ຄະນະສະເພາະກິດອັດຕະປື ລົງຊຸກຍູ້ວຽກງານເຝົ້າລະວັງຢູ່ດ່ານສາກົນ ແລະ ດ່ານທ້ອງຖິ່ນ.

666

ຍ້ອນຄວາມເປັນຫ່ວງເປັນໃຍຕໍ່່ຄວາມປອດໄພທາງດ້ານສຸຂະພາບຂອງປະຊາຊົນຊາວແຂວງອັດຕະປື ເນື່ອງຈາກໄລຍະນີ້ ສະພາບການແຜ່ລະບາດຂອງເຊື້ອພະຍາດອັກເສບປອດສາຍພັນໃໝ່ ຈາກເຊື້ອຈຸລະໂລກ COVID-19 ເຫັນວ່າ: ຜູ້ຕິດເຊື້ອນັ້ນ ຍັງມີທ່າອ່ຽງເພີ່ມຂື້ນເລື້ອຍໆ ໃນບັນດາປະເທດຕ່າງໆ, ລວມເຖິງປະເທດລາວເຮົານຳດ້ວຍ ມາຮອດປະຈຸບັນກໍ່ເຫັນວ່າ ຍັງມີຜູ້ຕິດເຊື້ອເພີ່ມຂື້ນຢູ່.

ດັ່ງນັ້ນ ໃນວັນທີ 13ເມສາ 2020 ນີ້ ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງອັດຕະປື, ຮອງປະທານຄະນະສະເພາະກິດ ປ້ອງກັນ ແລະ ຄວບຄຸມ ພະຍາດ COVID-19 ພ້ອມຄະນະສະເພາະກິດທີ່ກ່ຽວຂ້ອງ ໄດ້ລົງຕິດຕາມຊຸກຍູ້ ການຈັດຕັ້ງປະຕິບັດວຽກງານ ຂອງພະນັກງານຢູ່ດ່ານສາກົນ ແລະ ດ່ານທ້ອງຖິ່ນ ແຂວງອັດຕະປື ເຊີ່ງມີ: : ດ່ານສາກົນພູເກືອ, ດ່ານພູຍາງ ເມືອງພູວົງ ແລະ ດ່ານຟໍ1 ໜອງໄກ່ໂອກ (ເຂດວັງຕັດ ເມືອງຊານໄຊ), ຫົວໜ້າດ່ານ ແຕ່ລະດ່ານໄດ້ແຈ້ງໃຫ້ຮູ້ວ່າ:

ມາຮອດປະຈຸບັນນີ້ ແຕ່ລະດ່ານທ້ອງຖີ່ນ ແລະ ດ່ານປະເພນີ ແມ່ນ ໄດ້ເອົາໃຈໃສ່ປະຕິບັດຕາມຄໍາສັ່ງຂອງຂັ້ນເທິງຄື: ໄດ້ປິດດ່ານເຂົ້າ-ອອກ. ສໍາລັບດ່ານພູເກືອ ນັບແຕ່ວັນທີ1 ກຸມພາ 2020 ເປັນຕົ້ນມາ ແມ່ນໄດ້ ກຳນົດຈຸດກັ່ນກອງ, ຈະໄດ້ກວດອຸນນະພູມ ແລະ ໃຫ້ບໍລິການ ເຈວລ້າງມືໃຫ້ຜູ້ບໍລິການ ທີ່ເດີນທາງເຂົ້າ-ອອກ ເຊິ່ງຜ່ານມາສາມາດກວດຕົວຈິງໄດ້ 11.092 ຄົນ ທັງໝົດແມ່ນບໍ່ພົບກໍລະນີສົງໃສ, ນອກນັ້ນ ລົດບັນທຸກສິນຄ້າຕ່າງໆ ທີ່ຕ້ອງໄດ້ຜ່ານຊາຍແດນນັ້ນ ແມ່ນໃຊ້ມາດຕະການ ສັບປ່ຽນຄົນຂັບ ຢູ່ຈຸດທີ່ກຳນົດໄວ້.

ຈາກນັ້ນ, ທ່ານ ອຸ່ນຫຼ້າ ໄຊຍະສິດ ຮອງເຈົ້າແຂວງ ກໍ່ໄດ້ສະແດງຄວາມເປັນຫ່ວງ ເປັນໃຍ ພ້ອມທັງຮຽກຮ້ອງໃຫ້ ພະນັກງານທີ່ປະຈໍາໃນແຕ່ລະດ່ານ ຈົ່ງເອົາໃຈໃສ່ ໃນການສະກັດກັ້ນ ແລະ ກັ່ນກອງຄົນເຂົ້າ-ອອກໃນເຂດຊາຍແດນຢ່າງເຂັ້ມງວດ ໃຫ້ທຸກໆດ່ານສືບຕໍ່ເອົາໃຈໃສ່ໃນການສະກັດສະກັດກັ້ນຜູ້ທີ່ສວຍໂອກາດລັກລອບເຂົ້າໃນແຕ່ລະດ່ານ ໃນຊ່ວງປີໃໝ່ລາວ ແລະ ເພີ່ມທະວີໃນການຈັດຕັ້ງປະຕິບັດມາດຕາການສະກັດກັ້ນ, ໂດຍປະຕິບັດຕາມມາດຕາການ ທີ່ທາງກະຊວງສາທາລະນະສຸກວາງອອກ, ເພື່ອປ້ອງກັນການແຜ່ລະບາດຂອງ ພະຍາດອັກເສບປອດ ສາຍພັນໃໝ່ ຈາກເຊື້ອຈຸລະໂລກ COVID-19 ຍ້ອນວ່າ: ວຽກງານການກວດກາ ຕາມເຂດຊາຍແດນແມ່ນປະຕູປ້ອງກັນດ່ານທໍາອິດ ກ່ອນຈະເຂົ້າສູ່ເຂດເທດສະບານ ຂອງເມືອງ ແລະ ແຂວງອັດຕະປືເຮົາ.

ໂດຍ: ບຸບຜາ