ແຂວງບໍ່ແກ້ວ ເຂັ້ມງວດປ້ອງກັນໂຄວິດ-19

551

ຂປລ.ໜັງສືພິມບໍ່ແກ້ວ ລາຍງານໂດຍອ້າງຕາມການເປີດເຜີຍຂອງພັນຕີ ເຂັມທິບ ພັນຍາວົງ ຮອງຫົວໜ້າພະແນກຈະລາຈອນແຂວງທັງຕາງໜ້າໜ່ວຍສະເພາະກິດປ້ອງກັນ, ຕ້ານພະຍາດໂຄວິດ-19 ວ່າ: ແຕ່ວັນທີ 13 ເມສາເປັນຕົ້ນມາ,ໄດ້ຍົກລະດັບການປ້ອງກັນຢ່າງເຂັ້ມງວດໂດຍໜ່ວຍສະເພາະກິດ ຂັ້ນແຂວງ ແລະ ເມືອງ

ໄດ້ປະຕິບັດໜ້າທີ່ກວດກາກັ່ນກອງ ແລະ ວັດແທກອຸນຫະພູມຢູ່ 4 ຈຸດໃນເທສະບານແຂວງ,ຈຸດບ້ານປ່າອ້ອຍ,ຈຸດບ້ານໃຫມ່ພູຄາ,ຈຸດບ້ານໃຫຍ່ຫ້ວຍຊາຍໃຕ້ ແລະ ຈຸດບ້ານຂອນແກ້ວ ຊຶ່ງເຈົ້າໜ້າທີ່ຈະລາຈອນແຂວງ,ສາທາລະນະສຸກແຂວງ ແລະ ທະຫານແຂວງມາປະຈໍາແຕ່ລະຈຸດຕະ ຫລອດ 24 ຊົ່ວໂມງ.

ແຫລ່ງຂ່າວລາຍງານຕື່ມວ່າ:ນອກນີ້,ຍັງມີໜ່ວຍໂຄສະນາເຄື່ອນທີ່ຕາມເສັ້ນທາງຕ່າງໆເພື່ອໃຫ້ປະ ຊາຊົນຮັບຮູ້ວິທີການປ້ອງກັນພະຍາດໂຄວິດ-19.ແນວໃດກໍ່ດີຢູ່ແຕ່ລະຈຸດຍັງພົບເຫັນການສັນຈອນໄປມາຫລາຍ ແລະ ປະຊາຊົນຈໍານວນໜຶ່ງຍັງຖືເບົາບໍ່ໃສ່ຜ້າອັດປາກ ຊຶ່ງເຈົ້າໜ້າທີ່ໄດ້ແຈກຜ້າອັດປາກ ໃຫ້.ທັງນີ້ຂໍໃຫ້ພໍ່ແມ່ປະຊາຊົນຈົ່ງເປັນເຈົ້າການ ແລະ ມີສະຕິລະວັງຕົວຖ້າບໍ່ຈຳເປັນກໍ່ບໍ່ໃຫ້ອອກຈາກເຮືອນ, ຕ້ອງໃສ່ຜ້າອັດປາກທຸກເທື່ອເມື່ອອອກຈາກເຮືອນ ແລະ ຫລີກເວັ້ນບ່ອນທີ່ມີຄົນຫລາຍ

ຂ່າວ: ເງິນຫລົງ ຈິດພູວົງ , ພາບ: ບຸນເພັດ ໄຊຍະວົງ