ການນຳແຂວງຄຳມ່ວນ ລົງຕິດຕາມການສະກັດກັ້ນການລະບາດໂຄວິດ-19 ຢູ່ເມືອງທ່າແຂກ

676

ວັນທີ 6 ເມສາ 2020 ທ່ານ ພົມມາ ພັນທະລັງສີ ຫົວໜ້າຄະນະຈັດຕັ້ງ ແຂວງຄຳມ່ວນ ພ້ອມຄະນະໄດ້ລົງຕິດຕາມການສະກັດກັ້ນການລະບາດໂຄວິດ-19 ຢູ່ເມືອງທ່າແຂກ ໂດຍໄດ້ຮັບຟັງການລາຍງານການເຄື່ອນໄຫວສະກັດກັ້ນຢູ່ພາຍໃນເມືອງຈາກ

ທ່ານ ພູຄໍ້າ ແສງດາລາ ຮອງເຈົ້າເມືອງທ່າແຂກ ໃຫ້ຊາບວ່າ: ພາຍຫຼັງທີ່ໄດ້ຮັບຂໍ້ຕົກລົງແຕ່ງຕັ້ງຄະນະສະເພາະກິດຂັ້ນແຂວງ ແມ່ນໄດ້ຫັນມາເປັນຂໍ້ຕົກລົງແຕ່ງຕັ້ງ ແລະ ແບ່ງຄວາມຮັບຜິດຊອບຂັ້ນເມືອງ ໂດຍການມອບໝາຍໃຫ້ຄະນະປະຈຳ, ຄະນະພັກເມືອງ ເພື່ອນຳເອົາບັນດາເນື້ອໃນ, ນິຕິກຳຕ່າງໆລົງເຜີຍແຜ່ໃຫ້ພະນກງານ-ລັດຖະກອນ ແລະ ພໍ່ແມ່ປະຊາຊົນໃນ 91 ບ້ານທົ່ວເມືອງໄດ້ຮັບຮູ້ເຂົ້າໃຈ ແລະ ໄດ້ອອກແຈ້ງການໂຈະການຈັດງານບຸນ, ງານລ້ຽງ, ຮ້ານເກມ, ຮ້ານກິນດື່ມ, ສະຖານທີ່ບັນເທີງ ແລະ ອື່ນໆ ພ້ອມທັງມອບໃຫ້ 2 ກຳລັງ ປກຊ-ປກສ ຊີ້ນຳບັນດາສະຫງົບສຸກ, ກອງຫຼອນບ້ານຕິດຕາມກວດກາສະພາບຢູ່ບັນດາບ້ານຕ່າງໆ, ຕິດຕາມລາດຕະເວນເຂດບ້ານທີ່ຕິດກັບແມ່ນໍ້າຂອງ ແລະ ໄດ້ທ້ອນໂຮມເຮືອຫາງຍາວມາລວມສູນ ບໍ່ໃຫ້ມີການເຄື່ອນໄຫວ ເພື່ອປ້ອງກັນການລັກລອບເອົາຄົນ ແລະ ສິ່ງທີ່ຜິດກົດໝາຍຂ້າມຊາຍແດນ, ໄດ້ປະສານສົມທົບກັບກໍາລັງ ປກສ ແຂວງ, ຫ້ອງການສາທາລະນະສຸກເມືອງ ຕັ້ງດ່ານກວດກາຄົນ, ພາຫະນະທີ່ແລ່ນຜ່ານຕົວເມືອງ ຈຳນວນ 2 ຈຸດ ເພື່ອເພີ່ມເຂັ້ມງວດໃນການຕິດຕາມກວດກາ.

ສຳລັບວຽກງານຕິດຕາມກັກບໍລິເວນ ໃນເບື້ອງຕົ້ນແມ່ນໄດ້ກຳນົດເອົາ 7 ສູນ ແຕ່ສະພາບຕົວຈິງແມ່ນບໍ່ພຽງພໍ ຈຶ່ງໄດ້ຂະຫຍາຍລົງບັນດາຮາກຖານ, ກຸ່ມບ້ານ ປະຈຸບັນລວມມີທັງໝົດ 89 ສູນໃນທົ່ວເມືອງ ແລະ ມີຈຳນວນແຮງງານເຂົ້າປະຈຳສູນຈຳນວນ 1.659 ຄົນ ໃນນີ້ແຮງງານທີ່ເດີນທາງມາຈາກຕ່າງປະເທດ 1.585 ຄົນ ແລະ ມາຈາກຕ່າງແຂວງ 74 ຄົນ ແລະ ຜ່ານການຕິດຕາມກວດກາສຸຂະພາບ ແລະ ອາການຂອງຄົນທີ່ເຂົ້ານອນສູນເຫັນວ່າມີຈຳນວນ 3 ຄົນທີ່ເຂົ້າເຄືອຄ່າຍສົງໃສຄື: ຢູ່ບ້ານນາຂ້າງຊ້າງ 2 ຄົນ ເປັນຜູ້ທີ່ສຳພັດກັບຄົນຕິດເຊື້ອຢູ່ນະຄອນຫຼວງວຽງຈັນ ປະຈຸບັນແມ່ນໄດ້ກັກບໍລິເວນ ແລະ ຢູ່ໃນການຕິດຕາມອາການຂອງແພດ-ໝໍຢ່າງໃກ້ຊິດ, ອີກ 1 ຄົນແມ່ນຢູ່ສູນນາໂບ ເມືອງທ່າແຂກ ເຊິ່ງຜູ້ກ່ຽວແມ່ນຄົນເມືອງໄຊບົວທອງ ແລະ ໄດ້ເດີນທາງມາຈາກປະເທດໄທ ຜ່ານດ່ານຂົວມິດຕະພາບ 2 ປະຈຸບັນນອນຢູ່ສູນກັກຕົວຂອງແຂວງ ແລະ ຢູ່ໃນລະຫວ່າງການຕິດຕາມຂອງພະນັກງານແພດ-ໝໍເຊັ່ນກັນ.

ໂອກາດດັ່ງກ່າວທ່ານ ພົມມາ ພັນທະລັງສີ ໄດ້ຮຽກຮ້ອງໃຫ້ຄະນະພັກໃນແຕ່ລະຂັ້ນຂອງເມືອງ ຈົ່ງໄດ້ເພີ່ມທະວີໃນການໂຄສະນາປະຊາສຳພັນແກ່ພໍ່ແມ່ປະຊາຊົນໃຫ້ຮັບຮູ້ກ່ຽວກັບຜົນຮ້າຍ ພ້ອມທັງເພີ່ມທະວີມາດຕະການໃນການປ້ອງກັນໃຫ້ຫຼາຍ ແລະ ເຂັ້ມງວດຂຶ້ນກວ່າເກົ່າ, ເອົາໃຈໃສ່ໃນການຕິດຕາມ, ກວດກາການລັກລອບເຂົ້າມາແບບບໍ່ຖືກຕ້ອງຕາມເຂດຊາຍແດນ ໂດຍປະສານສົມທົບກັບທະຫາຍຊາຍແດນໃນການລາດຕະເວນຢ່າງເຂັ້ມງວດ ເພື່ອປ້ອງກັນບໍ່ໃຫ້ພະຍາດດັ່ງກ່າວເກີດຂຶ້ນພາຍໃນເມືອງ ກໍ່ຄືແຂວງຂອງພວກເຮົາ ຖ້າເຮົາເຮັດວຽກງານການປ້ອງກັນໄດ້ດີ ໂອກາດທີ່ຈະແຜ່ເຊື້ອກໍ່ຈະໜ້ອຍລົງ ໄປຄຽງຄູ່ກັນນັ້ນກໍ່ຕ້ອງເອົາໃຈໃສ່ຈັດຕັ້ງເວນຍາມຕາມສຳນັກງານ, ອົງການ ແລະ ຈຸດສຳຄັນຕ່າງໆ ເພື່ອປ້ອງກັນຄວາມສະຫງົບ ແລະ ຄວາມເປັນລະບຽບຮຽບຮ້ອຍໃນສັງຄົມ