ເມືອງຊໍາເໜືອໄດ້ຮັບເຄື່ອງຊ່ວຍເຫຼືອດ້ານອຸປະກອນການແພດມູນຄ່າ 137 ລ້ານກວ່າກີບ

567

ວັນທີ 5 ເມສາ 2020 ນີ້, ອົງການຊາຍພັນລາວປະຈຳແຂວງຫົວພັນໄດ້ນຳເອົາເຄື່ອງອຸປະກອນການແພດແບບສຸກເສີນມາມອບໃຫ້ເມືອງຊໍາເໜືອແຂວງຫົວພັນ ຢູ່ຫ້ອງວ່າການເມືອງ. ຈຳນວນເຄື່ອງທີ່ນໍາມາມອບຄັ້ງນີ້ມີຜ້າອັດປາກຈຳນວນ 330 ກັບ, ເຈວສະບູລ້າງມືທຳມະດາ 220 ກ່ອງ, ເຈວເຫຼົ້າ 75% ຈຳນວນ 550 ກ່ອງ, ບາຫຼອດດີຈີຕອນໃຊ້ແທກອຸນຫະພູມ 22 ອັນ, ເຈວເຫຼົ້າລ້າງມືສຳລັບເຮັດກິດຈະກຳຢູ່ຂັ້ນບ້ານ 330 ກ່ອງ ແລະ ຖົງມື 110 ກັບ ລວມມູນຄ່າ ທັງໝົດ 137 ລ້ານກີບ.

ກ່າວມອບໂດຍທ່ານ ຄຳດີ ເອີນທະວັນ ຕາງໜ້າອົງການຊາຍພັນລາວ, ກ່າວຮັບໂດຍທ່ານ ອານົງລັກ ແສງສຸລິຍາ ຮອງເຈົ້າເມືອງໆຊໍາເໜືອ ພ້ອມດ້ວຍພາກສ່ວນທີ່ກ່ຽວຂ້ອງທັງສອງຝ່າຍເຂົ້າຮ່ວມເປັນສັກຂີພິຍານນຳ.

 ເຄື່ອງຊ່ວຍເຫຼືອຈຳນວນດັ່ງກ່າວນີ້ຈະໄດ້ແຈກຢາຍໃຫ້ແກ່ຫ້ອງການສາທາລະນະສຸກເມືອງຊໍາ  ເໜືອ ແລະ ສຸກສາລາທີ່ຂື້ນກັບເມືອງຊໍາເໜືອຈຳນວນ 11 ແຫ່ງ ເພື່ອນຳໃຊ້ເຂົ້າໃນການເຄື່ອນໄຫວວຽກງານຕ້ານ ແລະ ສະກັດກັ້ນການລະບາດຂອງພະຍາດອັກເສຍປອດສາຍພັນໃໝ່ຫຼຶໂຄວິດ-19 ໃຫ້ມີຄວາມສະດວກ ແລະ ມີປະສິດທິຜົນສູງສຸດ.

ຂ່າວ-ພາບ: ໄມຄຳ