ລັດປິດການຂຸດຄົ້ນປຸງແຕ່ງແຮ່ທາດ ແລະ ບັນດາໂຄງການກໍ່ສ້າງເຂື່ອນໄຟຟ້ານ້ຳຕົກຊົ່ວຄາວ

692

ເພື່ອປະຕິບັດຕາມຄໍາສັ່ງຂອງທ່ານ ນາຍົກລັດຖະມົນຕີ ວ່າດ້ວຍການເພີ່ມທະວີມາດຕະການສະກັດກັ້ນ, ກັນການລະບາດ, ຄວບຄຸມ, ກຽມຄວາມພ້ອມຮອບດ້ານ ເພື່ອຕ້ານພະບາດ COVID-10 ແລະ ເພື່ອສະກັດກັ້ນບໍ່ໃຫ້ມີການລະບາດ ແລະ ແຜ່ລາມອອກໄປເປັນວົງກ້ວາງຕິດໃສ່ພະນັກງານ, ກໍາມະກອນ ທີ່ຢູ່ໃນໂຮງງານຂອງຕົນ, ໃຫ້ປະຕິບັດຕາມການຊີ້ນໍາຂອງລັດຖະບານ ກໍ່ຄືຫ້ອງວ່າການສໍານັກງານນາຍົກລັດຖະມົນຕີ ໃນຄັ້ງວັນທີ 05 ເມສາ 2020 ໃນເວລາ: 8:30 ໂມງ ຢ່າງເຂັ້ມງວດເດັດຂາດ.

ດັ່ງນັ້ນ, ລັດຖະມົນຕີກະຊວງພະລັງງານ ແລະ ບໍ່ແຮ່ອອກແຈ້ງການ ສະບັບເລກທີ 0432/ພບ, ລົງວັນທີ 5 ເມສາ 2020 ເລື່ອງ: ປິດການດຳເນີນກິດຈະການໂຮງງານຂຸດຄົ້ນປຸງແຕ່ງແຮ່ທາດ ແລະ ບັນດາໂຄງການກໍ່ສ້າງເຂື່ອນໄໄຟຟ້ານ້ຳຕົກຊົ່ວຄາວ (ໃນລະຫວ່າງວັນທີ 1-19 ເມສາ 2020) ເພື່ອສະກັດກັ້ນການລະບາດຂອງພະຍາດ ໂຄວິດ-19.
ໃຫ້ປິດການດໍາເນີນກິດຈະການໂຮງງານຊົ່ວຄາວທີ່ມີຄວາມສ່ຽງຕໍ່ການລະບາດຂອງພະຍາດໂຄວິດ-19 ໃນລະຫວ່າງວັນທີ 01-19 ເມສາ 2020, ຍົກເວັ້ນໂຮງງານຜະລິດສິນຄ້າ, ບໍລິໂພກ, ຢາປົວພະບາດ, ເຄື່ອງປ້ອງກັນການລະບາດພະຍາດ ແລະ ອຸປະກອນການແພດຕາມຕາມຄຳສັ່ງເລກທີ: 06/ນຍ, ລົງວັນທີ 29/03/2020. ໂຮງງານທີ່ປິດກິດຈະການໃຫ້ປະຕິບັດດັ່ງນີ້:

ຄຸ້ມຄອງພະນັກງານ-ກໍາມະກອນຜູ້ທີ່ພັກເຊົາຢູ່ໂຮງງານ ແລະ ປະຕິບັດນະໂຍບາຍກ່ຽວກັບສະຫວັດດີການສັງຄົມໃຫ້ພະນັກງານ-ກໍາມະກອນທັງໝົດໃນໄລຍະປິດການດໍາເນີນກິດຈະການຊົ່ວຄາວ. ນອກນັ້ນ, ບໍ່ໃຫ້ພະນັກງານ-ກໍາມະກອນທັງໝົດອອກຈາກທີ່ພັກ ຫຼື ອອກຈາກບ້ານ ຖ້າບໍ່ມີຄວາມຈໍາເປັນ ແລະ ບໍ່ໃຫ້ເດີນທາງໄປທ້ອງຖິ່ນອື່ນ ເຂດທີ່ມີຄວາມສ່ຽງຕໍ່ການລະບາດຂອງເຊື້ອພະຍາດ; ເຜີຍແຜ່ຄວາມຮູ້, ມີມາດຕະການຄວບຄຸມການລະບາດຂອງພະຍາດ COVID-19 ຕໍ່ພະນັກງານ-ກໍາມະກອນທີ່ຢູ່
ພາຍໃນໂຮງງານຂອງຕົນເອງໃຫ້ມີຄວາມເຂົ້າໃຈໃນການປ້ອງກັນ ແລະ ສະກັດກັ້ນການແຜ່ເຊື້ອພະຍາດຕາມຄຳແນະນໍາຂອງຫ້ອງການກະຊວງ, ຄຳແນະນຳຂອງຄະນະສະເພາະກິດຢ່າງເຂັ້ມງວດ, ຖ້າພົບເຫັນຜູ້ທີ່ມີອາການບໍ່ສະບາຍຄ້າຍຄືເປັນຫວັດ, ໄອ-ຈາມ ຫຼື ມີອຸນຫະພູມຮ່າງກາຍສູງ ຕາມການແນະນໍາຂອງຄະນະສະເພາະກິດໃຫ້ແຍກອອກໄວ້ເຂດສະເພາະ ແລ້ວຕິດຕໍ່ກັບສາຍດ່ວນ 166 ຫຼື 020 54066777 ເພື່ອປະຕິບັດຕາມການແນະນໍາຂອງ ຄະນະສະເພາະກິດໂດຍທັນທີ່.

ໃຫ້ພະນັກງານ-ກໍາມະກອນແຕ່ລະຄົນ ຢູ່ຫ່າງກັນຢ່າງໜ້ອຍ 2 ແມັດ ພ້ອມກັບໃຫ້ໃສ່ຜ້າອັດປາກ-ດັງ, ລ້າງມືໃສ່ສະບູ ຫຼື ນໍ້າຢາຂ້າເຊື້ອຕາມການແນະນໍາຂອງຄະນະສະເພາະກິດຢ່າງເຂັ້ມງວດ; ໃຫ້ຜົ່ນຢາຂ້າເຊື້ອໃນຫ້ອງການ, ອາຄານຜະລິດ, ຫ້ອງອາຫານ, ຫໍພັກຄົນງານ ແລະ ສະຖານທີ່ອື່ນໆ ທີ່ມີຄວາມ ສ່ຽງຕໍ່ການແຜ່ຂະຫຍາຍຂອງເຊື້ອພະຍາດ;
ສໍາລັບໂຮງງານທີ່ປິດ ແລະ ໄດ້ຮັບຜົນກະທົບຕໍ່ການປິດໂຮງງານໃຫ້ສັງລວມ ແລະ ລາຍງານຜົນກະທົບຕໍ່ກະຊວງພະລັງງານ ແລະ ບໍ່ແຮ່ ແລະ ພາກສ່ວນກ່ຽວຂ້ອງ ຕາມລະບຸໄວ້ໃນຂໍ້ທີ 13 ຂອງຄໍາສັ່ງ ເລກທີ: 06/ນຍ, ລົງວັນທີ 29/03/2020. ມອບໃຫ້ບັນດາກົມ, ສະຖາບັນ, ລັດວິສາຫະກິດທີ່ຂຶ້ນກັບກະຊວງ ພບ, ພະແນກພະລັງງານ ແລະ ບໍ່ແຮ່ ແຂວງ, ນະຄອນຫຼວງ ເຜີຍແຜ່, ແນະນໍາ ແລະ ຕັ້ງປະຕິບັດຕາມແຈ້ງການສະບັບນີ້. ໃນການຈັດຕັ້ງປະຕິບັດແຈ້ງການສະບັບນີ້, ກະຊວງພະລັງງານ ແລະ ບໍ່ແຮ່ ເຫັນດີຮັບຟັງດໍາຄິດເຫັນ ແລະ ຂໍ້ສະເໜີທີ່ສ້າງສັນຂອງທຸກພາກສ່ວນໃນສັງຄົມ ເພື່ອພິຈາລະນາ ແລະ ຄົ້ນຄ້ວາມາດຕະການແກ້ໄຂ.