ຂ່າວດ່ວນ! ພົບຜູ້ຕິດເຊື້ອໂຄວິດ-19 ເພີ່ມອີກ 1 ຄົນ ເປັນນັກສຶກສາລາວມາຈາກປະເທດອັງກິດ

656

ພົບຜູ້ຕິດເຊື້ອພະຍາດໂຄວິດ-19 ເພີ່ມອີກ 1 ຄົນ ເພດຍິງ ອາຍຸ 20 ປີ ຢູ່ບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ ເປັນນັກສຶກສາມາຈາກປະເທດອັງກິດ ລວມເປັນ 15 ຄົນໃນທົ່ວປະເທດ.

ໃນວັນທີ 8 ເມສາ 2020 ທີ່ກະຊວງສາທາລະນະສຸກ, ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ຖະແຫຼງຂ່າວໃຫ້ຮູ້ວ່າ: ສະພາບການຄວບຄຸມ ແລະ ປ້ອງກັນການລະບາດຂອງເຊື້ອພະຍາດໂຄວິດ-19 ມາຮອດມື້ນີ້ ພວກເຮົາໄດ້ກວດຜູ້ຢູ່ໃນກໍລະນີສົງໄສທັງໝົດ 36 ກໍລະນີ, ຢູ່ນະຄອນຫຼວງວຽງຈັນ 28 ກໍລະນີ ແລະ ຕ່າງແຂວງ 8 ກໍລະນີ.

ຜ່ານຜົນກວດພົບຜູ້ຕິດເຊື້ອເພີ່ມ 1 ຄົນຄື: ເພດຍິງ, ອາຍຸ 20 ປີ, ສັນຊາດລາວ ນັກສຶກສາຮຽນຢູ່ປະເທດອັງກິດ ກັບມາ ສປປ ລາວ ໃນໄລຍະການລະບາດຂອງພະຍາດໂຄວິດ-19 ປັດຈຸບັນຢູ່ບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ.
ມາຮອດວັນທີ 8 ເມສາ 2020 ຍອດຜູ້ຕິດເຊື້ອພະຍາດໂຄວິດ-19 ໃນ ສປປ ລາວ ລວມທັງໝົດ 15 ຄົນ, ໃນນັ້ນ: ຢູ່ແຂວງຫຼວງພະບາງ 3 ຄົນ, ຢູ່ນະຄອນຫຼວງວຽງຈັນ 12 ຄົນ ເຊິ່ງເປັນຊາວຕ່າງປະເທດ (ປະເທດປາປົວນີວກິເນຍ) ທີ່ເຮັດວຽກຢູ່ລາວ 1 ຄົນ.