ເຈົ້າເມືອງ ໄຊພູທອງ ລົງຢ້ຽມຢາມການປະຕິບັດວຽກງານຂອງເຈົ້າໜ້າທີ່ຕາມຈຸດຕ່າງໆ

530

ວັນທີ14 ເມສາ 2020 ນີ້, ທ່ານ ຄໍາວິໃສ ຜຸຍຍະວົງ ກໍາມະການພັກແຂວງ ເລຂາພັກເມືອງ ເຈົ້າເມືອງໄຊພູທອງ ທັງເປັນປະທານຄະນະສະເພາະກິດຂັ້ນເມືອງ ,ປ້ອງກັນ,ຄວບຄຸມ ແລະ ແກ້ໄຂການລະບາດ ຂອງພະຍາດໂຄວິດ19 ຂັ້ນເມືອງ ໄດ້ລົງເຄື່ອນໄຫວ ແລະ ຕິດຕາມການປະຕິບັດໜ້າທີ່ວຽກງານຂອງເຈົ້າ ໜ້າທີ່ ກໍາລັງ ປກສ ,ປກຊ, ເເພດໝໍ ແລະ ອໍານາດການປົກຄອງບ້ານ

ທີ່ໄດ້ປະຕິບັດໜ້າທີ່ວຽກງານຢູ່ຕາມຈຸດກວດກາລະຫວ່າງບ້ານຫາເມືອງ ເພື່ອເປັນ ການເຝົ້າລະວັງ ແລະ ສະກັດກັ້ນການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ຫຼື COVID-19 , ສໍາລັບການລົງແຈກຢາຍເຄື່ອງຊ່ວຍເຫຼືອໃຫ້ສູນກັກກັນໃນຄັ້ງນີ້ແມ່ນໄດ້ແບ່ງອອກເປັນ 2 ຈຸຄື: ຈຸທີ1 ນໍາໂດຍທ່ານ ຄໍາວິໃສ ຜຸຍຍະວົງ ເຈົ້າເມືອງໄຊພູທອງ ພ້ອມດ້ວຍບັນດາຄະນະປະຈໍາພັກເມືອງ,ກໍາມະການພັກເມືອງຜູ້ຊີ້ນໍາກຸ່ມບ້ານ ໄດ້ລົງແຈກຢາຍເຄື່ອງອຸປະໂພກ,ບໍລິໂພກໃຫ້ກັບກຸ່ມບ້ານທີ 1-2 -7-8 ປະກອບມີ 20 ບ້ານ ແລະ

ຈຸທີ 2 ນໍາພາຂອງທ່ານ ຫ່ວນ ຮັງບົວສອນ ຮອງເລຂາພັກເມືອງ ຮອງເຈົ້າເມືອງ ພ້ອມດ້ວຍທິມງານສະເພາະກິດຂອງເມືອງໄປແຈກຢາຍໃຫ້ກຸ່ມບ້ານທີ 3-4-5-6 ປະກອບມີບ້ານ 20 ເຊິ່ງ ລວມທັງໝົດ 40 ບ້ານ ສ່ວນເຄື່ອງທີ່ນໍາມາແຈກຢາຍຄັ້ງນີ້ປະກອບມີ: ນໍ້າດຶ່ມອະນາໄມ,ຜ້າປິດປາກ,ເຈວລ້າງມື,ເຄື່ອງດຶ່ມ,ໝີ່ສຳເລັດຮູບ, ກາເຟ ຈໍານວນໜຶ່ງ ເຊິ່ງລວມມູນຄ່າ ທັງໝົດ 17 ລ້ານກວ່າກີບເຊິ່ງໄດ້ຈາກການລະດົມທຶນຈາກພາກສ່ວນທຸລະກິດພາຍໃນເມືອງໄຊພູທອງ

ໂອກາດນີ້, ທ່ານ ເຈົ້າເມືອງໄຊພູທອງ ກໍ່ໄດ້ແນະນໍາໃຫ້ເຈົ້າໜ້າທີ່ທຸກພາກສ່ວນ ຈົ່ງພ້ອມກັນເອົາໃຈໃສ່ກວດກາລະອຽດ ແນະນໍາໃຫ້ປະຊາຊົນໃນການໄປມາຄວນມີການປ້ອງກັນ ແລະ ໂຄສະນາໃຫ້ປະຊາຊົນເຂົ້າໃຈຕໍ່ຜົນຮ້າຍຂອງພະຍາດໂຄວິດ19 ພ້ອມກັນສະກັດກັ້ນບໍໃຫ້ມີການລະບາດຢູ່ພາຍໃນເມືອງໄຊພູທອງຂອງພວກເຮົາ.