ພົບຜູ້ຕິດເຊື້ອໂຄວິດ-19 ເພີ່ມອີກ 1 ຄົນເພດຍິງ ອາຍຸ 20 ຢູ່ບ້ານນາໄຊ ລວມຜູ້ຕິດເຊື້ອເປັນ 12 ຄົນ

773

ພົບຜູ້ຕິດເຊື້ອ ໂຄວິດ-19 🦠 ລາຍໃໝ່ ເປັນເພດຍິງ ມີປະຫວັດການເດີນທາງມາຈາກ ປະເທດອັງກິດ, ເຮັດໃຫ້ຍອດຜູ້ຕິດເຊື້ອ ທັງໝົດ ຢູ່ປະເທດລາວ ເພີ່ມຂຶ້ນເປັນ 12 ຄົນ !!!.

ວັນທີ 6 ເມສາ 2020 ເວລາ 14:30, ທີ່ສູນປະຕິບັດງານ ຄະນະສະເພະກິດ ຕ້ານໂຄວິດ-19 ໄດ້ມີການຖະແຫຼ່ງຂ່າວ ໃຫ້ຮູ້ວ່າ ມາຮອດມື້ນີ້ ໄດ້ກວດພົບ ຜູ້ຕິດເຊື້ອໂຄວິດ-19 ລາຍໃໝ່ ຢູ່ ສປປ ລາວ ເປັນເພດຍິງ, ອາຍຸ 20 ປີ, ດໍາລົງຊີວິດ ຢູ່ບ້ານ ນາໄຊ, ເມືອງໄຊເສດຖາ ນະຄອນຫຼວງວຽງຈັນ ຊຶ່ງກໍາລັງສຶກສາຕໍ່ ທີ່ປະເທດ ອັງກິດ ແລະ ເດີນທາງກັບມາລາວ ໃນໄລຍະການລະບາດ ຂອງເຊື້ອ ໂຄວິດ-19, ແລະ ກາຍເປັນຜູ້ຕິດເຊື້ອໂຄວິດ-19 ລາຍທີ່ 12 ຂອງປະເທດ.

ປະຫວັດການເດີນທາງຂອງຜູ້ກ່ຽວ ແມ່ນເດີນທາງກັບມາຈາກ ປະເທດອັງກິດ ນໍາໃຊ້ ສາຍການບິນໄທ TG 574 ຮອດປະເທດລາວ ວັນທີ 23/3/2020, ໄປກວດເຊື້ອ ໂຄວິດ-19 ເທື່ອທໍາອິດ ຜົນອອກມາເປັນລົບ, ບັນດາ ແພດໝໍ ຈຶ່ງແນະນໍາ ໃຫ້ກັກຕົວເຝົ້າລະວັງ ອາການ 14 ວັນ ຢູ່ເຮືອນສວນຂອງຜູ້ກ່ຽວ. ພາຍຫລັງຄົບມື້ ຜູ້ກ່ຽວມາກວດເຊື້ອ ໂຄວິດ-19 ອີກຄັ້ງ ໂດຍມາກວດຢູ່ໂຮງໝໍ ມິດຕະພາບ ຜົນອອກມາເປັນບວກ.

ສະຖານະການການແຜ່ລະບາດ ຂອງເຊື້ອໂຄວິດ-19 ໄດ້ແຜ່ລາມໄປ ໃນ 208 ປະເທດ ແລະ ເຂດແຄວ້ນ. ຍອດຜູ້ຕິດເຊື້ອສະສົມ ໃນທົ່ວໂລກ ແມ່ນກໍາລັງເພີ່ມສູງຂຶ້ນຢ່າງຕໍ່ເນື່ອງ ແລະ ຫຼາຍກ່ວາ 1.2 ລ້ານຄົນແລ້ວ, ເສຍຊີວິດ 69,000 ຄົນ, ຮຽກຮ້ອງໃຫ້ປະຊາຊົນລາວບັນດາເຜົ່າ ຈົ່ງເພີ່ມທະວີ ເອົາໃຈໃສ່ ຮັກສາບົວລະບັດຕົນເອງ ແລະ ປະຕິບັດຕາມມາດຕະຖານ ຄໍາແນະນໍາ ແລະ ມາດຕະການປ້ອງກັນ ຂອງລັດຖະບານລາວ ວາງອອກ ຢ່າງເຄັ່ງຄັດ.