2 ບໍລິສັດມອບອຸປະກອນຕ້ານພະຍາດ COVID-19 ໃຫ້ລັດຖະບານ

604

ເມື່ອວັນທີ 11 ເມສາ 2020 ຜ່ານມທີ່ກະຊວງການເງິນ, ບໍລິສັດ ເອບີ ກຣຸບ ແລະ ບໍລິສັດ ໂຊນາພານໍາເຂົ້າ ແລະ ສົ່ງອອກສິນຄ້າທຸກປະເພດ ຈຳກັດຜູ້ດຽວ, ໄດ້ມອບອຸປະກອນປະເພດຜ້າອັດປາກ-ອັດດັງ, ເຄື່ອງນຸ່ງຊຸດປ້ອງກັນ 40 ຊຸດ,ແວ່ນຕາປ້ອງກັນ 300 ອັນ, ນໍ້າຢາຂ້າເຊື້ອຈໍານວນ 48 ຖັງ, ໃຫ້ລັດຖະບານສປປ ລາວ ນຳໃຊ້ເຂົ້າໃນການຕ້ານການແຜ່ລະບາດຂອງພະຍາດ COVID-19.

ໂດຍການກ່າວມອບຂອງທ່ານ ອາຊຽງ ເຊີນຊຽງ ອຳນວຍການໃຫຍ່ບໍລິສັດ ເອບີ ກຣຸບ ແລະ ທ່ານ LIU YAXU ຜູ້ອຳນວຍການໃຫຍ່ບໍລິສັດ ໂຊນາພານໍາເຂົ້າ ແລະ ສົ່ງອອກສິນຄ້າທຸກປະເພດ ຈຳກັດຜູ້ດຽວ ແລະ ເປັນກຽດຕາງໜ້າຮັບຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ, ຫົວໜ້າຄະນະສະເພາະກິດເພື່ອປ້ອງກັນ,ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19).

ສຳລັບບໍລິສັດ ເອບີ ກຣຸບ ມອບອຸປະກອນຕ້ານການລະບາດພະຍາດໂຄວິດ-19 ໃນຄັ້ງນີ້, ປະກອບມີຜ້າອັດປາກ-ອັດດັງເກຣດດີ ຈໍານວນລວມທັງໝົດ 35 ແກັດ ຫຼື 100.000 ອັນ ຄິດເປັນມູນຄ່າທັງໝົດ 500 ລ້ານກີບ, ບໍລິສັດ ໂຊນາພານໍາເຂົ້າ ແລະ ສົ່ງອອກສິນຄ້າທຸກປະເພດ ຈຳກັດຜູ້ດຽວ, ມອບອຸປະກອນຕ້ານການລະບາດພະຍາດໂຄວິດ-19 ປະເພດຜ້າອັດປາກ (MASK) ຈໍານວນ 10.000 ອັນ, ເຄື່ອງນຸ່ງຊຸດປ້ອງກັນ 40 ຊຸດ, ແວ່ນຕາປ້ອງກັນ 300 ອັນ, ນໍ້າຢາຂ້າເຊື້ອຈໍານວນ 48 ຖັງ, ລວມມູນຄ່າທັງໝົດ 100 ລ້ານກີບ ເພື່ອປະກອບສ່ວນຕ້ານການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ (COVID-19) ຢູ່ສປປ ລາວ.

ໂອກາດນີ້, ທ່ານ ສົມດີ ດວງດີ ໄດ້ກ່າວສະແດງຄວາມຂອບໃຈຕໍ່ທັງ 2 ບໍລິສັດທີ່ໄດ້ປະກອບສ່ວນນຳເອົາອຸປະກອນຕ້ານຕໍ່ການລະບາດໃນຄັ້ງນີ້ມາມອບໃຫ້ ສປປ ລາວ ເພື່ອຕ້ານການແຜ່ລະບາດຂອງພະຍາດ COVID-19.

(ເນື້ອໃນພາບ-ພາບ: ອາພັດສະລາ)