ສູນກາງພັກຫາລືຜ່ານລະບົບວິດີໂອທາງໄກ ຄວບຄຸມການລະບາດໂຄວິດ19

650

ຂປລ. ໃນວັນທີ 7 ເມສາ 2020 ຢູ່ຫ້ອງວ່າການສູນກາງພັກ ໄດ້ຈັດກອງປະຊຸມສ່ອງແສງລາຍງານຕໍ່ຄະນະເລຂາທິການສູນກາງພັກ ໂດຍຜ່ານລະບົບ ວີດີໂອທາງໄກ (video conference) ເພື່ອປຶກສາຫາລືກ່ຽວກັບສະພາບການແຜ່ລະບາດ, ການປ້ອງກັນ, ຄວບຄຸມ ແລະ ການກະກຽມຄວາມພ້ອມຮອບດ້ານໃນການຮັບມືຂອງການລະບາດພະຍາດໂຄວິດ-19

ການດຳເນີນກອງປະຊຸມສາມຂັ້ນ ແລະ ບັນຫາຕ່າງໆທີ່ບັນດາອົງການອ້ອມຂ້າງສູນກາງພັກ ແລະ ລັດຖະບານ ຢາກສ່ອງແສງເພື່ອໃຫ້ຄະນະເລຂາທິການສູນກາງພັກໄດ້ຮັບຊາບ ແລະ ຊອກຫາວິທີທາງແກ້ໄຂ. ພ້ອມກັນນີ້, ກໍໄດ້ມີການລາຍງານຂອງແຕ່ລະແຂວງໃນການຈັດຕັ້ງປະຕິບັດຄຳສັ່ງເລກທີ 06/ນຍ ລົງວັນທີ 29 ມີນາ 2020 ວ່າດ້ວຍການເພີ່ມທະວີມາດຕະການສະກັດກັ້ນ ກັນການລະບາດ, ຄວບຄຸມ ແລະ ກຽມພ້ອມຮອບດ້ານເພື່ອຕ້ານການລະບາດຂອງພະຍາດໂຄວິດ-19

ກອງປະຊຸມຈັດຂຶ້ນພາຍໃຕ້ການເປັນປະທານຂອງ ທ່ານ ພັນຄຳ ວິພາວັນ ຜູ້ປະຈຳການຄະນະເລຂາທິການສູນກາງພັກ, ມີບັນດາອົງການອ້ອມຂ້າງສູນກາງພັກ, ລັດຖະບານ ແລະ ອົງການຈັດຕັ້ງມະຫາຊົນບັນດາແຂວງ ແລະ ນະຄອນຫລວງວຽງຈັນເຂົ້າຮ່ວມ, ເຊິ່ງກອງປະຊຸມດັ່ງກ່າວ ແມ່ນໄດ້ຈັດເປັນປົກກະຕິໃນແຕ່ລະເດືອນ, ພິເສດເດືອນນີ້ແມ່ນໄດ້ປະຊຸມທາງໄກຜ່ານລະບົບວີດີໂອ (video conference) ຂອງກະຊວງໄປສະນີ ໂທລະຄົມມະນາຄົມ ແລະ ການສື່ສານ ເພື່ອເປັນການປ້ອງກັນພະຍາດໂຄວິດ-19 ໂດຍມີຫ້ອງປະຊຸມລວມກັນຢູ່ 3 ຈຸດຄື: ຫ້ອງວ່າການສູນກາງພັກ, ຫ້ອງວ່າການສຳນັກງານນາຍົກລັດຖະມົນຕີ ແລະ ສູນກາງຊາວໜຸ່ມປະຊາຊົນ ປະຕິວັດລາວ.ກອງປະຊຸມຄັ້ງນີ້ ເປັນກອງປະຊຸມຄັ້ງທຳອິດທີ່ປະຊຸມຜ່ານລະບົບ video conference ເຊິ່ງເປັນກອງປະຊຸມທີ່ມີການກະກຽມຄວາມພ້ອມໃນອະນາຄົດ ເພື່ອນຳໃຊ້ໃນເວລາມີເຫດການສຸກເສີນ ແລະ ຖືວ່າເປັນບາດກ້າວ ໃໝ່ຂອງລະບົບກອງປະຊຸມ ຂອງ ສປປ ລາວ.
ຂ່າວ:ມະນີທອນ, ພາບ: ຂັນໄຊ