ສຽງຈາກທ່ານໝໍຈີນ 12 ທ່ານ ທີ່ເຮັດວຽກ ຮ່ວມມືກັນຕ້ານພະຍາດ ຮ່ວມທຸກຮ່ວມຍາກ” ຢູ່ ສປປ ລາວ

1503

ໃນວັນທີ 29 ມີນາທີ່ຜ່ານມາ ທີມແພດຈາກ ສປ ຈີນ ຈໍານວນ 12 ທ່ານ ໄດ້ເດີນທາງມາ ສປປ ລາວ ເພື່ອຊ່ວຍເຫຼືອວຽກງານປ້ອງກັນ ແລະ ຄວບຄຸມການແຜ່ລະບາດຂອງພະຍາດ Covid 19 ເຊິ່ງທີມງານດັ່ງກ່າວລ້ວນແຕ່ເປັນຜູ້ຊ່ຽວຊານທີ່ມີປະສົບການສູງໃນວຽກງານການຕ້ານ ແລະສະກັດກັ້ນພະຍາດ Covid 19 ຢູ່ທີ່ ສປ ຈີນ ລວມມີ: ການນໍາ, ແພດຜູ້ຊ່ຽວຊານ, ນັກລະບາດວິທະຍາ ແລະ ພະຍາບານ. ໃນນັ້ນ, ມີຫຼາຍທ່ານເຄີຍປິ່ນປົວຜູ້ທີ່ຕິດເຊື້ອຂັ້ນຮຸນແຮງໃຫ້ຫາຍດີ ຈຶ່ງເປັນໂອກາດສຳຄັນທີ່ຈະນຳໄດ້ເອົາຄວາມຮູ້ ແລະປະສົບການໃນບັ້ນຮົບຕໍ່ສູ້ກັບພະຍາດຮ້າຍມາແບ່ງປັນຢູ່ ສປປ ລາວ.

ໜ້າວຽກຫຼັກໃນໄລຍະທີ່ຜ່ານມາຂອງທີມແພດ ແລະຜູ້ຊ່ຽວຊານ ແມ່ນລົງພື້ນທີ່ເພື່ອຕິດຕາມ, ເກັບກຳຂໍ້ມູນ ແລະສຳຫຼວດຕາມຈຸດທີ່ມີຄວາມສ່ຽງຕໍ່ການແຜ່ລະບາດຂອງພະຍາດ ໂດຍສະເພາະກໍແມ່ນບັນດາໂຮງໝໍສູນກາງທີ່ຮັບຮອງຄົນເຈັບຜູ້ຕິດເຊື້ອພະຍາດ ແລະກໍລະນີສົງໄສ ເຊັ່ນ: ໂຮງໝໍ ມິດຕະພາບ, ໂຮງໝໍ 103, ໂຮງໝໍເສດຖາທີຣາດ. ນອກຈາກນັ້ນ, ກໍໄດ້ມີການປະຊຸມປຶກສາຫາລືກັບບັນດາເຈົ້າໜ້າທີ່ທີ່ກ່ຽວຂ້ອງ ເປັນຕົ້ນກໍແມ່ນ ກົມຄວບຄຸມພະຍາດຕິດຕໍ່, ສູນວິເຄາະ ແລະລະບາດວິທະຍາ, ກະຊວງສາທາລະນະສຸກ….ໂດຍພາຍໃຕ້ຄຳຂວັນ “ຮ່ວມມືກັນຕ້ານພະຍາດ Covid 19 ຮ່ວມທຸກຮ່ວມຍາກ” ທີມແພດ ແລະ ຜູ້ຊ່ຽວຊານຈະເຄື່ອນໄຫວວຽກງານຢູ່ ສປປ ລາວ ເປັນເວລາ 14 ວັນ ໃນແຕ່ລະວັນພວກເຂົາໄດ້ປະຕິບັດໜ້າທີ່ຢ່າງຂະຫຍັນຂັນແຂງບໍ່ຕ່ຳກວ່າ 12 ຊົ່ວໂມງ.

ໃນນັ້ນ, ລວມມີການລົງພື້ນທີ່ຮ່ວມກັບທີມແພດຝ່າຍລາວ ແລະປະຊຸມປຶກສາຫາລືພາຍໃນທີມເພື່ອແກ້ໄຂບັນຫາທີ່ເກີດຂຶ້ນ ທັງໝົດທັງມວນກໍແມ່ນເພື່ອແບ່ງປັນວິຊາສະເພາະໃຫ້ແກ່ທີມແພດຝ່າຍລາວໃຫ້ຫຼາຍທີ່ສຸດເທົ່າທີ່ຈະເຮັດໄດ້ເຊັ່ນ: ການຄັດຕອງຫາຜູ້ຕິດເຊື້ອ, ກວດວິເຄາະເຊື້ອພະຍາດຢູ່ຫ້ອງທົດລອງ, ປິ່ນປົວຄົນເຈັບ, ແນະນຳວິທີປ້ອງກັນຕົນເອງຂອງແພດໝໍຢ່າງລະອຽດ ເຊັ່ນ: ການນຳໃຊ້ເຄື່ອງເມືອງ ແລະຊຸດປ້ອງກັນ, ການຈັດການພື້ນທີ່ຕ້ານ ແລະ ສະກັດກັ້ນການແຜ່ເຊື້ອໃນບໍລິເວນໂຮງໝໍ ແລະ ອື່ນໆ ທີ່ສຳຄັນກໍແມ່ນຈະຕ້ອງຮີບຮ້ອນສ້າງຄູ່ມືໃນການປ້ອງການກັນ ແລະ ສະກັດກັ້ນພະຍາດ Covid 19 ທີ່ສາມາດນໍາໃຊ້ຢ່າງແທດເໝາະກັບສະພາບຕົວຈິງ ແລະມີປະສິດທິພາບ.

ດ້ວຍໄລຍະເວລາອັນສັ້ນ. ສະນັ້ນ, ຈຸດປະສົງຂອງການມາປະຕິບັດພາລະກິດໃນຄັ້ງນີ້ບໍ່ແມ່ນການປິ່ນປົວຄົນເຈັບໂດຍກົງ ແຕ່ຄືການຖ່າຍທອດວິຊາການ ແລະ ປະສົບການແກ່ທີມແພດຝ່າຍລາວ ເພື່ອນຳໄປໝູນໃຊ້ໃນການປິ່ນປົວຄົນເຈັບ ເຊິ່ງຖືເປັນສິ່ງທີ່ມີຄວາມໝາຍຄວາມສຳຄັນ ແລະເປັນການຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນທາງການແພດຂອງລາວ. ທ່າມກາງການປະຕິບັດພາລະກິດອັນເລັ່ງດ່ວນ ກໍຍັງມີຫຼາຍຂໍ້ທ້າທາຍທີ່ທີມແພດ ແລະຜູ້ຊ່ຽວຊານທັງ 12 ທ່ານຕ້ອງຮັບມື ເນື່ອງຈາກສະພາບການການແຜ່ລະບາດຂອງພະຍາດຢູ່ທີ່ປະເທດຈີນ ແລະ ປະເທດລາວມີຄວາມແຕກຕ່າງກັນ. ສະນັ້ນ, ບັນດາມາດຕະການຕ່າງໆຈຳເປັນຕ້ອງມີການປັບດັດໃຫ້ເໝາະສົມ ເຊິ່ງພວກເຂົາຕ້ອງໄດ້ວິເຄາະ ແລະ ປະເມີນສະຖານະການໃຫ້ຖ່ວງທັນ.

ບັນດາທີມແພດໄດ້ໃຫ້ຄໍາເຫັນວ່າ: ສປປ ລາວຖືເປັນປະເທດທີ່ຄວບຄຸມການແຜ່ລະບາດໄດ້ດີຫາກທຽບໃສ່ກັບຫຼາຍປະເທດໃນພາກພື້ນ ແຕ່ອີງຕາມສະພາບການໃນປັດຈຸບັນນີ້ແມ່ນຢູ່ໃນໄລຍະຫົວລ້ຽວຫົວຕໍ່, ທຸກຄົນກໍບໍ່ຄວນຖືເບົາ ຫຼຶນິ້ງນອນໃຈ, ຕ້ອງໄດ້ເອົາໃຈໃສ່ຕໍ່ຕ້ານ ແລະ ສະກັດກັ້ນການແຜ່ລະບາດຂອງພະຍາດຢ່າງເຂັ້ມງວດທີ່ສຸດ. ບໍ່ດັ່ງນັ້ນ, ການແຜ່ລະບາດຂອງເຊື້ອອາດຈະລຸກລາມຈົນຍາກທີ່ຈະຄວບຄຸມ.

ບັ້ນຮົບການຕໍ່ສູ້ຕ້ານກັບ Covid 19 ໄດ້ໄຂຂຶ້ນຢ່າງເປັນທາງການໃນທົ່ວໂລກ. ພວກເຮົາຮູ້ສຶກຊາບຊຶ້ງໃຈທີ່ສຸດທີ່ເພື່ອນຮ່ວມຊາຕາກຳສອງຊາດ ລາວ-ຈີນ ຍັງຮ່ວມຕໍ່ສູ້ຄຽງບ່າຄຽງໄຫຼ່ ທ່າມກາງການປະຈັນບານຂອງບຸກຄະລາກອນທາງການແພດ ແລະ ເຈົ້າໜ້າທີ່ກ່ຽວຂ້ອງ ຜູ້ອຸທິດເຫື່ອແຮງ ແລະ ສະຕິປັນຍາຕໍ່ສູ້ກັບພະຍາດຮ້າຍ ໂດຍມີເປົ້າໝາຍອັນໜຶ່ງອັນດຽວນັ້ນກໍຄືຊ່ວຍໃຫ້ປະຊາຊົນມີຊີວິດລອດປອດໄພ. ສະນັ້ນ, ພວກເຮົາທຸກຄົນກໍຄວນເປັນກອງຫຼັງທີ່ດີ ປະກອບສ່ວນໃນການປະຕິບັດມາດຕະການປ້ອງກັນ, ຕໍ່ຕ້ານ ແລະ ສະກັດກັ້ນພະຍາດ Covid 19 ທີ່ທາງການໄດ້ວາງອອກຢ່າງເຂັ້ມງວດ, ດຳລົງຊີວິດຢ່າງມີສະຕິ ພ້ອມທັງມີຄວາມຮັບຜິດຊອບຕໍ່ຕົນເອງ, ຄອບຄົວ ແລະ ສັງຄົມ.

#ຢູ່ເຮືອນ #ຢຸດເຊື້ອ #ເພື່ອຊາດ #ຕ້ານການລະບາດ #ຂອງCovid19
ຂ່າວ-ພາບ: CRI-FM93