ມອບເຂົ້າສານໜຽວໃຫ້ປະຊາຊົນ ຜູ້ທີ່ໄດ້ຮັບຜົນກະທົບຈາກນໍ້າຖ້ວມປີ 2019

495

ວັນທີ 24 ມີນາ 2020, ພະແນກແຮງງານ ແລະ ສະຫວັດດີການສັງຄົມ(ຮສສ)ແຂວງຈໍາປາສັກ ໄດ້ມອບເຂົ້າສານໜຽວ ຈໍານວນ 314 ໂຕນ ໃຫ້ແກ່ຄະນະພັກ – ອົງການປົກຄອງເມືອງມຸນລະປາໂມກ ເພື່ອນໍາໄປແຈກຢາຍຊ່ວຍເຫຼືອ ຜູ້ໄດ້ຮັບຜົນກະທົບຈາກໄພນໍ້າຖ້ວມ ໃນປີ 2019 ທີ່ຜ່ານມາ.

 ພິທີມອບ – ຮັບເຂົ້າຊ່ວຍເຫຼືອຄັ້ງນີ້ ຈັດຂຶ້ນຢູ່ສະໂມສອນຂອງເມືອງ, ມອບໂດຍ ທ່ານ ປະດິດ ວັນນະລັດສະໝີ ກໍາມະການພັກແຂວງ ຫົວໜ້າພະແນກ ຮສສ ແຂວງ, ຮັບໂດຍ ທ່ານ ສໍາລີ ແກ່ນມະນີ ກໍາມະການພັກແຂວງ ເລຂາພັກເມືອງ ເຈົ້າເມືອງໆມຸນລະປາໂມກ. ມີການນໍາ ແລະ ພະນັກງານວິຊາການທີ່ກ່ຽວຂ້ອງຂອງແຂວງ ແລະ ເມືອງ ເຂົ້າຮ່ວມເປັນສັກຂີພະຍານ.

ເຂົ້າທີ່ນໍາມາມອບໃນຄັ້ງນີ້ ເປັນເຂົ້າຊ່ວຍເຫຼືອຂອງລັດຖະບານ ຜ່ານພະແນກ ຮສສ ແຂວງ ເຊິ່ງເມືອງມຸນລະປາໂມກ ເປັນເມືອງທີ 2 ທີ່ໄດ້ຮັບເຄື່ອງຊ່ວຍເຫຼືອດັ່ງກ່າວ, ຜ່ານມາ ໄດ້ມອບໃຫ້ເມືອງຈໍາປາສັກ 245 ໂຕນ. ສ່ວນຜູ້ໄດ້ຮັບຜົນກະທົບຈາກໄພນໍ້າຖ້ວມຢູ່ເມືອງອື່ນໆ ຈະສືບຕໍ່ນໍາໄປມອບໃຫ້ໃນມໍ່ໆນີ້. ເມືອງມຸນລະປາໂມກ ມີເນື້ອທີ່ຖືກນໍ້າຖ້ວມທັງໝົດ 2.883 ເຮັກຕາ, ໃນນັ້ນ ເນື້ອທີ່ເສຍຫາຍ1.136 ເຮັກຕາ, ຜູ້ທີ່ໄດ້ຮັບຜົນກະທົບ 2.021 ຄອບຄົວ, ມີຈໍານວນພົນ 13.497 ຄົນ, ຍິງ 6.910 ຄົນ.