ອັດຕະປື ລາຍງານການປ້ອງກັນ ແລະ ຄວບຄຸມພະຍາດໂຄວິດ-19

543

ການຈັດຕັ້ງປະຕິບັດ ຄໍາສັ່ງເລກທີ 06/ນຍ ແລະ ຄຳສັ່ງເພີ່ມເຕີມ ເລກທີ 09/ຈຂ.ອປ ໄລຍະທີ I ກ່ຽວກັບການປ້ອງກັນ ແລະ ຄວບຄຸມພະຍາດໂຄວິດ-19 ຢູ່ແຂວງອັດຕະປືແມ່ນຍັງຢູ່ໃນມາດຕາການຄວບຄຸມໄດ້ຢ່າງເຂັ້ມງວດ ຍ້ອນພາບການລະບາດຂອງພະຍາດໂຄວິດ-19 ຍັງສືບຕໍ່ແຜ່ຂະຫຍາຍເປັນວົງກວ້າງ ເຊິ່ງມີທັງກໍລະນີຕິດເຊື້ອ ແລະ ເສຍຊີວິເພີ່ມຂຶ້ນແຕ່ລະວັນໃນປັດຈຸບັນ.

ທ່ານ ອິນປັນ ອິນທິລາດ ຫົວໜ້າກອງເລຂາສະເພາະກິດຕ້ານ ແລະ ຄວບຄຸມພະຍາດໂຄວິດ-19 ເເຂວງອັດຕະປືລາຍງານຜົນການຈັດຕັ້ງປະຕິບັດຜ່ານມາວ່າ: ນັບເເຕ່ວັນທີ 13 ເມສາ 2020 ມາເຖິງປັດຈຸບັນນີ້ ແຂວງອັດຕະປືໄດ້ເອົາໃຈໃສ່ປະຕິບັດມາດຕະການປ້ອງກັນຢ່າງເຂັ້ມງວດ ໂດຍສະເພາະແມ່ນວຽກງານການກວດກັ່ນກອງຄົນເຂົ້າເມືອງຢູ່ດ່ານສາກົນ ແລະ ດ່ານລະຫວ່າງເເຂວງຕໍ່ເເຂວງ, ໄດ້ກວດກັ່ນກອງຄົນເຂົ້້າເມືອງແຕ່ລະດ່ານມີດັ່ງນີ້:

ກວດກັ່ນກອງຄົນເຂົ້າ-ອອກດ່ານສາກົນພູເກືອ 11.066 ຄົນ; ດ່ານຫຼັກ 52 ເມືອງສາມັກຄີໄຊ ເຂົ້າ 2.097 ຄົນ ແລະ ອອກ 279 ຄົນ; ບ້ານພອນມະນີ ແລະ ບ້ານໄຊດອນໂຂງ ມີຄົນເຂົ້າ 488 ຄົນ ແລະ ອອກ 424 ຄົນ ເຊິ່ງຈຳນວນຄົນເຂົ້າ-ອອກ ທັງໝົດແມ່ນບໍ່ພົບກໍລະນີສົງໃສພະຍາດໂຄວິດ-19; ກວດກັ່ນກອງປົກກະຕິຢູ່ໂຮງໝໍແຂວງ ແລະ ໂຮງໝໍເມືອງທັງໝົດຈໍານວນ 6.666 ຄົນ, ມີກໍລະນີສົງໃສ 08 ຄົນ ແລະ ໄດ້ເກັບຕົວຢ່າງໄປກວດວິເຄາະແລ້ວ ມ່ນບໍ່ພົບເຊື້ອທັງ 8 ຄົນ. ຄຽງຄູ່ກັນນັ້ນ, ອັດຕະປື ຂອງພວກເຮົາແມ່ນມີສູນກັກກັນທັງໝົດ 12 ຈຸດ ແລະ ມີຈຳນວນຄົນທັງໝົດ 239 ຄົນ ແລະ ໄດ້ຢູ່ກັກໂຕຄົບ 14 ວັນເເລ້ວ ແລະ ທາງພາກສ່ວນທີ່ກ່ຽວຂ້ອງໄດ້ອະນຸຍາດໃຫ້ກັບບ້ານທັງໝົດເເລ້ວ, ສ່ວນການກັກກັນເເຮງງານຢູ່ເຮືອນ ເເລະ ຢູ່ບ້ານຂອງຕົນເອງມີ 206 ຄົນ, ຢູ່ຄົບ 14 ວັນແລ້ວ ຈຳນວນ 202 ຄົນ ແລະ ຍັງອີກ 4 ຄົນ.

ທ່ານ ອິນປັນ ອິນທິລາດ ໃຫ້ຮູ້ຕື່ມອີກວ່າ: ຄະນະສະເພາະກິດຂັ້ນແຂວງອັດຕະປື ກໍ່ໄດ້ຫັນຄຳສັ່ງຂອງລັດຖະບານມາເປັນເເຈ້ງການຂອງແຂວງ ເລກທີ 02/ຄສກ ເພື່ອຕໍ່ເວລາອອກໄປອີກ 14 ວັນ ກໍຄື ຈົນເຖິງວັນທີ 3 ພຶດສະພາ 2020 ຂໍໃຫ້ທຸກຄົນເອົາໃຈໃສ່ສືບຕໍ່ປະຕິບັດຕາມເເຈ້ງການ ແລະ ທຸກຄົນຕ້ອງອາໄສຢູ່ເຮືອນເພື່ອຮັກສາສຸຂະພາບ ແລະ ປ້ອງກັນການແຜ່ກະຈາຍຂອງເຊື້ອພະຍາດ ທຸກຄົນຫາກຄິດວ່າອາດຕິດເຊື້ອພະຍາດ COVID-19 ເຊັ່ນ: ໄຂ້, ໄອ ແລະ ຫາຍໃຈຍາກ ໃຫ້ຕິດຕໍ່ຫາສາຍດ່ວນ 166 ທັນທີ ເພື່ອຂໍຄໍາແນະນໍາສິ່ງທີ່ຄວນປະຕິບັດຂັ້ນຕໍ່ໄປ.