3 ປີຜ່ານມາໜ່ວຍພັກກອງຄຸ້ມຄອງພາສີ 1 ເກັບລາຍຮັບໄດ້ 1.682 ຕື້ກວ່າກີບ

447

ຜ່ານການຈັດຕັ້ງປະຕິບັດໃນໄລຍະ 3 ປີຜ່ານມາຂອງໜ່ວຍພັກກອງຄຸ້ມຄອງພາສີ 1 ສາມາດເກັບລາຍຮັບເຂົ້າງົບປະມານໄດ້ 1.682 ຕື້ກວ່າກີບ ເທົ່າກັບ 93,03%. ນອກນັ້ນ, ຍັງມີວຽກງານປາບປາມ ແລະ ສືບສວນ-ສອບສວນຈັບກຸມສິນຄ້າຫນີພາສີໄດ້ທັງຫມົດ 114 ຄະດີ ມູນຄ່າ 5.527 ຕື້ກວ່າກີບ ແລະ ແກ້ໄຂແລ້ວ 92 ຄະດີ. ສ່ວນແຜນການ 5 ປີຕໍ່ໜ້າໄດ້ກໍານົດໃຫ້ແຂວງຫຼວງນ້ຳທາສູ້ຊົນເກັບລາຍຮັບໃຫ້ໄດ້ 2.121 ຕື້ກວ່າກີບ ແລະ ແຂວງບໍ່ແກ້ວໃຫ້ໄດ້ 1.502 ຕື້ກວ່າກີບ.

ສະຫາຍ ທອງຫຼ້າ ອ່ອນລືໄຊ ຮອງເລຂາຫນ່ວຍພັກກອງຄຸ້ມຄອງພາສີ 1 ໄດ້ຜ່ານບົດລາຍງານການເມືອງໄລຍະ 3 ປີຜ່ານມາ ແລະ ທິດທາງແຜນການ 5 ປີ ຕໍ່ຫນ້າປີ 2020 – 2025 ເຊິ່ງໃນໄລຍະ 3 ປີຜ່ານມາຄະນະຫນ່ວຍພັກກອງຄຸ້ມຄອງພາສີ 1 ມີຄະນະກອງ 4 ສະຫາຍ, ມີຂອບເຂດການຊີ້ນຳໆພາຄຸ້ມຄອງພະນັກງານ 2 ແຂວງຄື: ແຂວງຫຼວງນ້ຳທາ ແລະ ແຂວງບໍ່ແກ້ວ ເຊິ່ງການເຄື່ອນໄຫວວຽກງານວິຊາສະເພາະໄດ້ອຳນວຍຄວາມສະດວກໃນການສົ່ງອອກ-ນຳເຂົ້າສິນຄ້າ, ເຄື່ອງຂອງ ແລະ ຜູ້ເດີນ ທາງຜ່ານດ່ານ; ທັງຮັບປະກັນໃນການຈັດເກັບລາຍຮັບເຂົ້າງົບປະມານໃຫ້ໄດ້ຕາມຄາດຫມາຍວາງໄວ້.

ຜ່ານການຈັດຕັ້ງປະຕິບັດໃນໄລຍະ 3 ປີຜ່ານມາເກັບລາຍຮັບໄດ້ 1.682 ຕື້ກວ່າກີບ ປະຕິບັດໄດ້ 93,03%, ວຽກງານປາບປາມ ແລະ ສືບສວນ-ສອບສວນຈັບກຸມສິນຄ້າຫນີພາສີໄດ້ທັງຫມົດ 114 ຄະດີ, ມູນຄ່າ 5.527 ຕື້ກວ່າກີບ, ແກ້ໄຂແລ້ວ 92 ຄະດີ; ຍັງບໍ່ທັນໄດ້ແກ້ໄຂ 22 ຄະດີ ມູນຄ່າ 2.714 ຕື້ກ່ວາກີບ; ຈັດເກັບລາຍຮັບຄ່າພາສີ-ອາກອນ ແລະ ຄ່າປັບໃໝໄດ້ 2.264 ຕື້ກວ່າກີບ; ວຽກງານແກ້ໄຂລົດນຳເຂົ້າບໍ່ຖືກຕ້ອງແຕ່ປີ 2017-2019 ໄດ້ຈຳນວນ 1.045 ຄັນ ມອບເຂົ້າງົບປະມານ 27.411 ຕື້ກວ່າກີບ; ກວດກາເອກະສານການແຈ້ງເສຍໃນລະບົບອາຊີກຸດະ 297.362 ລາຍການ ກວດພົບເຫັນວ່າບໍ່ໄດ້ເສຍພາສີ-ອາກອນ ແລະ ພັນທະອື່ນໆບໍ່ຄົບຖ້ວນ 16 ຄະດີ, ສາມາດເກັບຄືນໄດ້ 16 ຄະດີ ເປັນເງິນ 96 ລ້ານກວ່າກີບ.

ສໍາລັບທິດທາງແຜນການ ໃນ 5 ປີຕໍ່ຫນ້າ ແມ່ນຈະໄດ້ສືບຕໍ່ສ້າງຫນ່ວຍພັກເປັນຫນ່ວຍພັກປອດໃສເຂັ້ມແຂງ, ຫນັກແໜ້ນທາງດ້ານການເມືອງແນວຄິດ, ມີຄວາມເຂັ້ມແຂງທາງດ້ານການຈັດຕັ້ງ ແລະ ແບບແຜນວິທີເຮັດວຽກຕາມກົນໄກລະບຽບການຄຸ້ມຄອງຫັນເຂົ້າສູ່ລະບົບທັນສະໄຫມເທື່ອລະກ້າວ; ການຈັດເກັບລາຍຮັບເຂົ້າງົບປະມານດ້ວຍລະບົບການຄຸ້ມຄອງລະບອບ ບໍ 53 ດ້ວຍລະບົບ ເພື່ອຄວາມສະດວກຄວາມວ່ອງໄວ, ຖືກຕ້ອງ ແລະ ໂປ່ງໃສສາມາດກວດສອບໄດ້. ນອກນັ້ນ, ກໍ່ໄດ້ກຳນົດໄວ້ໃນ 5 ປີຕໍ່ຫນ້າຄື : ແຂວງຫຼວງນ້ຳທາໃຫ້ໄດ້ 2.121 ຕື້ກວ່າກີບ ແລະ ແຂວງບໍ່ແກ້ວໃຫ້ໄດ້ 1.502 ຕື້ກວ່າກີບ.

(ເນື້ອໃນ-ພາບ: ອຸ້ມ ສົມນໍວັນ)