ພົບຜູ້ຕິດເຊື້ອໂຄວິດ-19 ໃໝ່ເພີ່ມຂຶ້ນ 1 ຄົນ ພົວພັນກັບຜູ້ຕິດເຊື້ອ ຄົນທີ 10

812

ພົບຜູ້ຕິດເຊື້ອ ໂຄວິດ-19 ລາຍໃໝ່ ເພີ່ມຂຶ້ນ 1 ຄົນ ພົວພັນ ກັບກໍລະນີ ຜູ້ຕິດເຊື້ອ ຄົນທີ່ 10, ເຮັດໃຫ້ຍອດຜູ້ຕິດເຊື້ອ ທັງໝົດ ໃນປະເທດລາວ ເພີ່ມຂຶ້ນເປັນ 16 ຄົນ
ວັນພະຫັດ ທີ່ 9 ເມສາ 2020 ເວລາ 14:30, ທີ່ສູນປະຕິບັດງານ ຄະນະສະເພະກິດ ຕ້ານໂຄວິດ-19 ໄດ້ມີການຖະແຫຼ່ງຂ່າວ ໃຫ້ຮູ້ວ່າ ມາຮອດມື້ນີ້ ໄດ້ກວດພົບ ຜູ້ຕິດເຊື້ອໂຄວິດ-19 ລາຍໃໝ່ ຢູ່ ສປປ ລາວ ຈໍານວນ 1 ຄົນ ເປັນເພດຍິງ ອາຍຸ 23 ປີ, ປະຈຸບັນ ຢູ່ບ້ານ ໜອງດ້ວງ, ເມືອງສີໂຄດຕະບອງ ນະຄອນຫຼວງວຽງຈັນ, ມີປະຫວັດ ສໍາພັດ ກັບຜູ້ຕິດເຊື້ອ ຜູ້ທີ່ 10, ຕິດຈາກກໍລະນີກິນເຂົ້າຮ່ວມກັນ
ໃນວັນທີ 27 ມີນາ ຮູ້ຂ່າວພະນັກງານຕິດເຊື້ອ ແລະ ໄດ້ປະຕິບັດການກັກໂຕ ໄດ້ 10 ວັນ ຮອດວັນທີ 7 ເມສາ ຈຶ່ງມີອາການ ລີ້ນຊາ ດັງດົມກິ່ນບໍ່ໄດ້ ມີອາການໄຂ້ ແລະ ໃນວັນທີ 8 ໄດ້ໂທແຈ້ງເບີ 166 ແລ້ວນຳຕົວມາກວດຈຶ່ງພົບເຊື້ອ ໂດຍມີຜູ້ສຳພັດໃກ້ສິດລາວ 9 ຄົນ ແລະ ເຮັດໃຫ້ ສປປ ລາວ ມີຜູ້ຕິດເຊື້ອ ໂຄວິດ-19 ທັງໝົດ 16 ຄົນ.
ສະຖານະການການແຜ່ລະບາດ ຂອງເຊື້ອໂຄວິດ-19 ໄດ້ແຜ່ລາມໄປ ໃນ 209 ປະເທດ ແລະ ເຂດແຄວ້ນ. ຍອດຜູ້ຕິດເຊື້ອສະສົມ ໃນທົ່ວໂລກ ມາຮອດປະຈຸບັນ ແມ່ນມີຫຼາຍກ່ວາ 1.5 ລ້ານກວ່າຄົນ ແລະ ກໍາລັງເພີ່ມສູງຂຶ້ນຢ່າງຕໍ່ເນື່ອງ. ຮຽກຮ້ອງໃຫ້ປະຊາຊົນລາວບັນດາເຜົ່າ ຈົ່ງເພີ່ມທະວີ ເອົາໃຈໃສ່ ຮັກສາບົວລະບັດຕົນເອງ ແລະ ປະຕິບັດຕາມມາດຕະຖານ ຄໍາແນະນໍາ ແລະ ມາດຕະການປ້ອງກັນ ຂອງລັດຖະບານລາວ ວາງອອກ ຢ່າງເຄັ່ງຄັດ.