ່ ສ​ປ ຈີນ. ມາຮອດປັດຈຸບັນ, ລ້ານຊ້າງມິເນໂຣນສ໌ ມີ​ຄວາມ​ມຸ່ງ​ໝັ້ນໃນການ​ປົກ​ປ້ອງພະ​ນັກ​ງານ ແລະ ຊຸມ​ຊົນ​ອ້ອມຂ້າງບໍ່ແຮ່ພວກເຮົາໃຫ້​ມີຄວາມປອດ​ໄພ ແລະ ບໍ່ສ່ຽງ​ຕໍ່​ການ​ຕິດ​ເຊື້ອ​ພະ​ຍາດ COVID-19.