ຫຼາຍພາກສ່ວນປະກອບສ່ວນຊ່ວຍເຫຼືອລັດຖະບານ ຕ້ານການລະບາດຂອງເຊື້ອພະຍາດໂຄວິດ-19

552

ໃນວັນທີ 6 ເມສາ 2020 ຢູ່ທີ່ສໍານັກງານນາຍົກລັດຖະມົນຕີ, ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ ບໍລິສັດໃນເຄືອພົງສະຫວັນກຣູບໄດ້ເຂົ້າມອບເຄື່ອງອຸປະກອນການແພດ ແລະ ເຄື່ອງອຸປະໂພກ-ບໍລິໂພກ ເພື່ອຕ້ານການແຜ່ລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ ຫຼື COVID-19 ໃຫ້ລັດ ຖະບານກໍຄືຄະນະສະເພາະກິດ, ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່.

ສໍາລັບອຸປະກອນທີ່ນໍາມາມອບໃນຄັ້ງນີ້ ປະກອບມີ: ຜ້າອັດປາກອະນາໄມຈຳນວນ 250.000 ອັນ, ນ້ຳຢາ Alcohol 90 ຈຳນວນ 50 ແກັດ, ຖົງມືແພດ ຈຳນວນ 50 ແກັດ, ປາກະປ໋ອງ ຈຳນວນ 240 ແກັດ, ໝີ່ຈຳນວນ 400 ແກັດລວມມູນຄ່າທັງໝົດ 1,1 ຕື້ກີບ. ຕາງໜ້າມອບໂດຍທ່ານ ບຸນຖັນ ຈິດຕະວົງ ຜູ້ອຳນວຍການ ຝ່າຍປະຕິບັດການ ເປັນຜູ້ຕາງໜ້າ ບໍລິສັດ ປີໂຕຣລ້ຽມເທຣດດິ້ງ ລາວ ມະຫາຊົນ.

ບໍລິສັດ ສະຕາໂທລະຄົມ (Unitel) ໄດ້ມອບອຸປະກອນໃນການສື່ສານ (ວີດີໂອຄອນເຟີເລັນ) ລວມມູນຄ່າ 2,83 ຕື້ກວ່າກີບໃຫ້ກຽດມອບໂດຍທ່ານ ລິວ ແມງ ຮ່າ ຜູ້ອຳນວຍການໃຫຍ່ບໍລິສັດ ຢູນີແທວ, ທະນາຄານຫຸ້ນສ່ວນລົງທຶນ ແລະ ພັດທະນາຫວຽດນາມໄດ້ມອບເງິນສົດຈຳນວນມູນຄ່າ 50.000 ໂດລາສະຫະລັດ, ຕາງໜ້າມອບໂດຍ ທ່ານ ຫງຽນ ວັນ ບິ່ງ ຫົວໜ້າຫ້ອງການຜູ້ຕາງໜ້າທະນາຄານຫຸ້ນສ່ວນລົງທຶນ ແລະ ພັດທະນາຫວຽດນາມ ທັງເປັນຜູ້ອຳນວຍການໃຫຍ່ທະນາຄານຮ່ວມທຸລະກິດລາວ-ຫວຽດ; ຈາກນັ້ນຍັງມີບໍລິສັດອີທີແອລ ຈຳກັດ ມອບເງິນສົດ ມູນຄ່າ 400 ລ້ານກີບຕາງໜ້າມອບ ໂດຍທ່ານ ຮວງ ສູຢຸນ ຜູ້ອຳນວຍການໃຫຍ່ບໍລິສັດອີທີແອລ ຈຳກັດ;ແລະ ໃຫ້ກຽດຮັບການຊ່ວຍເຫຼືອແຕ່ລະພາກສ່ວນຂອງທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ຫົວໜ້າສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່.

ໃນໂອກາດນີ້, ທ່ານ ສົມດີ ດວງດີ ໄດ້ຕາງໜ້າລັດຖະບານແຫ່ງ ສປປ ລາວ ສະແດງຄວາມຂອບໃຈຕໍ່ບັນດາບໍລິສັດດັ່ງກ່າວທີ່ເຫັນຄວາມສຳຄັນ ແລະ ໃຫ້ການສະໜັບສະໜູນລັດຖະບານໃນການຕ້ານການແຜ່ລະບາດຂອງເຊື້ອໄວຣັດໂຄວິດ-19 ຢູ່ສປປ ລາວ ພ້ອມທັງຢືນຢັນວ່າຈະນຳເງິນ ແລະ ວັດຖຸອຸປະກອນດັ່ງກ່າວໄປນຳໃຊ້ເຂົ້າໃນວຽກງານດັ່ງກ່າວໃຫ້ເກີດຜົນປະໂຫຍດສູງສຸດ ເພື່ອເຮັດໃຫ້ການແຜ່ລະບາດຂອງເຊື້ອໄວຣັດໂຄວິດ-19 ຢູ່ ສປປ ລາວໝົດໄປ ແລະ ເຮັດໃຫ້ສະພາບເສດຖະກິດ ກໍ່ຄືການເປັນຢູ່ຂອງປະຊາຊົນລາວເຮົາກັບຄືນສູ່ສະພາບປົກກະຕິໂດຍໄວ.

ຂ່າວ: ອາພັດສະລາ