ພະແນກ ອຄ ສະຫວັນນະເຂດ ລົງຕິດຕາມລາຄາສິນຄ້າຕາມທ້ອງຕະຫຼາດ

739

ເມື່ອວັນທີ 26 ມີນາ ຜ່ານມາ, ພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ອອກຂໍ້ຕົກລົງແຕ່ງຕັ້ງຄະນະກໍາມະການເພື່ອເຝົ້າລະວັງ ແລະ ແກ້ໄຂຜົນກະທົບທາງດ້ານເສດຖະກິດທີ່ມີຕໍ່ຂົງເຂດຂະແໜງການຄ້າ ອັນເນື່ອງມາຈາກການແຜ່ລະບາດຂອງພະຍາດໂຄວິດ-19 ເຊິ່ງທັງໝົດແບ່ງອອກເປັນ 3 ຄະນະ ເຊິ່ງແຕ່ລະຄະນະຮັບຜິດຊອບ 5 ຕົວເມືອງ ເພື່ອກວດກາ-ຕິດຕາມການສະໜອງສິນຄ້າປະເພດຕ່າງໆ, ປ້ອງກັນການກັກຕຸນສິນຄ້າ ແລະ ບັນຫາອື່ນໆ.

ຫຼ້າສຸດ, ໃນວັນທີ 3 ເມສາ 2020 ຜ່ານມາ ທ່ານ ປອ.ວັນແສງ ແກ້ວບຸນພັນ ຮອງຫົວໜ້າພະແນກອຸດສາຫະກຳ ແລະ ການຄ້າແຂວງສະຫວັນນະເຂດ ໃນຖານະຫົວໜ້າຈຸທີ1 ທີ່ຮັບຜິດຊອບ 5 ຕົວເມືອງໄດ້ແກ່: ນະຄອນໄກສອນພົມວິຫານ, ເມືອງອຸທຸມພອນ, ເມືອງໄຊບູລີ, ເມືອງອາດສະພັງທອງ ແລະ ເມືອງອາດສະພອນ ໄດ້ນຳພາທິມງານລົງກວດກາ ແລະ ຕິດຕາມສະພາບການເໜັງຕີລາຄາສິນຄ້າຂອງທ້ອງຕະຫຼາດພາຍໃນແຂວງ; ທັງນີ້, ກໍ່ເພື່ອຮັບປະກັນການສະໜອງສິນຄ້າປະເພດຕ່າງໆ, ປ້ອງກັນການກັກຕຸນສິນຄ້າ, ການຄຸ້ມຄອງລາຄາສິນຄ້າ ແລະ ຄ່າບໍລິການ ລວມທັງການນໍາເຂົ້າ-ຈໍລະຈອນສິນຄ້າອື່ນໆ ອັນເນື່ອງມາຈາກການແຜ່ລະບາດຂອງພະຍາດໂຄວິດ-19. ເປັນຕົ້ນແມ່ນ: ລາຄາເຂົ້າ, ຊີ້ນ, ຜັກ, ປາ.

ນອກນັ້ນ, ຍັງມີສິນຄ້າອຸປະໂພກບໍລິໂພກອື່ນໆທີ່ກໍາລັງໄດ້ຮັບຄວາມນິຍົມ ເຊັ່ນ: ຜ້າອັດປາກ, ເຈວລ້າງມື ແລະ ອຸປະກອນປ້ອງກັນພະຍາດອື່ນໆ ເພື່ອບໍ່ໃຫ້ມີການສວຍໂອກາດຂຶ້ນລາຄາຕາມລຳພັງ ທັງເປັນການລາຍງານສະພາບການໃນແຕ່ລະວັນໃຫ້ຂັ້ນເທິງຮັບຊາບເປັນປົກກະຕິ.

ໂອກາດດຽວກັນນີ້, ຄະນະຮັບຜິດຊອບຈຸທີ1 ກໍ່ໄດ້ລົງພື້ນທີ່ຕົວຈິງຕາມຕະຫຼາດພາຍໃນເທດສະບານແຂວງ, ເມືອງ, ຕະຫຼາດຊຸມຊົນ, ຮ້ານຄ້າ-ຂາຍຍ່ອຍ ພ້ອມທັງເຮັດແນະນຳໃຫ້ຜູ້ປະກອບການກໍ່ຄືພໍ່ຄ້າຊາວຂາຍຈົ່ງໃຫ້ຄວາມຮ່ວມມື ແລະ ບໍ່ໃຫ້ມີການກັກຕຸນສິນຄ້າ ຫຼື ຂາຍເກີນລາຄາທີ່ລັດກໍານົດ. ຄຽງຄູ່ກັນນັ້ນ, ກໍ່ໄດ້ເຮັດບົດບັນທຶກຮ່ວມກັນກັບຜູ້ປະກອບການ ເພື່ອເຮັດແນວໃດໃຫ້ການຄ້າ-ຂາຍສິນຄ້າໃນຊ້ວງວິກິດນີ້ດໍາເນີນໄປດ້ວຍຄວາມສະຫງົບ ແລະ ຫຼີກລຽງຫາງສຽງຈົ່ມວ່າຂອງສັງຄົມ.

(ເນື້ອໃນ-ພາບ: ທູນວິໄລ)