ຮອງເຈົ້າແຂວງບໍ່ແກ້ວ ຕິດຕາມການເຝົ້າລະວັງຂອງພະຍາດໂຄວິດ-19 ຢູ່ເມືອງປາກທາ.

561

ໃນຕອນແລງວັນທີ 7 ເມສາ 2020 ຜ່ານມານີ້, ທ່ານ ຈອມສີ ລັດຕະນະປັນ ຮອງເຈົ້າແຂວງບໍ່ແກ້ວ ພ້ອມດ້ວຍຄະນະໄດ້ລົງຊຸກຍູ້ຕິດຕາມສະພາບການເຝົ້າລະວັງເພື່ອຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ເມືອງປາກທາ, ມີບັນດາຄະນະສະເພາະກິດຕ້ານ ແລະ ຄວບຄຸມການລະບາດຂອງພະຍາດໂຄວິດ 19 ຂັ້ນເມືອງເຂົ້າຮ່ວມ.

ທ່ານ ນາງ ຈັນສຸກ ວັນນະວົງ ຄະນະປະຈຳພັກເມືອງ ຫົວໜ້າຄະນະສະເພາະກິດຕ້ານ ແລະ ຄວບຄຸມການລະບາດຂອງພະຍາດໂຄວິດ 19 ຂັ້ນເມືອງໄດ້ລາຍງານສະພາບການເຄື່ອນໄຫວການປ້ອງກັນຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຢູ່ພາຍໃນເມືອງປາກທາວ່າ: ໄດ້ເຄື່ອນໄຫວຈັດຕັ້ງປະຕິບັດໜ້າທີ່ຢ່າງເອົາໃຈໃສ່ເປັນຕົ້ນແມ່ນລົງຕິດຕາມບັນດາຈຸດກວດກາທີ່ໄດ້ກຳນົດໄວ້ ເພື່ອປັບປຸງວິທີການເຮັດວຽກ ແລະ ກວດກາຄົນເຂົ້າ-ອອກ,

ລົງສຶກສາອົບຮົມໃຫ້ພໍ່ແມ່ປະຊາຊົນຢູ່ບັນດາກຸ່ມບ້ານທີ່ມີຄວາມສ່ຽງໃຫ້ມີສະຕິລະວັງຕົວສູງ ແລະ ເປັນເຈົ້າການປ້ອງກັນພະຍາດ, ກັກຕົວຢູ່ບັນດາບ້ານໃນນັ້ນໄດ້ກຳນົດເອົາໂຮງຮຽນຢູ່ແຕ່ລະບ້ານເປັນບ່ອນກັກຕົວ ເຊິ່ງການຈັດຕັ້ງປະຕິບັດເລີມແຕ່ວັນທີ 15 ມີນາ 2020 ມາຮອດປັດຈຸບັນມີຕົວເລກສະສົມທັງໝົດ 65 ກໍລະນີ, ຍິງ 37 ກໍລະນິ, ຄະນະຮັບຜິດຊອບໄດ້ລົງໃຫ້ສຸຂະສຶກສາກໍລະນີຄົບ 14 ວັນ ພ້ອມທັງມອບໃບຢັ້ງຢືນຈຳນວນ 9 ບ້ານມີ 33 ຄົນ,ຍິງ 21 ຄົນ, ນອກຈາກນີ້ຍັງໄດ້ກວດກາຜູ້ໂດຍສານເຂົ້າ-ອອກໄດ້ທັງໝົດ 986 ຄົນ ໃນນີ້ປະກອບມີຄົນຕ່າງປະເທດ 20 ຄົນ.

ໂອກາດດຽວກັນນີ້, ທ່ານຮອງເຈົ້າແຂວງຍັງໄດ້ໄດ້ເໜັ້ນໜັກໃຫ້ຄະນະສະເພາະກິດຕ້ານ ແລະຄວບຄຸມການລະບາດຂອງພະຍາດໂຄວິດ-19 ຂັ້ນເມືອງຈົ່ງສຶບຕໍ່ສືກສາອົບຮົມການເມືອງແນວຄິດໃຫ້ປະຊາຊົນຮັບຮູ້ເຂົ້າໃຈຢ່າງເລິກເຊິງ, ຍົກລະດັບໃນການສົມທົບກັບ 2 ກຳລັງຈົນຮອດຂັ້ນບ້ານໃຫ້ມີການເວນຍາມຈຸດຕ່າງໆໃນການເຂົ້າ-ອອກຂອງປະຊາຊົນ, ລາຍງານສ່ອງແສງໃຫ້ທວງທັນ ແລະ ທັນການກັບເວລາ ໃນການລົງຊຸກຍູ້ຕິດຕາມໃນຄັ້ງນີ້ທ່ານຍັງໄດ້ມອບເງິນຈຳນວນ 10 ລ້ານກີບໃຫ້ກັບເມືອງປາກທາອີກດ້ວຍ.

(ເນື້ອໃນ-ພາບ: ວັນນະເດດ)