5 ພາກສ່ວນ ມອບເຄື່ອງ ແລະ ເງິນຊ່ວຍເຫຼືອແກ່ລັດຖະບານໃນການຕ້ານໂຄວິດ-19 ລວມມູນຄ່າເກືອບ 600 ລ້ານ

574

ໃນວັນທີ 10 ເມສາ 2020 ມີ 5 ພາກສ່ວນເຂົ້າມອບປັດໄຈ ແລະ ອຸປະກອນຊ່ວຍເຫຼືອໃຫ້ແກ່ລັດຖະບານ ເພື່ອນຳໃຊ້ເຂົ້າໃນວຽກງານ ຄວບຄຸມ, ຕ້ານ ແລະ ສະກັດກັ້ນການແຜ່ລະບາດຂອງເຊື້ອພະຍາດໂຄວິດ-19 ເຊິ່ງຕາງໜ້າຮັບໂດຍ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າຄະນະຊີ້ນຳລວມ ເພື່ອຕິດຕາມກວດກາ ແລະ ແກ້ໄຂການລະບາດພະຍາດໂຄວິດ-19

ເຊິ່ງໃນການມອບປັດໄຈ ແລະ ອຸປະກອນ ຊ່ວຍເຫຼືອໃນຄັ້ງນີ້ປະກອບມີ 5 ພາກສ່ວນຄື:
1). ຄອບຄົວການນຳ ແລະ ສະມາຄົມນັກທຸລະກິດຍິງ ນຳໂດຍ ທ່ານ ນາງ ອາລຸນນີ ກົມມະສິດ ພັນລະຍາລັດຖະມົນຕີກະຊວງການຕ່າງປະເທດ, ທ່ານ ນາງ ຈັນທະຈອນ ວົງໄຊ ປະທານ ສະມາຄົມນັກທຸລະກິດຍິງໜຸ່ມ ພ້ອມດ້ວຍຄະນະ ມອບເຄື່ອງມື ແລະ ອຸປະກອນ ລວມມູນຄ່າ 214 ລ້ານກີບ;
2). ສະມາຄົມໃຫຍ່ຊາວຫວຽດນາມຢູ່ ສປປ ລາວ ແລະ ສະມາຄົມນັກທຸລະກິດຫວຽດນາມ ຮ່ວມມື ແລະ ລົງທຶນຢູ່ ສປປ ລາວ ຕາງໜ້າມອບໂດຍ ທ່ານ ວິໄຊ ນະວຽງຈັນ, ທ່ານ ຟ້າມກວາງຟູ່ ແລະ ທ່ານ ນາງ ຫວູ ຕູ່ ແອັວງ ຈຳນວນ 113 ລ້ານກີບ.

3). ບໍລິສັດ ສະກາຍໂທລະຄົມ ຕາງໜ້າມອບໂດຍ ທ່ານ ສຸບັນ ພັນທະວີ ອຳນວຍການໃຫຍ່ບໍລິສັດ ສະກາຍໂທລະຄົມ ຈຳນວນ 100 ລ້ານກີບ;
4). ສຳນັກງານປົກປ້ອງເງິນຝາກ ຕາງໜ້າມອບໂດຍ ທ່ານ ຄຳໄຊ ພົມມະວີ ຄະນະສຳນັກງານປົກປ້ອງເງິນຝາກ ຈຳນວນ 50 ລ້ານກີບ.
5). ສຸວັນນີ ໂຮມເຊັນເຕີ ມະຫາຊົນ ຕາງໜ້າມອບໂດຍ ທ່ານ ວັດດານາ ສຸຄະບັນດິດ ຜູ້ອຳນວຍການໃຫຍ່ ສຸວັນນີ ໂຮມເຊັນເຕີ ມະຫາຊົນ ໃນຈຳນວນ 100 ລ້ານກີບ ເຊິ່ງລວມມູນຄ່າທັງໝົດ 5 ພາກສ່ວນ ຈຳນວນ 577 ລ້ານກີບ.

ໃນໂອກາດດັ່ງກ່າວນີ້ ທ່ານ ສົມດີ ດວງດີ ຮອງນາຍົກລັດຖະມົນຕີ, ລັດຖະມົນຕີກະຊວງການເງິນ ທັງເປັນຫົວໜ້າຄະນະຊີ້ນຳລວມ ເພື່ອຕິດຕາມກວດກາ ແລະ ແກ້ໄຂການລະບາດພະຍາດໂຄວິດ-19 ໄດ້ກ່າວສະແດງຄວາມຂອບໃຈນຳທຸກພາກສ່ວນ ທີ່ໄດ້ເສຍສະຫຼະບິແບ່ງນໍ້າໃຈ ກໍຄືສັບສິນສ່ວນຕົວມາປະກອບສ່ວນເຂົ້າໃນການຄວບຄຸມ, ຕ້ານແກ້ໄຂການລະບາດຂອງເຊື້ອພະຍາດໂຄວິດ-19 ທີ່ປັດຈຸບັນກຳລັງມີການແຜ່ລະບາດ ແລະ ສຳລັບລາວເຮົາກໍມີຜູ້ຕິດເຊື້ອ 16 ກໍລະນີແລ້ວ ແຕ່ການຕອບໂຕ້ກັບການແຜ່ລະບາດຂອງເຊື້ອດັ່ງກ່າວ ພວກເຮົາຍັງບໍ່ທັນມີອຸປະກອນການແພດ ແລະ ເຄື່ອງມືພ້ອມທີ່ຈະຮັບມື ຫຼື ສູ້ກັບມັນ. ດັ່ງນັ້ນ, ພວກເຮົາຈະເອົາ ຈຳນວນເງິນທີ່ມອບຈາກພວກທ່ານໄປຊື້ອຸປະກອນການແພດຕື່ມ ແລະ ການປະກອບສ່ວນຂອງພວກທ່ານແມ່ນເປັນການປະກອບສ່ວນທີ່ຍິ່ງໃຫຍ່ອັນຈະສາມາດຊ່ວຍເຫຼືອຊີວິດຂອງພໍ່ແມ່ປະຊາຊົນໄດ້ຫຼາຍຊີວິດອີກດ້ວຍ.

ຂ່າວ ແລະ ພາບຈາກ: ໜັງສືພິມເສດຖະກິດການຄ້າ