ເມືອງໂຂງ ເພີ່ມທະວີປະຕິບັດຄຳສັ່ງຂອງນາຍົກລັດຖະມົນຕີເລກທີ 06/ນຍ

590

ລະຫວ່າງວັນທີ 14-15 ເມສາ ນີ້ທ່ານນາງ ຄຳພູ ລິດທິສັກ ເລຂາພັກເມືອງ ເຈົ້າເມືອງໆໂຂງ ແຂວງຈຳປາສັກ ໄດ້ເຄື່ອນໄຫວຕິດຕາມເບິ່ງການປະຕິບັດວຽກງານຂອງອ້າຍນ້ອງກຳລັງ ປກສ-ປກຊ ຂັ້ນເມືອງ ແລະ ບ້ານ ພ້ອມຄະນະແພດໝໍທີ່ປະຕິບັດໜ້າທີ່ວຽກງານຕາມຈຸດກວດກາພາຍໃນເມືອງຕາມກຸ່ມບ້ານເຊັ່ນ: ກຸ່ມນາຝັ່ງ, ກຸ່ມຫາດຊາຍຄູນ, ກຸ່ມກະດັນ, ກຸ່ມລົບປາກດີ, ກຸ່ມຄອນ, ກຸ່ມຖານ, ກຸ່ມຂະເໝົາ, ປາກທາງເຂົ້າບ້ານ ແລະ ຕາມເສັ້ນທາງຫຼວງແຫ່ງຊາດເພື່ອຕ້ານ ແລະ ສະກັດກັ້ນ, ປ້ອງກັນ ແລະ ແກ້ໄຂການລະບາດພະຍາດໂຄວິດ

ໂອກາດນີ້ທ່ານນາງ ຄຳພູ ລິດທິສັກ ໄດ້ໃຫ້ຮູ້ໂດຍສັງເຂບວ່າ:​ ເມືອງຂອງພວກເຮົາມີຈຳນວນແຮງງານທີ່ໄປອອກແຮງງານຢູ່ຕ່າງປະເທດທັງໝົດຈຳນວນ 3.251 ຄົນ, ຍິງ 1.558 ຄົນ, ໃນຈຳນວນດັ່ງກ່າວນັ້ນມີຜູ້ກັບມາແລ້ວເຂົ້າມາພັກຕາມສູນກັກກັນທີ່ເມືອງໄດ້ກຳນົດໄວ້ 70 ສູນຄົບຕາມກຳນົດ 14 ວັນແລ້ວກັບເມືອເຮືອນມີທັງໝົດຈຳນວນ 2.800 ກວ່າຄົນ, ຍິງ 1.300 ກວ່າຄົນ ແລະ ຍັງເຫຼືອຢູ່ສູນກັກກັນຈຳນວນ 428 ຄົນ, ຍິງ 180 ກວ່າຄົນ. ການລົງເຮັດວຽກຄັ້ງນີ້ທ່ານເຈົ້າເມືອງໆໂຂງ ຍັງໄດ້ຮຽກຮ້ອງໃຫ້ບັນດາອຳນາດການປົກຄອງບ້ານທຸກຂັ້ນກໍຄືບັນດາກຳລັງ ປກສ-ປກຊ ບ້ານທີ່ປະຈຳຢູ່ບັນດາຈຸດກວດແຕ່ລະບ້ານຕ້ອງໄດ້ມີການແນະນຳໃຫ້ປະຊາ ຊົນໃສ່ໜ້າກາກອະນານາໄມກໍຄືຜ້າອັດປາກ-ດັງ ຖ້າຫາກບໍມີແມ່ນໃຫ້ກັບຄືນ, ກວດກາເອກະສານຄົບຊຸດ ແລະ ມີການພົ່ນຢາຂ້າເຊື້ອ ຫຼືນ້ຳຢາລ້າງມືທຸກຄັ້ງກ່ອນເຂົ້າ-ອອກໄປລະຫວ່າງບ້ານຕໍ່ບ້ານ ຫຼືໄປທຸລະທີ່ຈຳເປັນ, ບັນດາປະຊາຊົນທີ່ພົ້ນຈາກການກັກກັນເວລາກັບເມືອສູ່ເຮືອນແມ່ນໃຫ້ພວກເຂົາຕິດຕາມສຸຂະພາບຂອງຕົນເອງຢ່າງເປັນປະຈຳ, ບໍ່ທ່ຽວເລາະຕາມກາງບ້ານ ຫຼືໄປຫາເຂດທີ່ມີຊຸມຊົນແອອັດ.

ເວົ້າລວມແລ້ວ ປັດຈຸບັນທຸກພາກສ່ວນ, ທຸກໜ່ວຍງານພາຍໃນເມືອງໂຂງ ຕ່າງກໍ່ເປັນເຈົ້າການນຳກັນໃນການຈັດຕັ້ງປະຕິບັດຄຳສັ່ງເລກທີ 06 ຂອງນາຍົກລັດຖະມົນຕີ, ກໍ່ຄືຄຳສັ່ງແນະນຳຂອງທ່ານເຈົ້າເມືອງວ່າດ້ວຍການເພີ່ມມາດຕະການສະກັດກັ້ນ, ປ້ອງກັນການລະບາດ ແລະກຽມຄວາມພ້ອມເພື່ອຕ້ານການລະບາດຂອງພະຍາດອັກເສບປອດຈາກເຊື້ອຈຸລະໂລກ ສາຍພັນໃໝ່ ຫຼື ໂຄວິດ-19, ທຸກໆມື້ເຈົ້າໜ້າທີ່ຕຳຫຼວດສົມທົບກັບເຈົ້າໜ້າກຳລັງປ້ອງກັນຊາດ, ແພດໝໍ ແລະ ອຳນາດການປົກຄອງບ້ານໃນແຕ່ລະກຸ່ມບ້ານ, ບ້ານເຮັດໜ້າທີ່ລາດຕະເວນໂຄສະນາ, ແຈ້ງການໃຫ້ປະຊາຊົນ, ຜູ້ປະກອບການ ລວມທັງບຸກຄົນທົ່ວໄປ ໃຫ້ຢຸດຕິການສັນຈອນຕາມເສັ້ນທາງ ທີ່ບ້ານໄດ້ກຳນົດເວລາໄວ້ ຍົກເວັ້ນກໍລະນີຈຳເປັນ ກໍໃຫ້ມີການຢັ້ງຢືນຈາກພາກສ່ວນທີ່ກ່ຽວຂ້ອງຈຶ່ງສາມາດໄປໄດ້.


ຂ່າວໂດຍ: ພຸດທະສິນ ວົງວິໄລທອງ ນັກຂ່າວສະຖານີວິທະຍຸ-ໂທລະພາບເມືອງໂຂງ