ໄຊຍະບູລີ ສືບຕໍ່ຮັບແຮງງານລາວ 120 ຄົນທີ່ຕົກຄ້າງ ຢູ່ແຂວງເລີຍ

695

ເນື່ອງຈາກສະຖານະການຂອງເຊື້ອພະຍາດອັກເສບປອດສາຍພັນໃໝ່ ໂຄວິດ-19 ຍັງສືບຕໍ່ແຜ່ລະບາດເປັນວົງກວ້າງ, ຈໍານວນຜູ້ຕິດເຊື້ອ ແລະເສຍຊີວິດໃນທົ່ວໂລກນັບມື້ນັບເພີ່ມຂຶ້ນ. ເພື່ອເປັນການສະກັດກັ້ນ ແລະແກ້ໄຂບັັນຫາດັ່ງກ່າວ ລັດຖະບານທັງສອງປະເທດ (ສປປ ລາວ ແລະ ຣາຊະອານາຈັກໄທ) ໄດ້ມີມາດຕະການປິດປະເທດຊົ່ວຄາວ ເຊິ່ງໄລຍະນີ້ແມ່ນໄດ້ມີການປິດການເຂົ້າ-ອອກດ່ານສາກົນຊົ່ວຄາວ ຂອງບຸກຄົນ, ຍົກເວັ້ນສະເພາະລົດຂົນສົ່ງສິນຄ້າ ນັບແຕ່ວັນທີ 3 ເມສາ 2020 ຢ່າງເປັນທາງການ, ຍ້ອນສະພາບບັນຫາດັ່ງກ່າວ ອັນໄດ້ເຮັດໃຫ້ມີແຮງງານລາວ ທີ່ໄປອອກແຮງງານຢູ່ປະເທດໄທ ເຊິ່ງມີຈຸດປະສົງກັບຄືນບ້ານຂອງຕົນ ບໍ່ສາມາດກັບຄືນໄດ້ຕາມກໍານົດເວລາ ຈຶ່ງຖືກຕົກຄ້າງ ຢູ່ເມືອງທ່າລີ ແຂວງເລີຍ ຣາຊະອານາຈັກໄທ ເຊິ່ງຝ່າຍໄທ ໄດ້ ອໍານວຍຄວາມສະດວກດ້ານສະຖານທີ່

ເຄື່ອງອຸປະໂພກ ແລະບໍລິໂພກໃຫ້ແກ່ແຮງງານລາວ ເປັນຢ່າງດີ ແລະໃຍຕອນບ່າຍ ວັນທີ 7 ເມສາ 2020 ນີ້, ຢູ່ອາຄານດ່ານສາກົນຂົວມິດຕະພາບນໍ້າເຫືອງ ເມືອງທ່າລີ່ ແຂວງເລີຍ ໄດ້ຈັດພິທີ ມອບ-ຮັບແຮງງານລາວ ທີ່ຕົກຄ້າງຢູ່ເມືອງທ່າລີ ໃຫ້ແຂວງໄຊະຍະບູລີ ເຊິ່ງຕາງໜ້າຝ່າຍແຂວງໄຊຍະບູລີ ນໍາໂດຍທ່ານ ເພັງນິລັນ ຄໍາພັນເພັງ ຮອງເຈົ້າແຂວງໄຊຍະບູລີ ພ້ອມດ້ວຍຄະນະ ແລະ ຝ່າຍແຂວງເລີຍ ນໍາໂດຍທ່ານ ໂສພົນ ສຸວັນນະລັດ ຮອງຜູ້ວ່າຣາຊະການ ແຂວງເລີຍ ພ້ອມດ້ວຍຄະນະ.

ໃນການມອບ-ຮັບຄັ້ງນີ້, ມີແຮງງານລາວ ທີ່ຕົກຄ້າງທັງໝົດ 120 ກ່ວາຄົນ, ຍິງ 50 ກ່ວາຄົນ. ໃນນີ້, ແຮງງານເມືອງໄຊຍະບູລີ 5 ຄົນ, ຍິງ 2 ຄົນ, ເມືອງພຽງ 30 ກ່ວາຄົນ, ຍິງ 16 ຄົນ, ເມືອງປາກລາຍ 30 ກ່ວາຄົນ, ຍິງ 13 ຄົນ, ເມືອງແກ່ນທ້າວ 30 ກ່ວາຄົນ, ຍິງ 17 ຄົນ, ເມືອງບໍ່ແຕນ 7 ຄົນ, ຍິງ 5 ຄົນ, ເມືອງທົ່ງມີໄຊ 3 ຄົນ, ຍິງ 1 ຄົນ, ແຂວງວຽງຈັນ 5 ຄົນ, ຍິງ 3 ຄົນ ແລະ ນະຄອນຫຼວງວຽງຈັນ 3 ຄົນ, ຍິງ 2 ຄົນ. ທັງສອງຝ່າຍໄດ້ເຫັນດີເປັນເອກະພາບກັນພາຍຫລັງທີ່ໄດ້ມີການມອບ-ຮັບ ແຮງງານລາວ ທີ່ຕົກຄ້າງໃນຄັ້ງນີ້ແລ້ວ ໃຫ້ປິດ ແລະຍຸຕິສູນຄວບຄຸມກັກກັນ ໃນພື້ນທີ່ ເມືອງທ່າລີ ແຂວງເລີຍ ແຫ່ງຣາຊະອານາຈັກໄທ ແລະຫ້າມບໍ່ໃຫ້ມີການເຄື່ອນຍ້າຍແຮງງານລາວ ເຂົ້າ ແຂວງເລີຍ ຈົນກວ່າສະພາບຈະເປັນປົກກະຕິ ແລະໃຫ້ປະຕິບັດຕາມຫລັກການຢູ່ບ່ອນໃດ ແມ່ນກັກບໍລິເວນຢູ່ບ່ອນນັ້ນ, ສືບຕໍ່ຮ່ວມມືທາງດ້ານຂໍ້ມູນຂ່າວສານ ດ້ານວິຊາການແພດ ເພື່ອຄວບຄຸມ ໂຄວິດ-19 ຮ່ວມກັນ.

ທາງຝ່າຍແຂວງເລີຍ ຈະສືບຕໍ່ຮ່ວມມືກັບຝ່າຍແຂວງໄຊຍະບູລີ ໃນການສະໜັບສະໜູນ ແລະຊ່ວຍເຫລືອເຊິ່ງກັນ ແລະກັນ, ກໍລະນີທີ່ປະຊາຊົນຂອງທັງສອງຝ່າຍມີຄວາມຈໍາເປັນທີ່ຈະເດີນທາງຜ່ານແດນ ແມ່ນຈະຕ້ອງມີໜັງສືຢັ້ງຢືນຈາກກົງສູນ, ສະຖານທູດ ຂອງແຕ່ລະຝ່າຍ ແລະມີໜັງສືຢັ້ງຢືນການແພດຕາມລະບຽບການກ່ອນ ແລ້ວຈຶ່ງອະນຸຍາດຂ້າມດ່ານໄດ້.
ໂດຍ: ສອດສ່ອງ
ແຫລ່ງຂ່າວ: ໄຊຍະບູລີ