ສາທາຢືນຢັນ! ມື້ນີ້ ສປປ ລາວ ບໍ່ພົບຜູ້ຕິດເຊື້ອໂຄວິດ-19 ເພີ່ມ ຍອດລວມຍັງຄົງທີ່ 10ກໍລະນີ

613

ຢືນຢັນຈາກກະຊວງສາທາລະນະສຸກ, ມາຮອດມື້ນີ້ວັນທີ 3 ເມສາ 2020 ບໍ່ພົບຜູ້ຕິດເຊື້ອໂຄວິດ-19 ເພີ່ມ ເຮັດໃຫ້ ສປປ ລາວ ຍັງຄົງຍອດລວມໄວ້ທີ່ 10ກໍລະນີ, ສ່ວນເລື່ອງຂ່າວຢູ່ສັງຄົມອອນລາຍ ທີ່ມີຜູ້ຕິດເຊື້ອ 20 ກໍລະນີນັ້ນ ເປັນຂ່າວປອມ.

ວັນທີ 3 ເມສາ 2020​ ເວລາ 14:30​ ໂມງ ທີ່ກະຊວງສາທາລະນະສຸກ, ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ຖະແຫຼງຂ່າວ ໂດຍທ່ານ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໃຫ້ຮູ້ວ່າ: ສະພາບການຄວບຄຸມ ແລະ ປ້ອງກັນການລະບາດຂອງເຊື້ອພະຍາດໂຄວິດ-19​ ມາຮອດມື້ນີ້ພວກເຮົາໄດ້ກວດຜູ້ຢູ່ໃນກໍລະນີສົງໃສ 22 ກໍລະນີ ໃນທົ່ວປະເທດ ເຊິ່ງຜົນກວດທັງໝົດ 22 ຄົນເປັນລົບ ບໍ່ມີຜູ້ຕິດເຊື້ອ, ສ່ວນຍອດລວມການເກັບຕົວຢ່າງມາກວດທັງໝົດ 520 ຄົນ, ກວດພົບເຊື້ອ 10 ຄົນ; ປັດຈຸບັນຈຳນວນກໍລະນີໃກ້ຊິດສຳຜັດກັບຄົນເຈັບ ທີ່ກຳລັງຕິດຕາມມີ 216 ຄົນຢູ່ໃນແຂວງອຸດົມໄຊ, ຫຼວງພະບາງ ແລະ ນະຄອນຫຼວງ.

ສະນັ້ນ,​ ມາຮອດວັນທີ 3 ເມສາ 2020​ ເວລາ 14:30 ໂມງ ຄະນະສະເພາະກິດພວກເຮົາຂໍຢັ້ງຢືນວ່າ ຍອດຜູ້ຕິດເຊື້ອພະຍາດໂຄວິດ-19​ ໃນ ສປປ ລາວ ລວມທັງໝົດ 10 ຄົນເທົ່ານັ້ນ. ສ່ວນກະແສຂ່າວຢູ່ສື່ສັງຄົມອອນລາຍທີ່ຖືກເຜີຍແຜ່ອອກໄປກ່ຽວກັບມີຜູ້ຕິດເຊື້ອເພີ່ມອີກ 10 ກໍລະນີນັ້ນ ເປັນຂ່າວປອມ ບໍ່ມີຄວາມຈິງແຕ່ຢ່າງໃດ.

ຮູບພາບ ແລະ ຂໍ້ມູນ: ຂ່າວເສດຖະກິດການຄ້າ